Naǵashybaı Barlybaevtyń esimi soltústikqazaqstandyqtarǵa jaqsy tanys. Ol alymdy azamat, ata-teginen iskerlikke beıim jan. Sábıt Muqanovtyń «О́mir mektebi» trılogııasynyń ekinshi tomyndaǵy «Mıllıonerdiń aýylynda» degen taraý onyń atasy Áltıge arnalǵan.
Áltı shyn máninde qazaqtan shyqqan alǵashqy mıllıonerlerdiń biri. Ol dúnıe jıyp, aqsha qorlaǵan óz zamanynyń ozyq oıly tulǵasy. Qazirgi Reseıdiń Qorǵan qalasynda ashylǵan alǵashqy aksıonerlik bankterdiń biriniń iri aksıoneri de bolǵan eken. Qytaıǵa, Hıýa men Buqaraǵa, Reseıdiń alys-jaqyn qalalaryna saýda kerýenderin júrgizgen alymdy kópes. Ol tárkileýge ilikpeı, keńestik tepkini kórmeı, óz dáýreniniń sońǵy alyptarynyń biri bolyp ómirden ótken. Biraq bolshevıkter qýǵynyn onyń balalary kóredi. Ol týraly áńgime basqa.
Naǵashybaı Sabyruly ákeleri ata qonystan aıyrylyp, qýǵynda júrip qonys qylǵan Reseıdiń ormandy túkpirleriniń birinde ómirge kelgen. Atadan balaǵa juqqan yrystyń, eńbekqorlyqtyń arqasynda Sabyr aqsaqal barlyq on bes balasyn da aıaqtandyryp, bárine de joǵary bilim ápergen.
Naǵashybaı da Petropavldyń pedınstıtýtyn geografııa mamandyǵy boıynsha bitiredi. Alaıda bul mamandyq jermen baılanysty bolmaǵandyqtan, syrttaı oqyp, aýyl sharýashylyǵy mamandyǵyn ıgergen. Keńes Odaǵynyń sońǵy jyldarynda ol da aǵalary qusap keńshardyń dırektory boldy. О́ziniń aldyndaǵy tórt aǵasy: Nurmaǵambet, Aımaǵambet, Esmaǵambet, Baımaǵambetter de dırektor bolyp, «Bir otbasynan shyqqan bes dırektor» dep kezinde «Egemenge» jazǵan bolatynbyz.
Qazir Naǵashybaı Barlybaev «Arqalyq» sharýa qojalyǵyn basqaryp, sharýasyn dóńgeletip, barlyǵy 550 tuıaq jylqy ósirip otyr. Sonyń ishindegi 90 bıeni saýǵyzyp, táýligine 600 lıtrdeı qymyz satady. Qazaqtyń barlyq ádis-tásilin saqtaǵan qymyzy qandaı! Betine sarymaıy shyǵatyn qymyzy baldaı. Saýmal quıǵannan keıin barlyq kúbiler mehanıkalyq quraldarmen pisiledi. Onyń bári tek qaıyńnan jasalǵan.
Toqsan bıeni saýatyn bıeshiler sany tórt-aq adam. Bıeler saýatyn aranǵa jem ıiskeıtin bolǵan soń esik ashylǵanda ózdiginen kirip, tura qalady. Kileń sútti, jalpaq saýyrly, jelinderi tolyp turatyn mama bıeler bar.
«Bıyl qymyzǵa degen suranys jaman indetke baılanysty artyp ketti. Sondyqtan saýylatyn bıe sanyn da kóbeıttik. Halyqqa paıdamyz tıip, el rızashylyǵyn alyp jatqannan artyq ne bar?» deıdi Nákeń.
Karantınniń qatań kezinde qymyzdy ashyq satýǵa da múmkindik bolmady. Alaıda onyń da jolyn tapqan. Qyzyljarda «Nomad» atty meıramhanasy bar edi, qymyzdy tańerteń sonda jetkizedi. Al alam deýshiler oǵan ýaqytpen jazylyp, kelip alyp turady. Birinen biri estigen halyq «Nomadta» qymyz satylatynyn bilip te alǵan, jazylǵan ýaqytynan qalmaı, jalǵyz-aq satýshyǵa jetip keledi. Lıtri 800 teńge turatyn qymyzdy halyq kezegimen kelip, tik kóterip satyp alady.
Naǵashybaı Barlybaev bıylǵy qaterge qarsy taǵy bir erlik kórsetti. Ol jıeni, Reseıden kóship kelgen kásipker Sermaǵambet Oraluly jáne oblystyń bas ımamy, «Zeket» qorynyń tóraǵasy Kenjetaı qajy Baıkemeluly úsheýi birlesip, 38 mln teńgeden artyq qarajat jınap, ókpege dem beretin 61 apparat, 100-den artyq pýlsosımetr syılady. Al bul syrqat jandarǵa aýadaı qajet bolǵan edi. Sol arqyly qanshama jandar ajaldan qalyp, jigitter saýabyn aldy.
Osy joldardyń avtory Naǵashybaı Barlybaevtyń kásipker áriptesterimen sóılesip, qorǵa aqsha aýdarýdyń qajettigin qalaı aıtqanyn estip otyrdy. «Myń siz-bizden bir shyj-byj artyq» degendeı, ol óziniń áriptesterine barynsha batym ári ashyq aıtyp jatty. «Sen baılyqty osyndaǵy halyqtyń esebinen taýyp otyr emessiń be? Al endi sol halyq qyrylyp jatqanda qolushyn sozbaısyń ba?», dep túıeden túskendeı týrasynan toq etkizedi. Ana jaqtaǵylar da shyj-byj bolyp, qordyń esepshotyn jiberýdi birden surap jatty. Onyń ishinde qazaq ta, orys ta, tatar da, nemis te bolǵan edi...
Sóıtip, «kóp túkirse kól» degendeı, qanshama qarajat jınalyp, halyqtyń ıgiligine jarady.
Mine, Naǵashybaı Barlybaev degen azamat osyndaı. Onyń boıynan tektilik te, iskerlik te, sergektik te esip turady.
Soltústik Qazaqstan oblysy