Ekinshi Dúnıejúzilik soǵys jyldarynda Qazaqstan asa iri ónerkásip ortalyqtarynyń birine aınalǵany belgili. Al elimizdiń mádenı ortalyǵy Almatynyń soǵys jyldaryndaǵy tarıhı mańyzy zor. Soǵys jyldarynda maıdandy azyq-túlik, qarý-jaraq, kıim-keshekpen qamtamasyz etý úshin ońtústik astana damyl tappady. Osy jyldardaǵy Almatynyń tarıhı ornyn aıshyqtap, fılm arqyly mańyzyn kórsetýdi maqsat ete otyryp, «Almaty» telearnasy jaqynda Aqparat jáne qoǵamdyq damý mınıstrliginiń qoldaýymen «Almaty júregimde» telehıkaıasyn túsirdi.
Jýrnalıstermen onlaın kezdesý barysynda «Almaty» telearnasynyń bas dırektory Nurjan Muhamedjanova: «Jeńistiń 75 jyldyǵyna arnalyp túsirilgen «Almaty júregimde» telehıkaıasy surapyl soǵys kezeńindegi zııaly qaýymnyń ómirinen syr shertetin, shynaıy oqıǵaǵa negizdelgen fılm. El basyna qıyn-qystaý kún týǵan kezeńde soǵys aımaqtarynan evakýasııalanǵan azamattarǵa pana bolyp, ıntellıgensııa ókilderiniń basyn qosqan Almaty damylsyz jumys istegen óndiris oryndarynyń arqasynda maıdan dalasyna dem berip otyrdy», dep atap ótti.
Almaty tarıhyna qatysty osyndaı sıýjetterdi arqaý etken fılm 12 serııaǵa negizdelgen.Túsirý ıdeıasy «Almaty» telearnasyna tıesili desek, fılmniń bas prodıýseri – Álııa Ývaljanova, ssenarııin jazǵan – Leıla Aqynjan, qoıýshy-rejısseri – Eldar Qaparov, qoıýshy-operatory – Samat Sháripov. Basty rólderde Roza Muqataeva, Aldııar Baırakımov, Danıl Popov jáne Gúlmıra Daırabaeva oınaıdy.
Fılm jelisi boıynsha 1942 jyly qys aıynda Reseıdiń tanymal jazýshysy P.Korchevskıı qyzy Allamen birge elimizdiń astanasyna qonys aýdarady. Alla Korchevskaıa – daryndy ári jas opera ánshisi. Zulmat soǵys bastalardan buryn anasynan aıyrylǵan Alla úshin aldaǵy ómir ońaıǵa soqpaıdy. Janaryna jas tola, jany muńǵa toly qyzynyń jabyrqaýly kúıi ákege de ońaı soqpaǵany belgili. Evakýasııalanǵan mádenıet qaıratkerleriniń basym bóligi «Laýreatnıkte» ómir súrse, P.Korchevskııdi qazaqtyń tanymal jazýshysy I.Qasymov óz úıine shaqyrady. Osy kezeńderde I.Qasymovtyń uly Ámir Allaǵa ǵashyq bolady. Ámir – symbatty ári daryndy mýzykant. Ol boıjetkendi Keńes Odaǵynyń áıgili ártisiniń qatysýymen ótetin «Baqshasaraı fontany» baletine shaqyrady. Sodan beri Opera teatry Allanyń ómiriniń bir bólshegine aınalady.
«Almaty júregimde» telehıkaıasynda keıipkerler soǵystyń aýyrtpalyǵyna qaramastan, jarqyn bolashaqtan kúder úzbeı, kedergilerge moıymaıdy. Aktrısa Roza Muqataeva bas keıipkerdi somdaýdyń óte qıynǵa túskenin aıtyp, «Allanyń qıyn taǵdyry meni jylatty da, jabyrqatty», – deıdi. Degenmen de taǵdyr tartýy ońaı bolmaǵan Alla bar qıyndyqty eńserip, óz mahabbaty úshin kúrese bildi.
Fılmge túsý barysyndaǵy áserlerimen bólisken Danıl Popov, Aıbek Serikhanov mahabatty arqaý etken telehıkaıada soǵystyń aýyr aýrasyna ený, sol kezeńniń keıipkerine aınalýdyń ońaı bolmaǵanyn aıtady. Al oqıǵa jelisin kórermen júregine jetkize bilý akter úshin eń basty sheberlik. Fılm qanshalyqty aýyr kezeńdegi adamdar ómirin sýrettegenimen, mahabbatqa adal bola bilgen eki jastyń tabysýymen aıaqtalady. Elimizdiń mádenı ortalyǵy ońtústik astananyń II dúnıejúzilik soǵys jyldaryndaǵy róline degen yqylastan týǵan fılm 14 qyrkúıekten bastap kórermenge jol tartady. «Almaty» telearnasy jyl sońyna deıin munymen qosa úsh telehıkaıa men birqatar tyń jobalardy usynǵaly otyr.
ALMATY