Beınebaqylaý kameralary qalalyq polıseılerge táýlik boıy qylmyspen kúresýge, quqyq buzýshylyqtardyń jolyn kesýge jáne jol qaýipsizdigin qamtamasyz etýge kómektesedi. Polısııanyń 1300-den astam beınekamerasy oblys boıynsha kúndelikti qoǵamdyq qaýipsizdikti jáne jol qaýipsizdigin saqtaýǵa járdemdesip tur. Onyń negizgi bóligi - 410-y oblys ortalyǵynda ornatylǵan. Jedel basqarý ortalyǵynyń ınspektor-navıgatorlary olardyń kómegimen úsh aýysymda quqyqtyq tártipti baqylaıdy. Negizgi júkteme osylarǵa túsip, táýlik boıy ondaǵan quqyq buzýshylyqtar men qylmystar tirkeledi, dep habarlaıdy Egemen.kz.
Beınematerıaldar Polısııa departamentiniń serverlerinde 30 kún saqtalady. Kameradaǵy beınejazbalar jol-kólik oqıǵalary, kóshedegi tóbeles pen buzaqylyq faktileri boıynsha sotta qaralatyn isterdiń sońǵy núktesin qoıýǵa da septigin tıgizip jatady. SQO PD bastyǵynyń birinshi orynbasary, polısııa polkovnıgi Qanat Aıtbaevtyń aıtýyna qaraǵanda, jyl basynan 9092 ákimshilik quqyq buzýshylyq tirkelgen, onyń 6549-y jol júrisi erejeleriniń buzýshylyqtary. Sondaı-aq, kameralardyń kómegimen qylmystardy ashýǵa septigin tıgizgen 108 fakti anyqtalǵan.
Inspektor-navıgatorlardan basqa Jedel josparlaý ortalyǵynyń aýysymy quramynda «102» arnasynyń operatorlary kezekshilik etedi. Jyl basynan olar 83 254 qońyraý qabyldaǵan. Onyń ishinde jasalǵan qylmystar men oqıǵalar týraly azamattardan kelip túsken 16 393 habarlama boıynsha jyldam den qoıý qajet boldy.