Áleýmetti shýlatqan Álı Oqapov otaý tigip, ánshi Tóreǵalı Tóráliniń qaryndasynyń uzatý toıy ótti» degen aqparat «juldyzdy otbasylardyń» saltanatty rásimde túsken sýretteri jáne beınebaıanymen qosa jelini sharlap ketti.
El ishi indetpen kúresip, «malym – janymnyń sadaǵasy» dep jatqan kezeńde tanymal ártisterdiń munysy nesi degen jurtshylyq áliptiń artyn baǵyp, alańdasqan. Bul aqparat resmı organdardyń nazaryna iligip, tekserý amaldary júrgizilgeni belgili.
Tanymal shoý-bıznes ókilderiniń otbasyna qatysty aqparatqa oraı Densaýlyq saqtaý mınıstrliginiń resmı ókili B.Qojahmetov máseleniń mınıstr A.Soıdyń baqylaýyna alynǵanyn ári Almatynyń bas sanıtar dárigeri J.Bekshınge de arnaıy habarlanǵanyn aıtqan bolatyn. Máseleniń mánisin bilmek maqsatta Almatynyń bas sanıtar dárigerine de habarlastyq. Saýaldarymyzǵa oraı Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıtetiniń resmı ókili jaýap beredi degennen keıin Erjan Baıtanaevtan da jaýap kúttik. Biraq saýalymyzǵa ázirge naqty jaýap joq.
Áleýmettik jelide taraǵan aqparatty tekserý jáne naqty sanıtarlyq normalardyń buzylǵanyn anyqtaý maqsatynda Almaty qalasy Polısııa departamenttiń resmı ókili S.Ázirbek áleýmettik jelide taraǵan derekke baılanysty polısııa aqparat jınap, tıisti organdarǵa ótkizgenin málimdedi. Anyqtalǵan málimetter boıynsha ýchaskelik ınspektorlar jınaǵan materıaldardy tıisti organdar qarastyrǵannan keıin Ákimshilik kodekstiń 425-babyna sáıkes sheshim qabyldanady.
Desek te, halyq ártisi Roza Rymbaevanyń ózinen máseleniń mán-jaıyn uǵý úshin telefon soqqanymyzda, áleýmettik jelidegi sýretter kelinge syrǵa salý rásimine baılanysty ekendigin estidik. «Otbasy músheleri ǵana qatysqan syrǵa salý rásimin dabyradaı toı ótkizdi» degizip, jelide shýlatqan blogerlerge renishin bildirgen Roza Qýanyshqyzy Qazaqstannyń azamaty retinde el ishinde belgilengen karantın rejimindegi tártip barshaǵa ortaq ekendigine toqtaldy. Sondyqtan da jalpyǵa ortaq talaptardy saqtaı otyryp, toıdyń negizgi joralǵysyn el ishi tynyshtalyp, indettiń beti aýlaq ketkennen keıin, elimiz mamyrajaı tirshiligine qaıta oralǵanda ǵana jaqyndarmen atap ótermiz degen oıyn ortaǵa saldy.
Al uzatylǵan Farıza Tóráliniń otbasymen sóılesýdiń sáti túspedi. Ánshi Tóreǵalı Tóráliniń kómekshileri otbasynyń resmı aqparat bermeıtinin jetkizdi.
Budan buryn málim bolǵanyndaı, Ádilet mınıstrligi tarapynan karantın tártibin saqtamaı toı jasaǵandardyń jazalanatyndyǵy eskertilgen edi. Mundaı jaǵdaıda tıisti zań babyna sáıkes, alǵashqy jaǵdaıda aıyptalýshyǵa 83 myń teńge kóleminde aıyppul salynady. Eger mundaı sharalardyń barysynda azamattar jappaı vırýs juqtyrsa, aıyppuldyń da kólemi aıtarlyqtaı kóp bolady. Al oqıǵanyń saldary jaǵymsyz jaǵdaıǵa aparsa, qylmystyq is te qozǵalýy yqtımal.
Koronavırýs ınfeksııasynan qorǵanýdyń basty talaby – oqshaýlaný men jeke bas gıgenasyn saqtaý ekendigin eskeretin bolsaq, jurtshylyq kóp shoǵyrlanǵan aýmaqtarda sanıtarlyq-epıdemııalyq erejelerdi qatań saqtaý mindetti. Elimizde blok-beketter alynyp, dámhana men meıramhanalar ashylǵannan keıin de toı-tomalaq ótkizýge ruqsat berilmeıtindigin elimizdiń bas sanıtar dárigeri A.Esmaǵambetova da málimdegen bolatyn. Onda otbasylyq sharalardy ótkizýge tyıym salynǵandyǵyn jetkizip, dámhana-meıramhanalarǵa, tipti 20-30 adam da shaqyrýǵa ruqsat bolmaıtynyn atap ótken-di. Qatań talaptar karantınniń ekinshi kezeńinde jeńildegenimen de, jappaı ujymdyq sharalardy ótkizýge bolmaıtyndyǵy taǵy da eskertildi. Elimizdiń bas sanıtar dárigeri sonymen birge eldegi epıdemııalyq jaǵdaı toı-tomalaq, dinı jáne otbasylyq sharalardy ótkizýge múmkindik bermeıtinin de atap ótken bolatyn.
Alaıda toıqumarlarǵa toqtam bolmaı tur. Almaty qalasy Polısııa departamenti tıisti qoǵamdyq tártipti saqtaý, qalanyń segiz aýdanynda kóshede jáne qoǵamdyq oryndarda quqyq buzýshylyq pen qylmystyń ýaqtyly aldyn alý jáne jolyn kesý maqsatynda aǵymdaǵy jyldyń 25-27 tamyz kúnderi «Quqyq tártibi» jedel aldyn alý is-sharasyn qolǵa aldy. «Quqyq tártibi» aldyn alý is-sharasyna barlyq aýdandardyń polısııa qyzmetkerleri, Ulttyq ulannyń áskerı qyzmetshileri, sondaı-aq polısııanyń qoǵamdyq kómekshileri jumyldyrylǵan. Kúndiz de, túnde de patrýldik baǵyttar jumys isteıdi. Jedel aldyn alý is-sharasynyń mindetteri – esepte turǵan adamdardy tekserý, zańsyz páter jaldap turǵan adamdardy anyqtaý, qarý ıelerin tekserýdi maqsat etedi. Departamenttiń taıaýdaǵy aqparatyna júginsek, arnaıy monıtorıng toby 3423 adamdy ákimshilik jaýapqa tartyp, reıd kezinde birqatar zańsyz istegen nysandardy anyqtaǵan. Onyń ishinde 5 saýna, 7 túngi klýby, 32 kafe, 17 meıramhana, 12 massaj bólmesi jáne 7 karaoke klýby bar. Qazirgi kezde olardyń ıelerine qatysty ákimshilik kodeks boıynsha 236 aılyq eseptik kórsetkish retinde 39 mln teńge aıyppul salynǵan.
Búginde mundaı derekter Almaty ǵana emes, elimizdiń basqa da óńirlerinde anyqtalyp, jasyryn toı ótkizip jatqandardyń áreketi áshkere bolýda. Túrkistan oblysynda karantınde jasyryn jasalǵan 12 toı toqtatylyp, toı ótkizgenderge 30 aılyq eseptik kórsetkish kóleminde aıyppul salynsa, Qyzylorda oblysynda da 13 jeke tulǵa ákimshilik jaýapqa tartylǵany belgili. Mundaı derekter Petropavl qalasy men Batys Qazaqstan, t.b. birqatar óńirde de tirkeldi.
Memleket basshysy atap ótkenindeı, halqymyzdyń taǵdyry tarıh tarazysynda turǵan sátte, toı toılap júretin ýaqyt emes. Biraq tyıym-shekteýlerdi elemeı júrgenderdi el men jurttyń jaıy tolǵandyra qoımaıtyn tárizdi. Irgemizden indettiń aýyly áli alystaǵan joq. Álem ábigerge túsip álek. Biraq karantınniń kelesi kezeńi kelgenshe toı jasap alaıyq dep júgirgen jurtqa toqtam bolmaı tur.