Karantın rejimi kezinde otbasylyq saltanatty sharalarǵa ruqsat etilmeıtini, adamdardyń jınalýǵa bolmaıtyny jóninde eskertý alǵanyna qaramastan Petropavl qalasynyń bir turǵyndary 5 tamyz kúni qala irgesindegi Qyzyljar aýdanyna qaraıtyn Arhangelka selosynyń shirkeýine kelip, úılený rásimderin jasaǵan. Olardyń qonaqtarǵa jaıyp qoıǵan dastarhandary da foto jáne beınekórinisterge túsirilgen. Shirkeý qyzmetkerleri karantındik rejimniń buzylatynyna qaramastan osy sharanyń ótýine ruqsat bergen.
Halyqtyń shirkeýge kóp jınalyp jatqanyn kórip, aýyl ákimi mundaı sharaǵa qazir jol berilmeıtinin aıtyp, taraý kerektigin eskertse de oǵan eshkim baǵynyp, moıynsunbaǵan. Basqa amaly qalmaǵan ákim ýchaskelik polısııany shaqyrtqan. Polısııa qyzmetkerlerimen birge kelgen monıtorıngtik top jergilikti ákimge baǵynbaı, karantındik talapty moıyndamaı jatqan toptyń óreskel qylyqtaryn óz kózderimen kórgen.
Osy bassyzdyqqa jol bergen shirkeý basshylarynyń ústinen ákimshilik materıaldar jınalyp, qazir ol shara qoldanylýy úshin tıisti organǵa jóneltildi.
Jaman indettiń qasiretin keıbir qazaqtar túsinbeıdi, adam jınalmasyn degenge qaramaı otbasylyq saltanatty sharalar ótkizedi dep ózimizdi synaýshy edik. Sóıtsek, onyń qasiretin túsinbeıtinder basqa halyqtardyń arasynan da tabylyp jatyr.