QR QK BSh Uıymdastyrý-jumyldyrý jumystary departamentiniń bastyǵy Sáken Júsipov áskerge shaqyrylýshylar eki ret koronavırýsqa test tapsyratynyn aıtty, dep habarlaıdy Egemen.kz.
"Qazaqstan Qarýly Kúshterinde koronavırýs ınfeksııasynyń aldyn alý jáne onyń taralýyna jol bermeý sharalary júzege asyrylýda. Qorǵanys mınıstriniń tapsyrmasy boıynsha áskerge shaqyrý jáne jıyn pýnktterinde, Qarýly Kúshterdiń áskerı bólimderinde sanıtarııalyq-epıdemııalyq sharalar kúsheıtildi, onyń nátıjesinde áskerı ortada koronavırýstyń jappaı taralýyna jol berilgen joq. Kóktemgi áskerge shaqyrýmen salystyrǵanda áskerge shaqyrylýshylarǵa PTR zertteýi eki ret júrgiziletin bolady: birinshi – áskerge shaqyrý kezinde jıyn pýnktterinde, ekinshi jas býyn áskerı bólimderge kelgen kezde", dedi Sáken Júsipov.
Onyń aıtýynsha, áskerge shaqyrý jáne jıyn pýnktterinde áskerge shaqyrylýshylar jáne medısınalyq komıssııa músheleri medısınalyq betperdelermen jáne bakterııaǵa qarsy quraldarmen qamtamasyz etiledi. Kún saıyn keminde eki ret barlyq qyzmettik jáne qosalqy úı-jaılar dezınfeksııalanady.
"Qoldanylyp júrgen tájirıbeni eskere otyryp, áskerge shaqyrylýshylardy habardar etý, olardy medısınalyq qarap tekserýden ótkizý, sonymen qatar olardyń jıyn pýnktterinde bolýlary kezinde qorǵanys isteri jónindegi departamentter, basqarmalar men bólimder qyzmetkerleriniń is-qımyl jasaý algorıtmderi bir izge qoıyldy. Áskerge shaqyrylýshylarda respıratorly aýrýlarǵa tán belgiler anyqtalǵan kezde áreket etý ádisi jeke qarastyrylǵan. Medısınalyq qarap tekserýdiń ózi eki metr araqashyqtyqty saqtaı otyryp, júrgiziletin bolady. Bizdiń qyzmetkerlerimizge osy talaptyń saqtalýyn baqylaý jáne dárigerlerdiń qabyldaýyna kezek kútip qalýdy boldyrmaý júkteldi", dedi ol.