ShYU elderi Syrtqy ister mınıstrleri Keńesiniń otyrysy qarsańynda Reseı Federasııasynyń Prezıdenti Vladımır Pýtın beınekonferensııa rejıminde ShYU-ǵa múshe memleketterdiń syrtqy saıası vedomstvolarynyń basshylarymen kezdesý ótkizdi, dep habarlaıdy Egemen.kz mınıstrliktiń baspasóz qyzmetine silteme jasap.
RF Prezıdenti Reseı tóraǵalyǵy Shanhaı yntymaqtastyq uıymy qarqyndy báseńdetpeı jáne tıimdi jumys isteýi úshin qajettiniń barlyǵyn jasaýǵa tyrysqanyn atap ótti. "ShYU Eýrazııalyq aımaqta beıbitshilik pen qaýipsizdikti, turaqty damýdy qamtamasyz etýde mańyzdy ról atqarady. Teń quqylyq jáne múddelerdi ózara esepke alý qaǵıdattarynda áreket ete otyryp, biz álemdik kún tártibindegi ózekti máselelerdiń sheshimderin birlesip izdeýge, BUU jáne basqa da halyqaralyq formattardy qosa tyǵyz syrtqy saıası úılestirýdi júzege asyrýǵa umtylamyz", dedi V.Pýtın.
Sondaı-aq, Uıym paıda bolǵan jańa, ózekti syn-qaterlerge jedel den qoıý qabiletin is júzinde kórsetip otyrǵany atap ótildi. ShYU elderi koronavırýstyń taralýynyń saıası, saýda-ekonomıkalyq, áleýmettik saldaryn eńserýge kúsh salýda.
Memleket basshysy aldaǵy otyrysta qatysýshylarǵa jemisti jumys tilep, Máskeý alańynda qabyldanǵan sheshimder Shanhaı yntymaqtastyq uıymynyń keń keńistiginde áriptestik pen yntymaqtastyqty nyǵaıtýǵa yqpal etetinine senim bildirdi.