Karantın rejimi jumsartylǵanymen ony saqtaýdyń jeńildetilgen talaptary áli de kúshinde. Ol týraly halyqqa keńinen taratylǵanymen saqtamaıtyndar kóbeıip barady.
Barlyq quqyq qorǵaý organdary, onyń ishinde prokýratýra da bul iske belsendi qatysyp, azamattardyń karantın talabyn saqtaýyn baqylap otyrady. Jýyrda Petropavl qalasy prokýrorynyń orynbasary Qaısar Ábishev óz vedomstvosy reıdteriniń barysymen tanystyrdy. «Reıdtik is-sharalarmen 364 nysan, túrli qyzmet túrleri (qoǵamdyq tamaqtaný obektileri, kólik, meıramhanalar, bazarlar, saýda úıleri, dúkender, demalys aımaqtary, keshendi monsha obektileri) qamtyldy. Barlyǵy boıynsha 287 buzýshylyq anyqtaldy. Onyń ishinde: qoǵamdyq tamaqtaný obektileri (dámhana, toıhana, ashana) - 13 buzýshylyq; úılený toıy - 1 is-shara ( 2 kináli adam); shaǵyn avtobýstar men taksıler – 18 buzýshylyq; sebepsiz júrý - 36 buzýshylyq; bazarlar, saýda úıleri – 8 buzýshylyq; dárihana - 2 buzýshylyq; monsha - 1 buzýshylyq; demalys aımaqtary - 3, lotereıa klýbtary – 1, dúkender – 37 buzýshylyq; páter bıýrosy-1 buzýshylyq; otbasylyq is-sharany uıymdastyrý, onyń ishinde demalys aımaqtarynda – 8. Sondaı-aq betperdesiz kóshede bolý nemese betperdeni durys taqpaý boıynsha – 99 adam jazalandy», dedi ol.
Sonymen qatar keıbir nysandarda sanıtaızerlerdiń, betperdeler men qolǵaptardyń bolmaýy, kásiporyn qyzmetkerlerinde temperatýrany ólsheýdi baqylaý júrgizilmegeni 37 jerde anyqtalǵan.
Oblystyq bas memlekettik dárigeriniń qaýlysyna sáıkes oıyn-saýyq, sporttyq is-sharalar, kórmeler uıymdastyrý, forýmdar men konferensııalar, sondaı-aq otbasylyq estelik is-sharalar (banketter, úılený toılary, mereıtoılar, eske alý) ótkizýge tyıym salý belgilengen. Soǵan qaramaı reıdtik is-sharalar barysynda "Vostochnyı bereg" kafesiniń janynda 16-23 jas aralyǵyndaǵy betperdesiz jastar toby, onyń ishinde 11 eresek jáne 5 kámeletke tolmaǵandar toılap jatqandyǵy anyqtalǵan. Qazir materıaldar jınalyp, karantın rejimin buzǵanyna baılanysty jaýapkershilikke tartý úshin ýákiletti organǵa jiberilgen.
Sóziniń sońynda Q.Ábishev turǵyndardan karantındik rejimdi buzý faktileri anyqtalǵan jaǵdaıda 109 nemese oblys prokýratýrasynyń kezekshisine 36-03-83 telefon nómirine habarlasýdy surady.