Tuńǵyshy alǵashqy múshel jasta, kishkentaıy ótken jyly dúnıe esigin ashqan 8 balanyń anasy kúni keshege deıin jaldamaly páterde turyp kelgen. «Páterden páterge aýysyp, shıetteı 8 balamen qatty qınaldyq. Kúıeýimniń bir ózi jumys istegendikten kún kórisimiz de máz emes edi. Demeýshiler taýyp, Shardara qalasynan baspana bergen aýdan ákimi Qaırat Joldybaı myrzaǵa alǵysym sheksiz», deıdi kóp balaly ana Regına Súıeýova. On balanyń anasy Gúlbahar Ábdihalyqqyzynyń da aıtar alǵysy sheksiz. Tize bersek oblys, aýdan ákimine, jergilikti kásipkerler men demeýshilerge rızashylyǵyn bildirýshi analar az emes.
Iá, Túrkistan oblysynyń ákimi О́.Shókeevtiń bastamasymen iske asyrylǵan, kómekke muqtaj jandarǵa demeý bolǵan «Qamqorlyq» baǵdarlamasynyń sharapaty tıgenderdiń óz aıtary bar jáne ol oryndy da. Baǵdarlama aıasynda kúnkórisi tómen kópbalaly otbasylardy jáne júrip-turýy qıyn múmkindigi shekteýli azamattardy baspanamen qamtý Shardara aýdanynda da qolǵa alynǵan bolatyn. Bul oraıda bıyl 9 baspana berý josparlanǵan eken. Ol jospar artyǵymen oryndalyp, 12 baspana berilip otyr. Jyl sońyna deıin taǵy da 3 turǵyn úıdi tapsyrýǵa múmkindik bar. Sonymen qatar Shardara aýdanynda memleket tarapynan 4 qabatty, 40 páterli 2 turǵyn úı kesheniniń qurylysy aıaqtalýda. Iаǵnı jyl sońyna deıin úı kezeginde turǵan 80 otbasy baspanaly bolady. Búgingi tańda Shardara aýdanynda ataýly áleýmettik kómek alatyn az qamtamasyz etilgen 1713 otbasy bolsa, onyń ishinde baspanasy joq turǵyn úıge muqtaj 12 turmysy tómen kópbalaly jáne múmkindigi shekteýli otbasylar baspanamen qamtamasyz etilip otyr.
«Aýdanda «Qamqorlyq» baǵdarlamasy aıasynda ómirlik qıyn jaǵdaıǵa tap bolǵan, qala, aýyldyq okrýgterden anyqtalǵan 58 otbasyǵa demeýshiler esebinen 2 599,2 myń teńgeniń áleýmettik kómegi kórsetildi. Sondaı-aq 58 otbasynyń eńbekke jaramdy 24 múshesi jumyspen qamtylǵan. Odan bólek jalpy somasy 25,7 mln teńgege demeýshiler esebinen 6, ıaǵnı Shardara qalasynan – 4, Qosseıit jáne Q.Turysbekov aýyldyq okrýgterinen bir-birden turǵyn úı berildi. Aýdan boıynsha 722 «Altyn alqa» ıegeri, 2027 «Kúmis alqa» ıegeri, 136 – «Batyr ana», 124 I jáne II dárejeli «Ana dańqy» ordenimen marapattalǵan kópbalaly analar bar. Olarǵa jáne jaǵdaıy tómen otbasylarǵa jergilikti ákimdik tarapynan únemi kómek kórsetilip keledi. Bala – bolashaǵymyz desek, analar – sol bolashaqtyń negizin qalaýshylar. Álemniń jaryǵyn syılaǵan asyl jandarǵa járdemaqy bolsyn, ózgesi bolsyn, qandaı qurmet, qoldaý kórsetsek te jarasady», deıdi aýdan ákimi Qaırat Joldybaı.
Al aýdandyq jumyspen qamtý jáne áleýmettik baǵdarlamalar bóliminiń basshysy J.Turlybekovtiń habarlaýynsha, tótenshe jaǵdaı kezinde kirissiz qalýǵa baılanysty 34936 adamnan ótinish kelip túsken.
«Azamattarǵa arnalǵan úkimet» memlekettik korporasııasy Shardara aýdandyq bólimshesine 34788 ótinish, Shardara aýdandyq jumyspen qamtý jáne áleýmettik baǵdarlamalar bólimine 148 ótinish qabyldanǵan. «Bólimge túsken ótinishter Halyqty jumyspen qamtý máselesi jónindegi shtabta qaralyp, 134 adamnyń ótinishi koldanystaǵy zańǵa sáıkes keri qaıtaryldy, bir jeke tulǵa jáne 13 zańdy tulǵa ótinishterine oń qorytyndy berilip memlekettik korporasııaǵa joldandy. Búgingi tańda memlekettik korporasııanyń aýdandyq bólimshesine 1 kezeńge 20288 ótinishke bankter arqyly járdemaqy tólense, 94 ótinishten bas tartylǵan. Tótenshe jaǵdaı rejiminiń uzartylýyna baılanysty 2 kezeńge 17201 adamǵa 42500 teńge áleýmettik tólem qaıta tólendi», deıdi J.Turlybekov.
Bıylǵa memlekettik ataýly áleýmettik kómekke bıýdjetten 1 173,1 mln teńge bólingen. Onyń 1 065,6 mln teńgesi respýblıkalyq, 107,5 mln teńgesi jergilikti bıýdjetten. Memlekettik ataýly áleýmettik kómek alýǵa 1713 otbasyn qatystyrý (9873 adam) josparlanýda. Onyń ishinde 223,4 mln teńge 1-6 jasqa deıingi balalarǵa kepildendirilgen áleýmettik paketter úshin qarastyrylǵan. Bıyl 6 aıda 636 otbasydan qujat qabyldanyp, onyń 533-ine 107,6 mln teńge taǵaıyndalyp, tolyǵymen tólendi. 100 otbasynyń qujatynan komıssııanyń sheshimi boıynsha bas tartylyp, qalǵan 3 otbasynyń qujattary komıssııa qaraýyna usynylǵan.
«Eńbek jáne halyqty áleýmettik qoldaý mınıstriniń «Tótenshe jaǵdaı kezeńinde áleýmettik-eńbek salasynda memlekettik qyzmetter kórsetýdiń jáne halyqtyń jekelegen sanattaryn azyq-túlik jáne turmystyq jıyntyǵymen qamtamasyz etýdiń keıbir máseleleri týraly» buıryǵyna sáıkes, memlekettik ataýly áleýmettik kómek alýǵa I toqsanǵa qabyldanǵan 485 otbasynyń áleýmettik tólemderi II toqsanǵa uzartyldy. Olarǵa taǵaıyndalǵan qarjy 106,7 mln teńge, búgingi tańǵa taǵaıyndalǵan qarjynyń respýblıkalyq bıýdjetten 86,7 mln teńgesi sáýir, mamyr aılaryna tólendi», deıdi bólim basshysy.
Jalpy aýdanda 2020 jylǵa kúnkóris deńgeıinen tómen halyqtyń úlesin 27,1 paıyzǵa deıin tómendetý josparlanyp otyr.
Túrkistan oblysy