Keshe elimizde Nur Otan praımerızi bastalǵany týraly habarlaǵan bolatynbyz. Halyqtyń baryn baǵamdap, joǵyn túgendeı biletin belsendi azamattardyń belin býýǵa negizdelgen bul partııaishilik tańdaýdyń tıimdi tetiginen kúterimiz kóp.
Sebebi bastaýysh partııanyń pármenin arttyryp, eldiń seniminen, halyqtyń údesinen shyǵa biletin talaby taý qoparalyq kóshbasshylar memleketke aýadaı qajet. Al Nur Otan partııasy usynǵan málimetke úńilsek, partııaǵa adal qyzmet etýge bel baılaǵan ondaı úmitkerlerdiń qatary kún sanap tolyǵyp keledi.
«Myqty lıderler – Myqty partııa» qaǵıdaty boıynsha naqty ári myqty kóshbasshylardy anyqtaý men olardy el isine tartýdy mindet etken bul bastama áıel azamattardyń da úlesin umyt qaldyrǵan joq. Praımerız ótkizýdiń erejesinde partııalyq tizimderde kem degende 30% áıelderdiń, kópbalaly analardyń bolýy aıtylǵan edi. Ereje eskerýsiz qalmaǵan tárizdi. Máselen, praımerız bastalǵan alǵashqy kúni-aq tirkeýge ótinish bildirgen úmitkerlerdiń sany 1000-nan asqan bolsa, sol 1000 kandıdattyń 336-sy áıel azamattar. Sonyń ishinde 20 kópbalaly ana bar. Sonymen qatar 35 jasqa deıingi 228 jastyń, erekshe qajettiligi bar 8 azamattyń esimin úmitkerler tiziminen kórýge bolady. Bastaýysh partııa uıymdarynan 322 adam usynylsa, 717 kandıdat ózin-ózi usyndy.
Eń bastysy, praımerız bastaýysh partııanyń qaıta jańǵyrýynyń nátıjesi bolatynyna úlken úmit artylýda. Bul týraly Elbasy Nursultan Nazarbaev praımerızdiń bastalýyna baılanysty Úndeýinde «Búkil elimiz boıynsha aýqymdy praımerız ótkizý bıliktegi partııanyń «qaıta jańǵyrýynyń» nətıjesi bolady. Bul – partııa ishilik saılaý. Bul shynaıy əleýmettik lıft. Qatań irikteý, jańa ıdeıalar men jobalardy izdeý. Bul ıdeıany kóptegen belgili saıasattanýshylar men qoǵam belsendileri qoldady. Bular belsendi azamattyq ustanymy bar, Nur Otan-dy qoldaýshylar lıgasyna birikken jəne reformalarǵa qatysýǵa daıyn adamdar. Biz partııa ishindegi ashyqtyq pen eseptilik úshin qajetti jaǵdaılardy jasadyq. Eń bastysy – ashyqtyq pen adaldyq, barlyq qatysýshylar úshin teń jaǵdaılar men bəsekelestik», dep aıryqsha atap ótken edi.
Básekelestik bar jerde belsendilik te, tabandy tartys ta bolady. Kandıdattar óz saılaýshylarynyń údesinen shyǵyp, halyqtyń artyp otyrǵan úmitin aqtaý úshin baryn salatyny belgili. Sondyqtan tuńǵysh ret respýblıkalyq partııaishilik saılaý aýqymynda ótetin praımerızge óz isine senimdi, jalyndy azamattar qatysady dep tarazylaımyz. Qazaqstannyń Tuńǵysh Prezıdentiniń bastamasymen qolǵa alynǵan «Senim. Dıalog. Bolashaqqa nyq qadam» – partııa jumysyn «qaıta jandandyrý» baǵdarlamasynyń qorytyndy kezeńderiniń biri sanalatyn praımerızdi Nur Otan partııasy Tóraǵasynyń birinshi orynbasary Baýyrjan Baıbek te aıryqsha nazarǵa alyp otyr.
Ol óziniń Facebook-tegi jeke paraqshasynda «Elbasy Nursultan Nazarbaev keshegi Úndeýinde atap ótkendeı, partııa óz isiniń sheberlerin, el taǵdyryna alańdaıtyn tulǵalardy, sheshim qabyldaı alatyn jáne konstrýktıvti usynystar jasaı alatyn jańa azamattardy bılikke usynatyn qaınar kóz bolýy tıis. Partııaishilik saılaýdyń ashyq ári ádil ótýine partııa tarapynan qajetti jaǵdaı jasalǵan. Bastysy – aıqyndyq pen tazalyqty, barlyq qatysýshylarǵa teń múmkindik pen básekelestikti qamtamasyz etý. Partııa Lıderi azamattardy tolǵandyryp júrgen kókeıkesti máselelerdiń ózara senim men syılastyq aıasynda kóteriletinine senim bildirdi. Kóterilgen máselelerdi partııa baqylaýǵa alýy tıis. Árbir aýdannyń, qalanyń, oblystyń saılaýaldy baǵdarlamasyna engizý úshin barlyq sheshimdi bıýdjettiń múmkindikterimen úılestire qarastyrý qajet», dep oqyrmandarymen oı bólisedi.
Onyń aıtýynsha, elimizdiń aldynda pandemııadan keıin ekonomıkalyq ósimdi qalpyna keltirý, jumys oryndaryn qurý, shaǵyn jáne orta bıznestiń jumysyn jandandyrý mindetteri tur. Sonymen birge pandemııamen kúres máselelerin taldap, onyń ekinshi tolqyny oryn alýy múmkin jaǵdaıǵa daıyndalý qajet. Munyń barlyǵy partııanyń saılaýaldy baǵdarlamasyna engizilip, nurotandyqtardyń aldaǵy 5 jylda atqaratyn is-áreketterine baǵyt-baǵdar bolady. «Taǵy da barlyq partııalyqtar men Nur Otan jaqtastaryn eldegi asa mańyzdy saıası dodaǵa belsendi qatysýǵa shaqyramyn!», dep jazady B.Baıbek.
Praımerız nátıjesi eń aldymen bastaýysh partııanyń aımaqtardaǵy fılıaldarynyń jumysyn jandandyrady degen senim bar. Elimiz boıynsha halyq barynsha tyǵyz qonystanǵan aımaq retinde Túrkistan oblysyn aıtýǵa bolar edi. Nur Otan partııasy Túrkistan oblystyq fılıaly tóraǵasynyń birinshi orynbasary Beısen Tájibaevtyń aıtýynsha, óńirde praımerızge daıyndyq talapqa saı júrgizilýde. Ol kadrlyq rezervte áıelderdiń úlesin kem degende 30, al jastardyń úlesin 20 paıyzǵa jetkizý bastamasy qoǵam tarapynan qoldaýǵa ıe bolǵanyn alǵa tartyp otyr. «Partııa Tóraǵasy, Elbasy N.Nazarbaevtyń «Senim. Dıalog. Bolashaqqa nyq qadam» atty partııa jumysyn júıeli jańǵyrtý baǵdarlamasyna sáıkes qolǵa alynǵan praımerızde áıelder men jastar qaýymyna da úlken múmkindik berilip otyr. Praımerızdiń alǵashqy kúni túrkistandyq jastardyń belsendiligi baıqaldy. Áli de qatysýǵa nıet bildirip jatqandary kóp. Biz osy azamattar arasynan elge janashyr, naǵyz patrıottardy iriktep alýymyz kerek», deıdi B.Tájibaev.
Ilgeri qadamnyń irikteýden bastalatynyn eskersek, praımerızge tirkelip, baby men baǵyn synap jatqan el azamattarynyń sany kún sanap artyp kele jatqany qýantady. El ıgiligi jolynda erinbeı eńbek etýge bel býǵan ondaı azamattarǵa saılaýshylary da tıisti qoldaýyn bildiredi degen senimdemiz.