Fýtboldan Qazaqstan ulttyq quramasynyń kapıtany Baýyrjan Islamhan Birikken Arab Ámirlikteriniń «Ál-Aın» komandasymen úsh jyldyq kelisimshartqa qol qoıdy. Buǵan deıin de Islamhan atalǵan komanda quramynda 5 aı jalda oınaǵan.
27 jastaǵy Jambyl óńiriniń týmasy fýtboldyń qyr-syryna ózi týyp-ósken Taraz qalasynda qanyqty. 2011 jyly jergilikti «Taraz» komandasymen birge el chempıonatynda óner kórsetip, kelesi jyly Qazaqstan jastar quramasymen Reseıde ótken «Dostastyq kýbogynda» jasyndaı jarqyldady. Sol jerde reseılik mamandardyń kózine túsip, bir jyldan soń Reseı premer-lıgasynda dop tebetin «Kýban» klýbyna aýysty. Biraq bul jerde otandasymyzdyń baǵy ashylmaly. Komandanyń qosalqy quramyna túsip qalǵan soń jarty jylǵa elge oraldy. Alǵash «Astanada» jalda oınasa, keıin Almatynyń «Qaıraty» Islamhandy reseılik komandadan satyp aldy.
Baýyrjan Islamhan keıingi bes jylyn «Qaırat» quramynda ótkizip, Qazaqstan chempıonatynyń bes dúrkin kúmis júldegeri, bir ret qola júldegeri atandy. Tórt ret Qazaqstan kýbogynda, eki márte Sýperkýbok básekesinde top jardy. Sonymen qatar úsh jyl Qazaqstannyń úzdik fýtbolshysy degen qurmetti ataqqa ıe boldy.