Qaraǵandy oblystyq dene shynyqtyrý jáne sport basqarmasynyń basshysy Temirhan Abylaev tikeleı efırde ótken brıfıng barysynda aldaǵy eki jylda Qaraǵandy oblysynda 15 iri sport nysanynyń ashylatynyn, sonymen qatar kóshelerdegi sport alańdaryn jóndeý jáne ornatý boıynsha keń aýqymda jumystar júrgiziletinin málimdedi, dep habarlaıdy Egemen.kz.
Basqarma basshysy buqaralyq sportty damytýdyń memleket aldynda turǵan basym baǵyttaǵy mindetteriniń biri ekenin atap ótti.
"Bizdiń mindetimiz – ár qalada, ár aýylda jastar, balalar men úlkenderdiń belsendi ómir saltyn ustanýyna, jattyǵýyna jaǵdaı jasaý, múmkindik týdyrý. Oblysta dene shynyqtyrýmen aınalysýǵa turǵyndardy tartý boıynsha jumystardy uıymdastyrý maqsatynda 262 sport nusqaýshysy, onyń ishinde aýyldyq jerlerde 76 maman jumys isteıdi", dep atap ótti Temirhan Abylaev.
Qaraǵandy oblysynda turǵyndardy salamatty ómir saltyna barynsha kóp tartý úshin dene shynyqtyrý-saýyqtyrý keshenderi, sport zaldary jáne ashyq sport alańdary salynýda.
"О́ńirde aldaǵy eki jylda 15 iri sport nysany ashylady. Olardyń qatarynda Temirtaýdaǵy dene shynyqtyrý-saýyqtyrý kesheni (DSK), Qaraǵandydaǵy úlken jáne ústel tennısi ortalyqtary, Jezqazǵan, Shahtınsk qalalaryndaǵy jáne basqa da eldi mekenderdegi sport keshenderi bar. Sondaı-aq, aýyldarda "Aýyl – el besigi" baǵdarlamasy boıynsha sport nysandarynyń qurylysy júrgizilýde. Atasý kentinde basseın, Aqtas pen Botaqarda DSK ashý josparda bar", dedi Temirhan Abylaev.
Jańa nysandar salýmen qatar, óńirde burynnan bar nysandardy aýqymdy jóndeý jumystary júrgizilýde. Mysaly, Aqsý-Aıýly kentinde sport mektebi retke keltirildi, kenshiler astanasynda "Qaraǵandy-Arena" muz saraıy jóndeýden ótken. Munda shatyr, júgirý joldary aýystyrylyp, sheshinetin bólmeler men basqa da oryndar retke keltirildi. Jol kartasy boıynsha jóndeý jumystary 11 nysandy qamtyǵan. Olardyń qatarynda Nurken Ábdirov atyndaǵy sport saraıy, jeńil atletıkadan olımpııalyq rezervtiń mamandandyrylǵan balalar men jasóspirimder mektebi jáne basqalary bar. Bıyl óńirdegi 10 sport mektebinde jalpy somasy 210,9 mln teńge bolatyn jóndeý jumystary júrgizilýde. Jalpy, oblysta "Jumyspen qamtýdyń jol kartasy" baǵdarlamasy aıasynda sport salasyndaǵy 14 jobaǵa 1 mıllıard teńgege jýyq qomaqty qarajat bólingen.
Temirhan Abylaev karantınge qaramastan, qaraǵandylyq sportshylardyń óz jattyǵýlaryn jalǵastyrǵanyn, al oblystyń kóptegen turǵyndarynyń onlaın-jarystardyń jańa formatyn qoldanǵanyn atap ótti. Pandemııa kezinde sport basqarmasy sporttyń 24 túri boıynsha 142 onlaın-jarys ótkizgen. Oblystyń júzge tarta turǵyndary doppen jonglerlik etý, jeńil atletıkalyq kross, kúsh gımnastıkasy jáne doıbydan ótken tórt onlaın-týrnırge jáne sport kúniniń qurmetine barlyq sanattaǵy turǵyndar úshin uıymdastyrylǵan sýret konkýrstaryna qatysty. Qaraǵandy sport mektepteriniń jattyqtyrýshylary AulaFit respýblıkalyq chellendjdiń belsendi qatysýshylary boldy. Olar qalanyń ártúrli aýdandarynda turǵyn úıler men mektepterdiń aýlalarynda balalarǵa arnalǵan eki myńǵa jýyq adam qatysqan 70 jattyǵý ótkizdi. Bir sózben aıtqanda, basqarma jańa jaǵdaıda sportty jáne salamatty ómir saltyn nasıhattaý boıynsha belsendi jumys atqardy jáne ony aldaǵy ýaqytta da jalǵastyratyn bolady.
Qazirgi tańda sportshylardyń jattyǵýyna ruqsat berildi: sport keshenderi men basseınder jumys isteı bastady. "Árıne, munyń bári qajetti sanıtarlyq normalardy saqtaı otyryp iske asýda. Jarystardy ótkizýge áli ruqsat berilgen joq, degenmen olar onlaın rejıminde mindetti túrde jalǵasyn tabady", deıdi basqarma basshysy.
Sonymen qatar brıfıngte Temirhan Abylaev oblys basshylyǵynyń qaraǵandylyq sportshylardy qoldaý maqsatynda múmkin bolǵan barlyq jaǵdaıdy jasap otyrǵanyn jetkizdi. Mysaly, taıaýda ǵana el namysyn qorǵap júrgen jetekshi sportshylardyń shákirtaqysyn kóbeıtý jóninde sheshim qabyldanypty. Buǵan qosa, shákirtaqy alýshylardyń sany ósip, ol 104-ten 165 sportshyǵa jetken.
Brıfıngtiń sońynda Temirhan Abylaev oblys turǵyndaryn salamatty ómir saltyn ustanyp, sportpen jáne dene shynyqtyrýmen turaqty túrde aınalysýǵa shaqyrdy.
Qaraǵandy oblysy