Búgin Májilis Spıkeri Nurlan Nyǵmatýlınniń tóraǵalyǵymen Májilistiń jalpy otyrysy ótti. Onda depýtattar Mádenıet máseleleri boıynsha zańnamalyq túzetýlerdi maquldady, dep habarlaıdy Egemen.kz Parlament Májilisiniń baspasóz qyzmetine silteme jasap.
Zań jobasyndaǵy jańashyldyqtyń biri mádenı is-sharalardy uıymdastyrýshylardyń mýzykalyq shyǵarmalardy oryndaýshylardyń fonogrammany qoldanýy týraly kórermenderge habarlaý talabyna qatysty. Qujat jobasy boıynsha konsert uıymdastyrýshylar fonogramma týraly aldyn-ala habarlaýy mindetti bolady. Osy rette, fonogramma máselesine qatysty halyqaralyq tájirıbeni alǵa tartqan Májilis Tóraǵasy depýtattar usynǵan fonogrammany qoldaný týraly uıymdastyrýshylardyń kórermenge habarlaý mindettemesin belgileıtin normany qoldady.
"Eger zań jobasynyń úkimettik nusqasynda fonogrammany paıdalaný týraly aqparattandyrý mindettemesi uıymdastyrýshy men oryndaýshylar arasynda aıqyn bolmasa, onda depýtattar naqtylaýdy usynyp otyr. Birinshiden, bul uıymdastyrýshynyń mindeti. Ekinshiden, uıymdastyrýshy aldyn-ala konsertte fonogrammanyń bolatyny-bolmaıtyny týraly kórermenge habarlaýǵa mindetti", dedi Nurlan Nyǵmatýlın.
Fonogrammaǵa qatysty sózin qorytyndylaı kele:
"Qısyq arba jol buzady", - dep qazaq halqymyz aıtqandaı, óner árqashanda taza bolý kerek. Ándi jandy daýysta aıtqany durys. Al, fonogramma bolsa ony aldyn ala eskertý qajet. Jáne bılettiń baǵasy da soǵan sáıkes bolý kerek. Odan keıin, halyq ózi sheshedi, ol konsertke bara ma, barmaı ma? Árıne, konsert jandy daýysta bolsa ánshige halyqtyń baǵasy da, qurmeti de joǵary bolady", dedi Nurlan Nyǵmatýlın.