Asa aýyr salmaqtaǵy qazaqstandyq kásipqoı boksshy Jan Kosobýskıı kezekti jekpe-jegin jeńispen aıaqtady. Otandasymyz Belarýs astanasy Mınskide ótken boks keshinde sharshy alańǵa shyǵyp, polshalyq qarsylasyn nokaýtqa jiberdi.
Eki boksshy arasyndaǵy aıqas on raýndqa josparlanǵan bolatyn. Alaıda jekpe-jek sońǵy raýndqa deıin jalǵasqanymen jerlesimiz onynshy raýndtyń bel ortasynan aýǵanda Kamıl Sokolovskııdi (9-17-2) sulatyp saldy. Polshalyq boksshy Jannyń aýyr soqqysynan keıin esin jııa almaǵan soń tóreshi kezdesýdi merziminen buryn aıaqtaýǵa májbúr boldy. Sondaı-aq Sokolovskıı besinshi raýndta da bir ret nokdaýnǵa túskenimen, tez esin jıyp úlgergen edi.
Osylaısha Jan Kosobýskıı ózine tıesili IBO Inter-Continental belbeýin birinshi ret qorǵady. Bul Kosobýskııdiń kásipqoı bokstaǵy 13-shi nokaýty jáne 14-shi jeńisi. Al qarsylasy 18-ret jeńilistiń kermek dámin tatty.
2017 jyldan bastap kásipqoı boksta óner kórsetip kele jatqan otandasymyz osymen toǵyzynshy jekpe-jegin Belarýs jerinde ótkizdi. Sonymen qatar búginge deıin eki ret Reseıde, bir márte – Ýkraına, Germanııa jáne BAÁ elinde sharshy alańǵa shyqqan.