Osydan dál 45 jyl buryn, ıaǵnı 1975 jyldyń 11-14 qyrkúıegi kúnderi sol kezderi Keńes Odaǵynyń quramynda bolǵan Belarýstyń bas shahary – Mınskide kúres túrlerinen álem chempıonatynyń jalaýy jelbiredi. Aıtýly jarys jaıynda biz beker áńgimelep otyrǵan joqpyz. Sebebi klassıkalyq kúresten ótken dodada Qazaqstannyń úsh birdeı óreni óner kórsetip, barlyǵy da jeńis tuǵyrynyń eń bıik satysyna kóterildi. Osylaısha otandyq kúres mektebiniń túlekteri KSRO-nyń basty dodasynda buryn-sońdy bolmaǵan orasan zor nátıjege qol jetkizdi.
Mınskide 90 kılo salmaqtaǵy Valerıı Rezansevtiń qarqynyna eshkim shydamady. Vadım Psarevtaı maıtalman mamannyń qol astynda jattyqqan 29 jastaǵy almatylyq balýan barlyq qarsylastaryn tas-talqan etip, fınalda álem chempıonatynyń eki dúrkin kúmis jáne qola júldegeri, Eýropa chempıony Stoıan Nıkolovty san soqtyrdy. Sóıtip ol qatarynan besinshi ret tórtkúl dúnıeniń teńdessizi dep tanyldy. Bul – rekordtyq kórsetkish! Oǵan deıin keıipkerimiz Edmontonda (1970), Sofııada (1971), Tegeranda (1973) jáne Katovısede (1975) qarsylas shaq keltirmegen edi. Sol jarystardyń úsheýinde ol esimi joǵaryda atalǵan bolgarııalyq balýannan basym tústi. V.Rezansevtiń rekordyn uzaq ýaqytqa deıin eshkim buza almady. Tek arada 20 jyl ótkennen keıin ǵana osy nátıjeni reseılik Aleksandr Karelın jańartty. «Orys aıýy» atanǵan apaıtós 1995 jyly álem chempıonatynda óziniń altynshy altynyn oljalady.
Taǵy bir aıta keterlik jaıt, 1976 jyly Monrealda alaýy tutanǵan Olımpııa oıyndarynyń sheshýshi synynda V.Rezansev dál osy S.Nıkolovtan aılasyn asyryp, «máńgi tozbas» ataqqa ekinshi márte qol jetkizgeni de jankúıerlerdiń jadynda.
82 kılo salmaq dárejesinde beldesken Anatolıı Nazarenko úshinshi ret álem chempıony atandy. Ol da Vadım Psarevtiń shákirti. Almatynyń tól týmasy Edmonton men Katovısede top jarsa, Sofııada kúmispen kúpteldi. Mınskide 26 jastaǵy Anatolıı aldyna jan salmady. Qazaqstandyq sportshy aqtyq aıqasta rýmynııalyq Ion Enakeni eńserdi. Jalpy, A.Nazarenkonyń joǵarydaǵy tabystarynan bólek, Mıýnhen Olımpıadasynyń kúmis júldegeri jáne Eýropanyń eki dúrkin chempıony degen ataqtary taǵy bar.
74 kılo salmaqta 22 jastaǵy Anatolıı Bykovtyń baq juldyzy jarqyraı jandy. Bilikti bapker Vıktor Ermakovtan tálim-tárbıe alǵan ol sol jyly ǵana Almatyda ótken KSRO chempıonatynda bas júldeni oljalap, dúnıejúzilik dodada óner kórsetý qurmetine bólengen edi. Jer-jahannyń myqtylary jınalǵan jarysta jas jigit el senimin aqtady. Belarýstyń astanasynda barlyq básekelesinen basym túsken Anatolıı altyn tuǵyrdan qol bulǵady. Fınalda ol bolgarııalyq Iаnko Shopovty shań qaptyrdy. A.Bykovtyń odan keıingi júrip ótken joly da jarqyn jeńisterge toly boldy. Jerlesimiz 1976 jyly Monreal Olımpıadasynda altyn alsa, 1980 jyly Máskeýde kúmiske qol sozdy. 1978 jylǵy Sofııadaǵy álem birinshiligin ekinshi orynmen qorytyndylady.
Qazaqstan sportynyń dańqyn asqaqtatqan aıtýly balýandardyń barlyǵy da qazirgi kezde jyraqta ómir súrip jatyr. Atap aıtsaq, 73 jastaǵy Valerıı Rezansev – Reseıde, 71 jastaǵy Anatolıı Nazarenko AQSh-ta, al 67 jastaǵy Anatolıı Bykov Kanadada ǵumyr keshýde.
Mınskide jalaýy jelbirgen jarysta klassıkalyq kúresten 10 salmaq dárejesi boıynsha beldesýler ótti. Sonyń segizinde KSRO qurama komandasynyń músheleri bas júldeni oljalady. Joǵaryda esimderi atalǵan balýandardan bólek, novosibirlik Vladımır Zýbkov (48 kılo), ýlıanovskilik Vıtalıı Konstantınov (52 kılo), nıjnıınovgorodtyq Fargat Mustafın (57 kılo), ázerbaıjandyq Nelson Davıdıan (62 kılo) jáne týlalyq Shámil Hısamýtdınov (68 kılo) syndy sańlaqtar aldaryna jan salmady. Al ózge eki salmaqta Bolgarııanyń qos batyry – Kamen Goranov (100 kılo) pen Aleksandr Tomov (+100 kılo) top jardy.
Dál sol kúnderi Mınskide erkin kúres sheberleri de álem chempıonatynyń júldelerin sarapqa saldy. Bul jarysta da KSRO quramasy komandalyq esepte kósh bastady. Tarqatyp aıtsaq, Pavel Pınıgın (68 kılo), Rýslan Ashýralıev (74 kılo), Levan Tedıashvılı (90 kılo) jáne Soslan Andıev (+100 kılo) oza shapty. Japonııanyń jigitteri qos altyndy qorjynǵa saldy. Olar – Iýdzı Takada (52 kılo) men Masao Araı (57 kılo). Mońǵolııanyń da nátıjesi dál sondaı. Bul eldiń órenderi arasynda Zevegıın Oıdov (62 kılo) pen Horloogıın Baıanmuńhtyń (100 kılo) mereıleri ústem boldy. Sondaı-aq bolgarııalyq Hasan Isaev (48 kılo) pen germanııalyq Adolf Zeger (82 kılo) álem chempıony atandy.