Keshe Qazaqstan Boks federasııasynyń prezıdenti Tımýr Qulybaev 14-26 qazan kúnderi Almatyda ótken álem chempıonatyna qatysqan Qazaqstan ulttyq qurama komandasynyń boksshylarymen jáne jattyqtyrýshylar quramymen kezdesti.
Kezdesýde Federasııa basshysy álem chempıonatynyń tıisti deńgeıde ótkenin aıtty.
Keshe Qazaqstan Boks federasııasynyń prezıdenti Tımýr Qulybaev 14-26 qazan kúnderi Almatyda ótken álem chempıonatyna qatysqan Qazaqstan ulttyq qurama komandasynyń boksshylarymen jáne jattyqtyrýshylar quramymen kezdesti.
Kezdesýde Federasııa basshysy álem chempıonatynyń tıisti deńgeıde ótkenin aıtty.
Osyǵan oraı elimizde alǵash ret ótken álemdik dodany uıymdastyrýǵa atsalysqan barlyq azamattarǵa, sonyń ishinde Boks federasııasynyń qyzmetkerlerine alǵys sezimin jetkizdi. Odan ári ulttyq quramanyń kórsetken ónerine jaqsy baǵa beretinin, chempıonatta bylǵary qolǵap sheberlerimiz ózine júktelgen mindetti tolyǵymen oryndap shyqqanyn atap ótti.
Osydan keıin kezdesýde ulttyq quramanyń bas jattyqtyrýshysy Myrzaǵalı Aıtjanov pen komandanyń kapıtany, álem chempıonatynyń úzdik boksshysy atanǵan Danııar Eleýsinov sóz sóılep, Boks federasııasyna, sonyń ishinde Tımýr Qulybaevqa Qazaqstan quramasyna barlyq jaǵdaıdy jasap kele jatqany úshin alǵysyn bildirip, bolashaqta Azııa oıyndary, álem chempıonaty men Olımpıadada elimizdiń úmitin aqtaýǵa tyrysatyndaryn málimdedi. Osy jerde M.Aıtjanov kelesi Olımpıadada ulttyq qurama 3 nemese 4 altyn medal alýdy josparlap otyrǵanyn bildirdi.
Federasııa basshysy kezdesýde komanda múshelerine osy jetistikpen shektelmeı, aldaǵy kezde ótetin jarystarǵa beldikti bosatpaı, odan ári tııanaqty daıyndalýdy tapsyrdy. Sodan keıin ol Federasııa jumysyna toqtalyp, álem chempıonaty kezinde, 24 qazan kúni AIBA Búkilálemdik boks akademııasynyń tusaýy kesilgenin atap kórsetti. «Jaqynda Almaty oblysy Talǵar aýdanynda AIBA men Qazaqstan boks federasııasynyń arasynda jasalǵan kelisimshart negizinde álemde teńdesi joq oqý-sport kesheni boı kóterdi. Ol Almatynyń irgesinde, Ile Alataýynyń asa kórnekti ári ekologııalyq taza aımaǵynda ornalasqan. Bolashaqta akademııa AIBA-ǵa múshe ulttyq federasııalardyń sheberligin shyńdaıtyn mamandandyrylǵan ortalyqqa aınalady. Munda tek sportshylar ǵana emes, jattyqtyrýshylar, tóreshiler men dárigerler, sport menedjerleri men ákimshilik qyzmetkerlerine arnalǵan zaman talabyna saı oqý kesheni men baǵdarlamalar usynylady. Búkilálemdik boks akademııasy jumysyn kelesi jyldyń naýryz aıynda bastaıdy», – dedi ol.
Osydan keıin Tımýr Qulybaev Qazaqstan quramasynyń bas jattyqtyrýshysy Myrzaǵalı Aıtjanovqa, jattyqtyrýshy Marat Eleýsinov pen basqa da mamandarǵa, álem chempıondary Birjan Jaqypovqa, Mereı Aqshalovqa, Danııar Eleýsinov pen Jánibek Álimhanulyna, kúmis júldegerler Ádilbek Nııazymbetov pen Ivan Dychkoǵa, qola júldegerler Qaırat Erálıev pen Berik Abdrahmanovqa aqshalaı syıaqy tabys etti.
Dastan KENJALIN,
«Egemen Qazaqstan».
Sýretti túsirgen
Orynbaı BALMURAT.