Álemdik basketboldyń jarqyn juldyzy, Olımpıada chempıony, óziniń sporttyq karerasynda talaı rekordyq kórsetkishke qol jetkizgen Irvın "Medjık" Djonson 14 tamyzda 61 jasqa tolady, - dep habarlaıdy Egemen.kz.
"Sıqyrshy" atanǵan aıtýly azamat AQSh-tyń Mıchıgan shtatynda dúnıege keldi. 1979-1991 jyldar aralyǵynda Djonson tek bir ǵana klýb – «Los-Andjeles Leıkerstiń» namysyn qorǵady. Aıtýly komandamen birge talaı tolaǵaı tabysqa qol jetkizdi. Atap aıtsaq, bes ret Ulttyq basketbol qaýymdastyǵynyń (UBQ) jeńimpazy atanyp, úsh ret eń qundy oıynshyǵa tıesili arnaıy syılyqty ıelendi. 12 ret "Juldyzdar matchyna" qatysyp, 10 márte UBQ-nyń shartty quramasyna endi. 1992 jyly AQSh quramasy sapynda Barselona Olımpıadasynyń jeńimpazy atandy. Basqa da tolyp jatqan júldeleri taǵy bar.
Shamamen dál sol kezderi "Medjıktiń" SPID-ke shaldyqqany anyqtaldy. Jaısyz habardan qulaǵdar bolǵan ol áýelde sportpen qosh aıtysatynyn málimdegen edi. Desek te dańqty basketbolshy taǵdyrdyń jazǵanyna moıynusynǵan joq. Qaterli dertpen aıanbaı kúresip, batyldyq pen janqııarlyqtyń shynaıy úlgisin kórdi. SPID-ke shaldyqqan adamdarǵa qamqor qolyn sozyp, kóptegen ıgi sharalardyń basy-qasynda júrdi. 1996 jyly oıyn alańyna qaıta oralyp, sol maýsymda óziniń súıikti komandasynyń sapynda óner kórsetti.