Medısınalyq saqtandyrý júıesinde bolmaýyńyzdyń 6 sebebi

Birinshi sebep. Turǵyndardyń kóp­shiligi jeńildik kezeńin 1 shildege deıin tólemderdi tóleýden bosatý re­tin­de qabyldap, tóleýdi toqtatty. Negi­zinde, jeńildik kezeńi halyqtyń osy aralyqta MÁMS júıesindegi mártebesin anyqtap alýy úshin arnaıy jasaldy. Nátıjesinde, alǵashqy alty aıda jarna tólenbegen nemese ishinara tólengen bolýy múmkin, al MÁMS paketindegi medısınalyq kómek osy kezeńde bar­lyǵyna tegin qoljetimdi boldy.

Ne isteý kerek? Aldymen óz tólemde­rińizdiń aılarǵa bólingen úzindisin alý qajet. Eger jeke kásipker, azamattyq-quqyqtyq sıpattaǵy shart boıynsha jumys isteıtin qyzmetker, ózin-ózi jumyspen qamtýshy nemese derbes tóleýshi bolsańyz, onda sizde 2020 jyldyń 1 qańtarynan bastap sanaǵanda 8 aıǵa jarna tólenýi kerek. Eger jaldamaly jumysker bolsańyz, sońǵy 12 aıǵa aýdarym bolýy tıis. Eger bir nemese birneshe aı úshin aýdarymdar bolmasa, tólem jasalmaǵan aı úshin tólem júrgizý kerek nemese jumys berýshige baryp, aýdarym qaryzyn óteýdi suraý kerek. Eske sala keteıik, jarnalardy ýaqytyly tólemeıtin JK men jumys berýshiler úshin árbir merzimi ótken kún úshin, tólem kúnin qosa alǵanda, bereshek somasynyń 1,25% mólsherinde aıyppuldar men ósimpuldar qarastyrylǵan. Eger jarnalar men aýdarymdar boıynsha olqylyqtar bolmasa, Áleýmettik medısınalyq saqtandyrý qoryna 1406 nómiri boıynsha habarlasý kerek nemese telegramm botta ótinish qaldyrý qajet. Sizdiń ótinishińiz jeke qaralady.

Ekinshi sebep. 42500 teńge birjolǵy kó­mek tólenýine baılanysty, turǵyn­dardyń kópshiligi sáýir-mamyr aıla­rynda biryńǵaı jıyntyq tólem tóleı bastady. Osylaısha, olar ózin-ózi ju­myspen qamtyǵan azamattar sanatyna jatqyzyldy. Aıta keteıik, biryńǵaı jıyntyq tólemniń, ıaǵnı 2 626 teńgeniń tek 40%-y nemese 1,1 myń teńgesi min­detti áleýmettik medısınalyq saq­tan­­dyrýǵa jumsalady, qalǵandary mem­lekettik áleýmettik saqtandyrý qory (MÁSQ), zeınetaqy qory men salyq tólemderine bólinedi.

Biryńǵaı jıyntyq tólem mindetti tólemderge, onyń ishinde bıýdjetke baı­lanysty tórt máseleni birden shesh­se de, kóp adamdar ony tóleýdi jalǵas­tyrmaýdy jón sanady. Sonymen qatar «bir rettik» tóleýshilerdiń kópshiligi bul tólem olarǵa aldyn-ala bir jyl úshin saqtandyrý mártebesin beredi dep oılady. Bul olaı emes. Biryńǵaı jıyntyq tólemdi aı saıyn jáne turaqty, úzilissiz tóleý qajet. Eger osy segiz aı ishinde tek bir ret nemese eki ret qana tóleseńiz, bul Qorǵa qaryz retinde qarastyrylady.

Ne isteý kerek? Aldyńǵy aılar úshin jarna tóleıtin aralyqty kórsete oty­ryp, derbes tóleýshi retinde 2125 teńge mólsherinde jeke tólemder tóleý qajet. Siz jarnany «Azamattarǵa ar­nal­ǵan úkimet» memlekettik korpo­ra­­sııasynyń bank shotyna qolma-qol aqshamen de, bank aýdarymy arqyly da, ekinshi deńgeıdegi bankterdiń nemese «Qazposhta» bólimsheleriniń kassalary arqyly, sondaı-aq Qiwi jáne Kassa24 termınaldary, Halyq bankiniń termınaldary jáne Kaspi.kz mobıldik qosymshasy arqyly tóleı alasyz. EDB kassalary arqyly tóleý úshin derek­temelerdi ÁMSQ www.fms.kz. saıtynan bilýge bolady.

Úshinshi sebep. Jumys berýshi ka­rantın sharalaryna baılanysty qyzmet­kerlerdi ýaqytsha jalaqysyz demalysqa jiberý týraly sheshim qabyldady, sáı­kesinshe mindetti medısınalyq saqtan­dyrý boıynsha aýdarymdardy toqtatty. Aıtar bolsaq, qazirgi ýaqytta shamamen 4,5 mln adam jarnalardy ózderi tólemeıdi, olar úshin jumys berýshi tólem jasaıdy.

Ne isteý kerek? Eske sala keteıik, 20 sáýirden bastap iri bıznes óz qyzmet­ker­leri úshin 1 shildege deıin, shaǵyn jáne orta bıznes 1 qazanǵa deıin 29 qyzmet baǵyty boıynsha aýdarymdar tóleýden tolyq bosatyldy. Osy kásip­oryndardyń qyzmetkerleri olar úshin aýdarymdar túskenine nemese tús­pegenine qaramastan, osy kezeńge deıin saqtandyrylǵan bolyp sanalady.

Eger siz mindetti medısınalyq saq­tan­dyrý tólemderinen bosatylǵan kompanııada 1 qazanǵa deıin jumys isteseńiz de ózińizdiń saqtandyrylǵan mártebeńiz joqtyǵyn bilseńiz, Qoldau 24/7 mobıldi qosymshasyn júktep alyńyz da, «ShOB qyzmetkerleri úshin» qosymsha betin ashyp, uıymyńyzdyń BSN kórsetińiz, laýazymǵa taǵaıyndaý týraly buıryqty júktep, suranys jiberińiz. Ol 30 mınýt ishinde óńdeledi. Eger Memlekettik kirister komıtetiniń derekteri boıynsha BSN MÁMS tóleýden bosatylǵandar tizimine ense, onda azamatqa 1 kúntizbelik aıǵa saqtandyrylǵan mártebesi beriledi. Osy ýaqyt ishinde onyń jumys berýshisi tizimdi jańartýy kerek. Ol úshin siz Memlekettik kirister komıtetiniń veb-saıtyna kirip, arnaıy siltemeni nemese www.msb.fms.kz siltemesin qarap, ESQ qoldana otyryp, óz qyzmetkerlerińizdiń derekterin júkteýińiz qajet. Atap aıt­qanda, tizimderdi aı saıyn jańartyp otyrý kerek.

Tórtinshi sebep. Siz jumyssyz qal­dyńyz jáne MÁMS úshin jarna tóleýge esh múmkindigińiz joq.

Ne isteý kerek? Esterińizge sala ke­teıik, memleket MÁMS júıesiniń ne­gizgi – yntymaqtastyq qaǵıdatyn us­ta­nady jáne halyqtyń áleýmettik ál­siz toptarynan 11 mln azamat úshin jar­na aýdarady. Bul – 15 jeńildik san­a­tyndaǵy azamattar, onyń ishinde bala­lar, stýdentter, kópbalaly analar, júk­ti áıelder jáne jumyssyzdar bar. Sondyqtan eger jumyssyz qalsańyz jáne qazirgi ýaqytta ÁMSQ-ǵa jarna tóleı almasańyz, jergilikti atqarýshy organ janyndaǵy jumyspen qamtý ortalyǵyna baryp, jumyssyz retinde resmı túrde tirkelýińiz kerek. Sonda sizdiń mártebeńiz kelesi aıdan bastap avtomatty túrde «saqtandyrylǵan» bolyp ózgeredi.

Besinshi sebep. Siz azamattardyń 15 je­ńildik sanatynyń birine jatasyz, biraq bul týraly bilmeısiz. Biraz ýaqyt jarna tóleısiz, sodan keıin obek­tıvti sebeptermen toqtatasyz. Memle­ket siz úshin jarna tóleı almaıdy, óıtkeni sizdiń mártebeńiz avtomatty túrde táýelsiz tóleýshi nemese ózin-ózi jumyspen qamtyǵan adam bolyp ózgerdi.

Ne isteý kerek? Siz ózińizdiń medı­sı­nalyq uıymyńyzdyń Pasıentti qol­daý qyzmetine júginýińiz kerek, onda qyzmetkerler ár jaǵdaıda marshrýtty jeke túsindiredi. Sondaı-aq Qoldau 24/7 mobıldi qosymshasy arqyly óti­nish qaldyrýǵa, 1406 medısınalyq saq­tandyrý qorynyń baılanys ortalyǵyna nemese Qordyń qalalyq fılıalyna qońyraý shalýǵa bolady.

Altynshy sebep. Jarnalar men aýda­rymdardy tóleý kezinde qate kórse­tilgen derekter, ne jetkiliksiz soma bolýy múmkin.

Ne isteý kerek? Siz «Azamattarǵa ar­nalǵan úkimet» memlekettik korporasııasyna habarlasyp, tólem týraly túbirtekterińizdi usynýyńyz kerek. Sodan keıin qarajatty qaıtarýǵa ótinish jazyńyz jáne qaryz bolǵan aılar úshin jarnalardy qaıta tóleńiz.

Esińizde bolsyn, eger siz saqtan­dy­rylmaǵan bolsańyz da, siz memleket ke­pildik bergen tegin medısınalyq kómek paketinde medısınalyq kómek alasyz. Ýchaskelik dáriger, pedıatr, jalpy praktıka dárigeri mamandarynyń qabyldaýy, dárigerdi úıge shaqyrý, jedel járdem, emhana men stasıonar deńgeıindegi shuǵyl kómek, áleýmettik mańyzy bar, juqpaly aýrýlardy, onkologııalyq aýrýlardy emdeý osy paketke kiredi jáne saqtandyrylǵan mártebesine qaramastan azamattardyń barlyǵyna kórsetiledi.