Italııa úkimeti 12 tamyzda aımaq basshylarynyń qatysýymen vırýstyń yqpalyn azaıtý joldaryn qarastyrǵan jobalardy ortaǵa salǵan keńes ótkizdi, - dep habarlaıdy Egemen.kz.
Italııa Densaýlyq saqtaý mınıstri Roberto Speransa Ispanııa, Gresııa, Horvatııa jáne Maltaǵa baryp demalyp qaıtqan otandastardan áýejaı basynda test alý kerektigin usynǵan. Onyń aıtýynsha ekspress- test adamdardy 14 kún oqshaýlaýdan bosatyp, olarǵa senimdilik ákeledi. Sońǵy 9 kúnniń ishinde vırýstyń jańadan tirkelýiniń azaımaı turǵanyna qynjylǵan mınıstr pandemııanyń ne ekenin ol bastalǵaly barlyǵy 251 713 ıtalııalyqtyń bastarynan ótkerip, sezingenin aıtty.
Otyrysta SARS-CoV-2-niń Italııa ekonomıkasyna salǵan salqyny da sóz bolǵan. Eldegi IJО́ jyldyń aıaǵynda 10-15 paıyz deńgeıine deıin quldyrýy múmkin ekenin sarapshylar jetkizse, resmı bılik ol 8-9 paıyzdy quraıdy dep úmittenedi.
Ekonomıkany uıyqqa batyrmaý úshin úkimettik jobalarda 75 mlrd eýro qarastyrylypty, olardyń biraz mólsheri kredıttik qarajattan ekeni kórsetilgen. Al Eýroodaq bólgen kredıtten ıtalııalyq kompanııalar 200 mlrd eýro alatyny jáne onyń birazy bólingeni belgili boldy. Budan buryn Italııanyń EO-nyń basty benefısıary ekenin jazǵan edik.
Eki aıǵa sozylǵan shekteýden soń mamyrdyń basynda karantındi bosańsytqanda 4 mln adam jumysyna orala alypty. Qoǵamdyq tamaqtandyrý oryndary: meıramhana, dámhana, barlar jumysyna jan kirip, saıabaqtar ishi adamdarmen kóriktenip, qoǵamdyq kólikter júre bastaǵan. Al 18 mamyrda eldegi barlyq kásiporyndar men óndiris oryndary sanıtarlyq normaalardy saqtaı otyra jumystaryna kirisken. Osyǵan qaramastan COVID-19 tyrnaǵynyń ekonomıkaǵa salǵan tyrtyǵyn Italııa halqy birazǵa deıin sezinetin bolady.