Jańaarqa aýdanynyń uıymshyl jastary oblys ortalyǵyndaǵy medısınalyq mekemelerdiń qyzmetkerleri men emdelýshiler úshin bes tonnadan astam qymyz jınady, – dep habarlaıdy Egemen.kz oblys ákiminiń baspasóz qyzmetine silteme jasap.
Bul ıgi istiń bastaýynda aýdandyq jastar resýrstyq ortalyǵynyń koronavırýspen aýyratyndarǵa kómek kórsetý boıynsha kótergen chellendji turdy.
Jastardyń bastamasyn aýdan halqynyń belsendi túrde qoldaǵanyn aıta ketken lázim. Mysaly, ótken jumada aýdandaǵy Eralıev aýylynyń turǵyndary kenshiler astanasyndaǵy tórt aýrýhanaǵa 1 tonna qymyz ben 200 kılo qurt jetkizdi. Osynshama mólsherdegi qymyzdy aýyl turǵyndary bir kúnniń ishinde jınaǵan eken. Bul ıgi isti uıymdastyrýdyń basy-qasynda Eralıev aýylynyń turǵyny Erlan Túsipov júripti.
"Qazaq qymyzynyń myńdaǵan aýrýǵa shıpa ekendigi ejelden belgili. Biz naýqastardyń aýrýdy jeńýine kómek bergimiz jáne koronavırýspen kúndiz jáne túnde kúresip jatqan dárigerlerge qoldaý kórsetkimiz keldi. Jańaarqanyń bal qymyzy barlyǵyna kúsh-qýat berip, aýyrǵandar tezirek emdelip shyqsa degen tilek bar!", – deıdi ol aǵynan aqtarylyp.
Al jeke kásipker Qaırat О́mirbekov shıpaly sýsyndy Qaraǵandyǵa tegin jetkizipti.
Jańaarqa aýdanynyń jomart ta belsendi jastary oblys ortalyǵymen ǵana shektelip qalmaı, Jezqazǵan, Temirtaý, Sátbaev, Abaı qalalarynyń, sondaı-aq, Nura men Jańaarqa aýdandarynyń aýrýhanalaryna bes tonnadan astam qymyz, bir tonnaǵa jýyq qurt, irimshik jáne saýmal jınap, jetkizip berdi.
Budan bólek, atalǵan aýdanda qurbandyq shalý rásimderi ótkizilip, iri qara maldyń eti muqtaj jandarǵa taratylyp berildi. Sonymen qatar, aýdandaǵy aýrýhanalarǵa turǵyndar atynan ystyq tamaq jetkizildi. Jańaarqalyqtar bul jaqsy isterdiń aldaǵy ýaqytta da jalǵasyn tabatynyna bek senimdi.
Qaraǵandy oblysy