Shymkent qalasynda "Nurly jer" memlekettik baǵdarlamasy aıasynda jyl sońynda 104 kópqabatty turǵyn úı paıdalanýǵa beriledi. Osylaısha 5800 otbasy baspanaly bolady. Úılerdiń basym kópshiligi negizinen ákimshilik-iskerlik ortalyǵynda, "Shymkent sıtı" men "Turan" shaǵyn aýdandarynda boı kóterýde, dep habarlaıdy Egemen.kz
Tapsyrlatyn úılerdiń 59-y ıaǵnı, 3732 páter bıýdjet esebinen salynyp jatsa, jalpy 1157 páter bolatyn 26 úı "Shymkent" ÁKK" AQ arqyly, al jeke salýshylar esebinen 19 úı ol 911 páter.
Shymkent qalasynyń ákimi Murat Áıtenov atalǵan nysandardyń sapaly jáne ýaqtyly aıaqtalýyn baqylaý maqsatynda salynyp jatqan turǵyn úılerdiń qurylys barysymen tanysty.
Turǵyndar tarapynan sapaǵa qatysty kóptegen shaǵymdar kelip túsetinin aıtqan qala basshysy qurylys kompanııalary birinshi kezekte sapaǵa mán berý kerek ekenin aıtty.
"Eń basty talap – sapa. Biz turǵyn úı salýshylarǵa árdaıym qoldaý kórsetemiz. Sizder taraptan sapaly jumys istelinýi kerek. Árıne, qurylys jumystarynyń qala ekonomıkasyna qosar úlesi mol. Qalaǵa keletin ınvestorlar da aldymen qurylys barysyna mán beredi", dedi qala ákimi.
Sonymen qatar, ákim salynyp jatqan baspanalar áýeli kópbalaly, turmysy tómen otbasylarǵa jáne jumys isteıtin jastarǵa beriletinin atap ótti.
Aıta keteıik, jalpy Shymkent qalasynda "Nurly jer" memlekettik baǵdarlamasy aıasynda jáne "7-20-25" baǵdarlamasymen, barlyq qarjy kózderi esebinen 14 224 páterli 262 kópqabatty turǵyn úıdiń qurylysy júrgizilýde.