Almaty – salamatty ómir saltyn ustanatyndar úshin qolaıly qala. Sebebi tabıǵaty ásem shahardyń sport súıer turǵyndaryna barlyq jaǵdaı jasalǵan. Birer kún buryn megapolıstiń Jetisý aýdanynda «Aınabulaq» jekpe-jek ortalyǵy ashyldy.
Ashyq alańqaıdaǵy jattyǵý zaly atshaptyrym aýmaqty alyp jatyr. Qaýipti indettiń taralmaýy úshin tıisti sharalar barynsha qolǵa alynǵan. Munda kásibı sportshylarmen qatar áýesqoı azamattar da jattyǵý jasaı alady. Bes júz adamǵa laıyqtalǵan maýsymdyq keshen demeýshilerdiń kómegimen salynyp otyr. Dese de pandemııa jaǵdaıyna baılanysty kelýshiler shaǵyn toptarǵa bólingen. Jattyǵý alańynyń jumysymen tanysýǵa kelgen qala ákimi taıaý kúnderi atalǵan aýdanda dál osyndaı úsh ortalyq iske qosylatynyn málimdedi.
– Basty mindet – óskeleń urpaqty sportpen, shyǵarmashylyqpen jappaı qamtý, ózin-ózi tárbıeleý men damytý daǵdylaryn qalyptastyrý. Qyrkúıek aıynda taǵy úsh jattyǵý ortalyǵy Qulager, Kókmaısa jáne Kókjıek shaǵyn aýdandarynda ashylatyn bolady. Sonymen qatar aýdannyń bes shaǵyn ýchaskesinde balalarǵa arnalǵan JetisyFootball tegin oqytý baǵdarlamasy jumysyn bastaıdy. Ol qıyn jaǵdaıda qalǵan januıalardan shyqqan 300 balany qamtymaq. Al jattyqtyrýshylar qalalyq jumyspen qamtý ortalyǵy arqyly tartyldy, – deıdi Almaty qalasynyń ákimi Baqytjan Saǵyntaev.
Jaýapty mamandar Jetisý aýdanynyń Aınabulaq-2, Qulager jáne Kemel shaǵyn aýdandarynda deneshynyqtyrý-saýyqtyrý keshenderiniń qurylysyna qujattama ázirlenip jatqanyn aıtty. Nysandardy bos jerlerge salý josparlanýda.
ALMATY