Búgin Almaty qalasynyń ákimi Baqytjan Saǵyntaevtyń tóraǵalyǵymen, Almatynyń bilim berý salasynyń qyzmetkerleriniń "Almatynyń bilim berý bolashaǵy: jańa kezeńdegi perspektıvalyq sheshimder" forýmy bastaldy.
2019-2020 oqý jylynda karantın rejimine qaramastan, almatylyq oqýshylar ártúrli halyqaralyq, respýblıkalyq olımpıadalar men konkýrstardan 28 altyn, 75 kúmis, 96 qola medal jeńip aldy. Ákimniń tapsyrmasy boıynsha balalardy qoldaýǵa, olardyń talanttary men qabiletterin damytýǵa baǵyttalǵan keshendi sharalar júzege asyrylýda.
Forým barysynda Bilim basqarmasynyń basshysy Lázzat Jylqybaeva, Almatyda daryndy balalar men talantty jastardy anyqtaıtyn, qoldaıtyn "Almaty daryny" ortalyǵy qurylatynyn habarlady.
"Jańa oqý jylynda "Almaty daryny" ortalyǵy óz jumysyn bastaıdy. Ortalyq qyzmetiniń baǵyty - balalarmen tárbıe jumysyn jetildirý bolady. Sonymen qatar, oqytýdyń tárbıelik aspektisin kúsheıtý maqsatynda, 2019-2024 jyldarǵa arnalǵan "El jastary" balalar men jastardy tárbıeleýdiń Almaty óńirlik baǵdarlamasyn iske asyrý jumysy jandandyrylady", - dep atap ótti L.Jylqybaeva.
Basqarma basshysynyń aıtýynsha, qashyqtan jumys isteý jaǵdaıynda balalarǵa shyǵarmashylyq jaǵynan ózin-ózi damytýǵa múmkindik beriledi. Osyǵan baılanysty qosymsha bilim berý uıymdarynyń qyzmetine, tárbıelik mańyzy bar onlaın is-sharalardy ótkizýge kóp kóńil bólinedi.
"Jańa oqý jylynda kúsheıtilgen tárbıe jumysyna, onyń sapasy men tıimdiligin arttyrýǵa erekshe kóńil bólinedi", - dedi ol.
Esterińizge sala keteıik, Memleket Basshysy Qasym-Jomart Toqaev óz Joldaýynda az qamtylǵan jáne kóp balaly otbasylardan shyqqan daryndy balalardy qoldaý boıynsha Jol kartasyn ázirleýdi tapsyrǵan bolatyn. Úkimet basshylary men ákimder mundaı balalarǵa, úıirmelerge, ortalyqtar men jazǵy lagerlerge barýǵa múmkindik berýi tıis.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.