1 qyrkúıek kúni elimizde sýǵa shomylý maýsymy resmı aıaqtaldy. Bul týraly Egemen.kz IIM TJ komıtetine silteme jasap habarlaıdy.
"Sýda adamdardyń qaýipsizdigin qamtamasyz etý maqsatynda, TJK polısııamen jáne jergilikti atqarýshy organdarymen birlesip uıymdastyrýshylyq, praktıkalyq is-sharalar keshenin júrgizdi. Kún saıyn azamattyq qorǵaý organdary men polısııa qyzmetkerleriniń qatysýymen reıdter men patrýldeý júzege asyryldy. Osy jyldyń basynan beri elimizdiń sý aıdyndarynda qutqarýshylar 160 adamdy, onyń ishinde 35 balany qutqardy. Al, sýǵa shomylý maýsymy bastalǵannan beri 140 adam, onyń ishinde 27 bala qutqaryldy", - delingen habarlamada.
Sonymen qatar, habarlamada sýǵa shomylý kezeńiniń basynan bastap óz kúshterin baǵalamaý sebepteri boıynsha, sýǵa shomylý kezinde alkogoldik mas kúıinde, sýǵa batýshyny qutqarý jáne balalardy eresekterdiń qaraýynsyz qaldyrý kezinde 239 adam (2019 jyly 282), onyń ishinde 75 bala (2019 jyly 88 bala) sýǵa ketip, kóz jumǵany aıtylǵan.
"Tek sýǵa shomylý maýsymynyń sońǵy aptasynda (24-31 tamyz aralyǵynda) Almaty, Aqtóbe, Qostanaı, Aqmola, Jambyl, Pavlodar, Shyǵys Qazaqstan, Qyzylorda oblystarynda, Shymkent qalasynda 14 adam, onyń ishinde 3 bala sýǵa batyp, kóz jumdy. Sýǵa shomylý maýsymynda Almaty - 35, Shyǵys Qazaqstan – 31, Túrkistan - 23 oblystarynda sýǵa batyp ketken adamdardyń sany kóp boldy", - dedi komıtettegiler.
TJ komıtetiniń málimetine sáıkes, elimizde sýǵa shomylýǵa ruqsat etilgen 445 oryn anyqtaldy, 6 020 eskertý belgisi ornatyldy. Adamdardyń sý aıdyndaryndaǵy qaýipsizdigin qamtamasyz etý úshin jeke jaǵajaılardyń 689 qutqarýshy-jasaqshysy oqytylǵan. Polısııa departamenti men volonterlik uıymdarmen birigip qoǵamdyq oryndardaǵy júris-turys jáne sý aıdyndarynda qaýipsizdik qaǵıdalaryn buzýshylardy anyqtaý boıynsha birlesken reıdter men patrýldeý júrgizilgen.
"1 maýsymnan bastap 33 myń reıd jáne patrýldeý júrgizildi, 6 355 adam ákimshilik jaýapkershilikke tartyldy, «Qoǵamdyq oryndarda bolý qaǵıdalaryn buzý» ÁQBK 440-baby jáne «Ortaq sý paıdalaný qaǵıdalaryn buzý» 364-baby boıynsha 14 mln. astam teńge aıyppul salyndy. Reıd is-sharalary barysynda sý aıdyndaryndaǵy qaýipsizdik sharalary boıynsha halyqpen túsindirý jumystary júrgizildi, úgit-nasıhattaý ónimderi (paraqshalar, jadnamalar) taratylady. Barlyǵy 499 564 myń ónim taratyldy", - delingen habarlamada.