Álemdik órkenıet besiginiń biri kóne Úndistanǵa vırýs salǵan sheńgel qursaýyn bosatar emes. Osylaısha AQSh pen Brazılııadan keıingi úshinshi orynǵa shyqqan Indııa Respýblıkasynyń turǵyndary kúnine myńdap aýrý juqtyryp jatyr, dep habarlaıdy Egemen.kz.
17 tamyzdaǵy RBK jáne REGNUM habarlaryna qaraǵanda Indııada 2 648 353 adam KVI adam juqtyrǵan. 51 059 pasıent vırýs kesirinen kóz jumyp, 8944 adam aýyr hálde jatqan kórinedi.
Indııanyń farmındýstrııa jaqsy damyǵan elderdiń qatarynda ekeni belgili. Pandemııa jarııalanǵannan beri úndistandyq ǵalymdar SARS-CoV-2-ge qarsy vaksına jasaý isine kirisip keten-di. 15 tamyz Indııa Táýelsizdigi merekesinde Eski Delıdiń Qyzyl qamal minberinde dástúrli quttyqtaýyn aıtyp sóz sóılegen eldiń premer-mınıstri Narendra Modı úsh túrli vaksınanyń klınıkalyq tájirıbelerden ótip jatqanyn habarlady. «Qazir 3 vaksına túrli kezeńdegi synaqtardan ótýde. Olar daıyn bolysymen qysqa merzimde óndiriske shyǵaramyz, oǵan árbir úndiliktiń qoly jetetin bolady», dedi Modı myrza.
Eger vırýstan syrqattanǵandar ishinde qaı shattyń alda ekenin aıtar bolsaq, onda Úndistandaǵy kınoóndirisi jolǵa qoıylǵan ortalyǵy Mýmbaı sanalatyn Maharashtra shtaty eń aldyńǵy orynda, odan keıin Tamılnad, úshinshi Delı shtaty COVID-19-ben aýrýdan aldyńǵy úshtikke kiripti. Álemdik statıstıka boıynsha Indııa adam ólimi tirkelýi jóninen 8-shi pozısııada.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.