QAZAQ KÚRESINIŃ QARYMY

memlekettik qyzmetkerler men BAQ ókilderi arasynan shyqqan balýandar arqyly da taǵy bir tanyldy Qazaqtyń tól sporty sanala­tyn qazaq kúresi tekti kúres ekenin búginderi biraz el moıyndap úlgerdi. Oǵan osyǵan deıin eki ret álem, bes márte Azııa jáne bir­neshe dúrkin el chempıonattary ót­keni dálel. Buǵan shúkir deımiz. Desek te, elimizde qazirgi tańda atalmysh sportymyzdy jan-jaqty nasıhattaýda kemshin tartar tustarymyz az emes. Naýryz mere­kesi qarsańynda ǵana keı jerlerde balýandardy beldestir­gen túr kór­set­kenimizben, qalǵan ýaqyttarda tek joǵarydaǵy sııaqty birin­shilikterde ǵana balýandarymyzdy kezdestirýge múmkindik týady. Osy olqylyqtardyń ornyn toltyrý maqsatynda qaraǵan jannyń qany qyzatyn osynaý bekzat ónerimizdi nasıhattaýdyń jańa úlgisi jan­kúıer­lerge jol tartty. Tuńǵysh ret elordada memlekettik qyzmet­kerler arasynda uıymdastyryl­ǵan respýblıkalyq jarys qazaq kúresi dese ishken asyn jerge qoıa­tyn jandardy bir serpiltip tasta­dy. Respýblıkalyq aqparattyq-saraptamalyq “Til” jýrnaly men “Til janashyry” qoǵamdyq birlestiginiń uıymdastyrýymen ótken bul sharaǵa elimizdiń túkpir-túkpirinen otyzǵa jýyq balýan qatysyp, baqtaryn synady. Astanadaǵy “Astanalyq Sırk” ǵımaratynda shoý-baǵdarlama negizinde ótkizilgen jarys erejesi boıynsha qatysýshylardyń mem­lekettik qyzmet ótili bir jyldan kem bolmaýy óz aldyna, memleket­tik tildi erkin meńgerýi basty talap boldy. Sondaı-aq saıysqa túsetin balýandar salmaǵy 70 pen 100 kılo aralyǵynda bolýy da mindetti bolyp tanylǵan. Jalpy alǵanda, ulttyq naqyshtarǵa ór­nek­telgen bul synnyń balýan­dardy tanys­tyrýy bizdi erekshe súısintti. Ult­tyq kıim úlgisinde kıinip shyqqan tóreshilermen balýandardyń jeke-jeke ata dás­túr men ıilip sálem berýi de bir ǵanı­bet boldy desek qatelespeımiz. Saıysta alǵashqy beldesýdi Tótenshe jaǵdaılar mınıstrligi­nen kelgen Talǵat Nurahmetov pen Beıbit Esın (Ekonomıkalyq qyl­mysqa jáne sybaılas jemqorlyq­qa qarsy kúres agenttigi) ótkizdi. Bul beldesýde Beıbittiń asyǵy alshysynan tústi... Aqtyq synǵa barar joldama úshin kúreske deıin úsh aınalymdy artqa tastaǵan balýandardan saıdyń tasyndaı iriktelip tórge tórteýi shyqty. Fınalǵa shyǵý jolynda qyzylor­da­lyq Jasulan Dosymov aqmola­lyq Nurlan Jamalovtan basym tússe, jambyldyq Nurjan Qazy­bekov Aýyl sharýashylyǵy mınıstrliginiń ókili Dáýlet Eskendirovten aılasyn asyrdy. Aqtyq aıqasta Nurjan Qazy­bekov pen Jasulan Dosymov bir-birine berispeı biraz júrdi. Alaıda sońǵy mınótte Jasulan qarsyla­syn aılaly ádispen alyp uryp, jarys jeńimpazy atandy. Sóıtip, Qyzylorda oblysynyń Qarmaqshy aýdanynan kelgen jas balýan belgili kásipker, mesenat Oralbek Botbaı tikken temir tul­pardy ol­ja­lady. Al kúmis júlde­ger Nurjan Qazybekov Túrik áýe kompanııasy taǵaıyndaǵan álemniń 150 eliniń birine baryp-qaıtý bıletine ıe boldy. Boz kilem­de sulý kúres ónerin kórsetip, kórer­menin súısint­ken rýhty nar ul Nurjan óziniń Mekkege barǵysy keletinin jasyrmady. Úshinshi tuǵyr úshin qarsylasyn qapy qaldyrǵan Aqmola oblysynyń úkilegen úmiti Nurlan Jamalov jarysty uıym­das­tyrýshylar tarapynan daıyn­dalǵan teledı­dar­ǵa ıelik etti. Elimizge belgili estrada jul­dyz­dary Qydyráli men Qaraqat Bolmanovtar, Gúlbaýshan Tergeý­bekova, “Ulytaý” toby jáne astana­lyq sırk ártisteriniń ónerin tamashalaǵan jurtshylyq shoý-baǵdarlamaǵa qatysamyn degen úmitkerlerdiń qazaq kúresine degen ynta jigerlerine de shek qoıyl­mady. Áý bastaǵy erejege sáıkes 100 kılodan artyq salmaqtaǵy balýandar beldespeıdi dep kór­setil­gen-di. Dese de asa aýyr salmaqta kelgen qos balýan bólek synǵa tústi. Prezıdenttiń kúzet qyzmetinen kelgen Arman Ábeýov pen Ishki ister mınıstr­liginiń ókili Talǵat Qoja­baevtyń beldesýleri de tar­tysty ótip, Arman Ábeýov jeńiske jetti. Ol Eır Astana áýe kompanııasy ázirlegen Eýropaǵa baryp qaıtý joldamasyn qaltasyna basty. Qyzyqtyń kórigi BAQ ókilderi arasyndaǵy kúreste qyzdy. KTK telearnasynyń operatory Nur­bolat Qulmanov pen STV telear­na­­sy­nyń jýrnalısi Baqytbek Ha­mıtov kúresinde Nurbolat basym­dyq tanytty. Qos áriptesi­miz de “Altyn soft” saýda belgisi shyǵar­ǵan qos tildi (qazaqsha-oryssha, oryssha-qazaqsha) elektron­dy qalta sózdikterine ıe boldy. Tusaýkeseri barshanyń batasyn alǵan ıgi bastama aldaǵy ýaqytta jyl saıyn jalǵasyn tapsa eken deımiz. Qazaq kúresiniń kósegesiniń kógerýine qarlyǵashtyń qanaty­men sý sepkendeı demeý beretin osyn­daı qanatqaqty jobaǵa demeý­shiler jıirek shyǵyp jatsa, sportqa degen qamqorlyqtyń úlkeni osy bolmaq! Ábdirahman QYDYRBEK, Astana.