Qostanaı oblysynyń Áýlıekól aýdanyna qarasty Tımofeev aýylynda mektep janynan jumys istep jatqan shaǵyn ortalyq ashanasynan tamaq ishken 11 adam ýlanyp, aýrýhanaǵa tústi. Taýarlar jáne kórsetiletin qyzmetterdiń sapasy men qaýipsizdigin baqylaý departamenti ókilderiniń aıtýynsha, ýlanǵandardyń ishinde tórt eresek adam, jeti bala bar, dep habarlaıdy Egemen.kz.
Oqıǵa 11 qyrkúıekte bolǵan. Departament mamandary sol kúni Tımofeevke shuǵyl jetip, ushynǵan balalar men olardyń ata-analarynan jaýap alǵan.
Sondaı-aq shaǵyn ortalyqtyń ashanasyn tekserip, jýyndydan taldaý alyp, ony azyq-túlik jáne aýyz sý zerthanasyna jóneltken. Sanıtarlyq dárigerlerdiń boljaýynsha, eresekter de, balalar da astan ýlanǵan. Tımofeev aýylyndaǵy bilim oshaǵy shaǵyn keshendi mektep sanatyna kiredi. Sondyqtan mundaǵy balalar qazir úıde onlaın arqyly emes, mektep qabyrǵasynda bilim alyp jatyr. Sol kúni shaǵyn ortalyqta 14 bala bolǵan. As iship shyqqan soń olardyń teń jartysynyń júregi aınyp, qyzýy kóterile bastaǵan. Qalǵan balalardan densaýlyǵyna baılanysty esh shaǵym túspegen. Dárigerlerdiń sózinshe, qazir naýqastardyń jaı-kúıi ortasha, biraq turaqty. Astan ýlanyp aýrýhana tósegine tańylǵan 11 naýqasqa alǵash jedel gastroenterokolıt degen dıagnoz qoıylǵan. Alaıda zerthanalyq taldaý nátıjeleri 9 naýqastyń ishek joldary qabynǵanyn anyqtap otyr.
Qazir mektep ashanasy jabyq. Oblystyq polısııa departamenti mekteptegi sanıtarlyq erejeler men gıgıenalyq normatıvterdiń saqtalmaýyna baılanysty qylmystyq is qozǵap, sotqa deıingi tergeý júrgizip jatyr.
Qostanaı oblysy