Úndistandaǵy indettiń taralý qarqyny kúsheıip tur. Aınaldyrǵan eki aptanyń ishinde COVID-19 juqtyrǵandar sany 1 mıllıonǵa ósken.
Onsyz da kedeıi kóp túbek turǵyndary indet qyrsyǵynan arylar emes. 23 tamyzda Úndistannyń densaýlyq saqtaý jáne otbasy ál-aýqaty mınıstrligi bir táýlikte 912 adam ajal qushyp, jalpy qaıtys bolǵandardyń sany 56 706-ǵa jetkenin málimdedi.
Elde kúndelikti 65-70 myń shamasynda vırýs juqtyrǵandardyń tirkelýi epıdemııalyq ahýal boıynsha aldyńǵy qatardaǵy AQSh pen Brazılııanyń kórsetkishin qosqanmen birdeı bolyp tur. Bul qarqyn báseńdemese, Úndistan jalpy indettiń taralýy jóninen kósh bastaýy múmkin.
* * *
Germanııadaǵy federaldy aımaq – Soltústik Reın-Vestfalııa úkimetiniń premer-mınıstri Armın Lashet jyl saıyn ótkiziletin dástúrli karnavaldyń bıyl bolmaǵanyn durys dep esepteıdi.
«Karnavaldyq assosıasııalarmen birge osyndaı uıǵarymǵa kelip otyrmyz. Sebebi 11 qarashada dástúr boıynsha halyq oıyn-saýyq qýyp, dalaǵa lap qoısa, COVID-19-dyń qarmaǵyna el bolyp túsip, saldarynan es jııa almaı qalýymyz múmkin», deıdi A.Lashet WDR telearnasyna bergen suhbatynda.
Atalǵan másele boıynsha naqty sheshim 2-3 aptanyń ishinde qabyldanbaq. Buǵan deıin Germanııada jazdyń kúni toılanatyn dástúrli «Mergender merekesine» tyıym salyndy.
* * *
AQSh-tyń Densaýlyq saqtaý mınıstrligine qarasty dári-dármek sapasyn qadaǵalaý basqarmasy (FDA) indet juqtyryp, jazylǵandardyń qan plazmasyn COVID-19-ǵa qarsy emge paıdalaný jóninde shuǵyl ruqsat berdi.
CNN agenttiginiń habarlaýynsha, Aq úı basshysy Donald Tramp plazmanyń yqtımal qaýpinen emdik artyqshylyǵy áldeqaıda basym ekenin atap ótken. «Men búgin koronavırýspen kúres boıynsha tarıhı málimdeme jasap, qýanyp turmyn. Bul – sansyz adamdy ajal tyrnaǵynan qutqaratyn shara», deıdi D.Tramp.
Dári-dármektiń sapasyn qadaǵalaý basqarmasy plazmaǵa qatysty klınıkalyq zertteýlerdiń tolyq aıaqtalmaǵanyna qaramastan, onyń 70 myń pasıentti emdeýde qoldanylyp, oń nátıje kórsetkenine qaraı sheshim qabyldanǵanyn málimdegen.
* * *
AQSh-ta keıbir teńiz sútqorektileri men joıylyp ketý qaýpi bar prımattardyń COVID-19-ǵa shaldyǵýy jaıyndaǵy zertteýler jaryq kórdi.
Kalıfornııalyq ǵalymdar Proceedings of the National Academy of Sciences basylymynda adamdar men túrli janýarlardyń genomdyq taldamalar arqyly vırýstyń jasýshalyq reseptorlaryna jasaǵan zertteýleri boıynsha maqala jarııalaǵan. Onda adamdardyń muryn jáne aýyz qýystary men ókpede jáne kóptegen jasýshalarynda bolatyn ACE2 angıotenzın konversııasyndaǵy 25 amınqyshqylynyń aralasýymen aǵzaǵa ótetin vırýstyń janýarlarǵa da áser etetini jaıly jazylǵan.
Ǵalymdar COVID-19 endi aǵzasynda osyndaı tizbek túzetin janýarlar ómirine de qaýip tónip tur dep esepteıdi.
Daıyndaǵan
Anar TО́LEÝHANQYZY,
«Egemen Qazaqstan»