Atyraý oblysy boıynsha Qylmystyq-atqarý júıesi departamenti baspasóz qyzmetiniń málimetinshe, ÝG-157/9 túzeý mekemesinen sottalǵan 10 adam aıyppul tólep, bostandyqqa shyqty, - dep habarlaıdy Egemen.kz.
Alǵashqylardyń qatarynda bostandyqqa shyqqandardyń biri – Dosbol Palýanov. О́zbekstannyń 28 jastaǵy azamaty 2019 jyly QR Qylmystyq Kodeksiniń 109-babymen (Densaýlyqqa qasaqana aýyr zııan keltirý) 3 jylǵa sottalǵan. Bıyl jazasynyń qalǵan merzimin aıyppulǵa aýystyryp, 1 mln teńgeden astam qarjy tólep, bostandyqqa shyǵyp otyr.
«Meniń Qaraqalpaqstanda turatyn anam men aǵam bar. Olardyń aı saıyn meniń amandyǵymdy bilý úshin kelýine shamasy bolmady. Sol sebepten, jylyna bir ret kelip turdy. Al, men aldymen Aqtaýda, keıin Atyraýda jaldamaly jumysshy boldym. Jumys istep júrgen kezde isti bolyp, sottaldym. Mekemede túzelý jolyna túsip, óz-ózime túrmege qaıta túspeýge ýáde berdim», -deıdi Dosbol Palýanov.
Onyń aıtýynsha, túrmede kitaphanadan qazaqsha kitaptar alyp, tilin jattyqtyrypty. Qazir qazaq tilin tolyq túsinedi. Qazaqsha sóıleı alady. Sporttyq, mádenı sharalarǵa jıi qatysyp, fýtbol oınaýdy úırengen. Endi ol oblystyq Polısııa departamentine qarasty kóshi-qon qyzmetine tirkeýge turady. Al, onyń isi Atyraý qalalyq ákimshilik sotyna jiberilip, 10 kúnniń ishinde elden shyǵarylady.
«Týǵan jerime oralamyn. О́z elimde úı salyp, úılenbek oıym bar. Qazaqstandaǵy jyldarym maǵan ómirlik sabaq boldy» deıdi ózbekstandyq Dosbol Palýanov.
Temir tordan bostandyqqa shyqqan taǵy bir azamat – aqtaýlyq Danııar. Jıyrma tórttegi jas jigit 2019 jyly QR Qylmystyq Kodeksiniń 194-babymen (Qorqytyp alý) 6 jylǵa bas bostandyǵynan aıyrylǵan. Endi jazasynyń qalǵan bóligin aıyppulǵa aýystyryp, bostandyqqa shyǵyp jatyr.
«Jastyqpen ot basyp, endi bostandyqqa shyǵyp otyrmyn. О́mirim alda ǵoı, sol sebepten, endi qatelik jasamaımyn dep oılaımyn. Mekemede birneshe ret sottalǵandardy kórip, olardyń ornyna ózimdi elestetip kórdim. О́te qorqynyshty»,-deıdi Danııar.
Bostandyqqa shyqqan azamattarǵa Atyraý qalalyq Probasııa qyzmeti men oblystyq Densaýlyq saqtaý basqarmasynyń ókilderi konsýltasııalyq qyzmet kórsetti. Sondaı-aq, túzeý mekemesiniń qyzmetkerleri olardy jeke qorǵanysh quraldarymen qamtamasyz etip, Dosboldy kóshi-qon qyzmetine, al, Danııardy Aqtaýǵa shyǵaryp saldy.
«Aıyppul tóleý arqyly bostandyqqa shyǵý – álemniń kóptegen elderinde burynnan qoldanylyp kele jatqan tásil. Mundaı tájirıbe kórshiles Reseıde de qoldanysqa engen. Biraq, halyq jazanyń ótelmegen bóligi úshin aıyppul tóleý degendi durys túsinbeı júr. Sol sebepten, «sottalǵandar aqsha tólep, túzeý mekemelerinen shyǵyp jatyr» degen qate túsinik qalyptasqan. Negizinde olaı emes. Bul – zańmen, sotpen qaralǵan jazanyń ótelmegen bóligin neǵurlym jeńil jaza túrine aýystyrý. Basqasha aıtqanda, shartty túrde merziminen buryn bosatý. Bul úshin jazasyn ótegen kezde sottalýshynyń ózin-ózi jaqsy jaǵynan kórsetýi de, tártibi de eskeriledi. Kez kelgen jazasyn óteýshiniń aıyppul tólep, erkindikke shyǵýǵa quqyǵy joq. Jazalaý merziminiń belgili bir bóligi ótelgennen keıin túrme basshylyǵy minezdeme berip, sotta aıypkerdiń túzelgeni, qaıtadan zań buzý áreketine barmaıtyny dáleldenip, barlyq sot shyǵyny tólengennen keıin ǵana bas bostandyǵyn berý týraly sheshim shyǵarylady. Bul sheshim shyqqanǵa deıin qylmys jasaǵandar mekemede jazasyn óteı beredi» -deıdi ÝG-157/9 mekemesiniń bastyǵy Dýman Tajenov.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.