Aýstralııanyń Vıktorııa shtaty COVID-19 órshýi jaıynda dabyl qaǵyp, Melbýrnǵa komendanttyq ýaqyt engizdi, dep habarlaıdy Reuters.
Eldegi ekinshi qala sanalatyn Melbýrn buǵan deıin de 6 apta karantınge jabylǵan edi. Bir kúnniń ishinde aýrý juqtyrǵan vıktorııalyqtar sany 671 adam bolyp, 5 mln turǵyny bar shtat ortalyǵy saǵat 20:00-den 05:00-ge deıin komendanttyq saǵattyń tártibine baǵynýy tıis degen sheshim shyqty.
Vıktorııa Premer-mınıstri Denıel Endrıýs: «Qatań tártip aýrýdy kúndelikti myńdaǵan adamnyń juqtyrýyn shekteıdi dep oılaımyz. Osyǵan deıingi sharalardyń tıimdiligi az bolýyna baılanysty azamattardyń endi úılerinen tek jumysqa barý úshin jáne kómek alýǵa ǵana shyǵýyna ruqsat», dedi.
Buǵan qosa Melbýrn turǵyndarynyń dalaǵa, taza aýaǵa shyǵýyna da belgili bir tártip engizildi. Sýpermarketter jumysy toqtamaǵanymen, meıramhana men dámhanalar esigi kelýshilerge jabyq, tek tapsyrys qabyldap, úıge jetkizip beredi.
* * *
Worldometer deregine qaraǵanda Amerıka Qurama Shtattarynda KVI juqtyrǵandar 49 038 adamǵa ulǵaıǵan.
Pandemııa bastalǵaly AQSh-ta 4,81 mln turǵyn SARS-CoV-2 tyrnaǵyna ilinip, vırýs salmaǵyn áleýmet tutas sezinip jatyr. О́tken táýlikte 467 adam ómirmen qoshtassa, dúısenbi, 3 tamyzdyń tańyna deıin elde barlyǵy 158 365 amerıkalyq kóz jumǵan degen málimet keltirildi.
* * *
Italııa ǵalymdary adamdar úı haıýanattaryna vırýs juqtyrady degen boljamdy rastady.
Italııanyń soltústigindegi Lombardııada 540 ıt pen 277 mysyqty tekserip, qojaıyndary aýyrǵan kezde nemese olar indet zili joǵary jerlerde júrse SARS-CoV-2 juqtyratynyn anyqtaǵan. Zerttelgen ıtterdiń 3,4, al mysyqtardyń 3,9 paıyzynda antıdeneler paıda bolǵan. Al Germanııadaǵy Frıdrıh Leffler atyndaǵy ınstıtýttyń basshysy Tomas Mettenlıaıter ıt pen mysyq adamdar arasynda vırýs taratady degen qaýip negizsiz, COVID-19 tek adamnan adamǵa juǵady dep tujyrymdaǵan bolatyn.
* * *
COVID-19 indetine qatysty jasalǵan shekteýler Ispanııa týrızminiń tynysyn taryltty.
Pandemııa kesirinen elde 750 myń adam jumyssyz qalyp, jyldyq tabys 83 mlrd eýroǵa deıin azaıady. Bul qaýipti «El País» aıtady.
О́tken aıdyń sońǵy kúnderinde Germanııa úkimeti azamattaryna Ispanııanyń birqatar aımaqtaryna barmaý jóninde keńes bergen-di. Endi Belgııa koroldigi de asa bir qajettilik týmasa Aragon men Navarra, Katalonııaǵa saparǵa shyqpaı, týrıstik qydyrysty qoıa turýǵa úndedi. Belgııalyqtarǵa boı tarta turyńyzdar degen jerlerdiń qataryna brıtandyq Lester qalasy, Shveısarııanyń Vale, Vo jáne Jeneva kantondary da kirgen eken.
* * *
Germanııada KVI-diń jańadan tirkelýi Gessen aımaǵynda kóbirek bolyp tur.
Gessen aımaǵy Áleýmettik zertteý mınıstrligi bir táýlik ishinde test tapsyrǵan adamdardyń 88-inde vırýs anyqtalǵany jóninde habarlady. Al epıdemııa órshigennen beri Gessende 12 117 adam aýyryp, 520 pasıentti qutqarý múmkin bolmapty. О́tken táýlik ishinde jalpy Germanııa kóleminde jańadan 240 adam vırýs juqtyrǵan.
* * *
Meksıkada bir táýlikte 4,8 myń adam vırýs juqtyrǵan. Bul týraly REGNUM jazady.
Meksıka densaýlyq saqtaý mınıstrliginiń bas epıdemıology Hose Lýıs Alomıa sońǵy 24 saǵat ishinde 4853 adam SARS-CoV-2 juqtyrǵanyn, osylaısha jalpy esepte 439 046 meksıkalyqtyń aýyrǵanyn aıtty. Bas epıdemıolog 289 394 jan jazylyp shyqqanymen, pandemııa bastalǵannan beri el kóleminde 47 746 pasıenttiń demi úzilgenin jetkizdi.
* * *
Iranda sońǵy úsh apta ishinde aýrý órship tur. Densaýlyq saqtaý mınıstrligi ókiliniń habalaýynsha, bir táýlikte 2685 adamnyń vırýs juqtyrǵany anyqtalǵan.
Eldegi 31 aımaqtyń 25-i boıynsha «jaǵdaı alańdatarlyq» dep baǵalaǵan mınıstrlik bir kúnde 208 adamnyń tirishilik tynysynyń toqtaǵanyn, osylaısha pandemııa qurbandarynyń sany 17 190 bolǵanyn aıtty.
Iranda barlyǵy 310 myń pasıent indet juqtyrǵan.
Toptamany daıyndaǵan
Anar TО́LEÝHANQYZY,
«Egemen Qazaqstan»