Pandemııa saldarynan Ońtústik Koreıanyń «Kia Motors» zaýyty eki konveıeriniń jumysyn ýaqytsha toqtatty.
Seýldiń ońtústiginde ornalasqan Kvanmen qalasyndaǵy zaýytta 8 jumysshy vırýs juqtyrǵan. Osyǵan baılanysty «Kia Motors» jumysty ýaqytsha toqtata turýǵa sheshim qabyldapty. Osylaısha 6 myń adam eńbek etetin 2 qurastyrý konveıerindegi barlyq jumysshy úıine qaıtaryldy. Zararsyzdandyrýdy bastaǵan kompanııa basshylyǵy jumystyń qaıta jandanýy karantındi belgileıtin organdarmen keńesip baryp sheshiletinin jetkizgen. Onsyz da pandemııa qyrsyǵynan sońǵy 11 jyldyń ishinde eń az kólik shyǵaryp, qolaısyzdyq sezingen «Kia Motors» úshin bul jaıttyń ońaıǵa soqpaıtyny túsinikti.
Sońǵy táýlikte Ońtústik Koreıada 153 adam jańadan vırýs juqtyryp, onyń 145-i el ishinde, al qalǵany syrttan, shetelden juqtyrǵan syrqat ekeni anyqtalǵan.
* * *
Kanadanyń densaýlyq saqtaý mınıstrligi sońǵy 24 saǵatta aýrý juqtyrǵandar sany 944 adamǵa kóbeıgeni týraly habarlady.
Kanada provınsııalary arasynda Kvebek turǵyndary kóbirek zardap shegip jatyr. 65 857 kvebektik KVI keseliniń ne ekenin aıqyn túsinip, aýrýmen kúresse, 45 383 ontarıolyq, 16 128 albertalyq turǵyn COVID-19-dyń ilmegine ilinipti.
Jalpy, el kóleminde osy kúnge deıin 139 myń adam aýyryp, 9193 kanadalyq kóz jumǵan kórinedi.
* * *
Irlandııanyń astanasy Dýblınde COVID-19 indetine baılanysty jańadan shekteý sharalary qabyldandy.
El úkimetiniń mundaı sharaǵa barýyna ırlandyqtar arasynda KVI-diń keńinen taralýy sebep boldy. Endi Dýblın turǵyndaryna bir jerde 6 adamnan artyq jınalýǵa ruqsat joq. Pabtar men barlar qyrkúıektiń 21-ne deıin jabylyp, astanalyqtardyń qala aýmaǵynan shyǵýy shekteldi. Buǵan qosa joǵary oqý oryndarynda sanıtarlyq normalar qatal qadaǵalanyp, áleýmettik qashyqtyqty ustaýǵa keńes berilgen.
Irlandııada buǵan deıin mınıstrlerdiń biri KVI juqtyrdy degen kúdikpen Úkimetti de karantınge japqan edi. Biraq mınıstr tapsyrǵan testte aýrý anyqtalmaı, shekteý alynyp tastalǵan. Endi karantın sharalary tutas Dýblındi qamtydy.
* * *
2021 jyldy qortyndylaǵanda álemdik ekonomıkadaǵy IJО́ 7 trln dollar joǵaltýy múmkin. Bul týraly Les Echos gazeti jazdy.
Ekonomıkalyq yntymaqtastyq jáne damý uıymynyń boljamy boıynsha COVID-19 adamzatty osyndaı orasan qarajattan aıyrýy múmkin kórinedi. Uıymnyń bas ekonomısi Lorans Býn munyń álemdik ekonomıka úshin aýyr salmaq ekenin aıta kele, aldaǵy jyly ekonomıkanyń jyldamyraq qalpyna túsýi jaıyndaǵy joramaldardyń týra bola bermeıtinin jáne dúnıe júziniń áli de koronavırýspen biraz alysatynyna qynjyldy.
Ekonomıkalyq yntymaqtastyq jáne damý uıymynyń burynǵy esepterindegi boljaýda 2020 jylǵy IJО́-niń tómendeýi 4,5 paıyz shamasynda bolady degen-di. Al jańa joramal onyń 6 paıyzdy quraıtynyn kórsetip otyr.
* * *
Brazılııa basyndaǵy bulttyń jaqyn arada ydyrar túri kórinbeıdi. Eldiń densaýlyq saqtaý mınıstrligi 4 mln 419 myńnan astam adamnyń dertti bolǵanyn habarlady.
Bir táýlik ishinde 36 820 brazılııalyq COVID-19 juqtyryp, 987 pasıent ajal qushqan. Brazılııa memleketi óziniń 134 106 azamatynan aırylyp, jer shary boıynsha pandemııa bılik júrgizgen alǵashqy úshtiktegi ornyn ózgege berer emes.
«Jyǵylǵan ústine judyryq» degendeı eldegi ózgeshe ekojúıesimen, bıoalýandyǵymen erekshelenetin Pantanalý qoryǵyndaǵy ormanǵa da qaýip tónip otyr. Boı bermesten alaýlap janǵan órt Pantanalý jelegin joıatyn bolsa, Brazılııa men Latyn Amerıkasynyń ǵana emes, álemdik klımattyń ózgerýi múmkin deıdi mamandar.
* * *
Robert Koh atyndaǵy ınstıtýttyń málimetine qaraǵanda Germanııada bir kúnde taǵy 2 myńnan astam adamnan vırýs tabylǵan.
Dálirek aıtar bolsaq, 2194 azamattan COVID-19 anyqtalyp, jalpy alǵanda 265 857 adam vırýs juqtyrǵan. 17 qyrkúıektegi ınstıtýt habarlamasynda 24 saǵattyń ishinde 3 pasıenttiń tynysy toqtap, el kóleminde pandemııa bastalǵaly 9371 adamnyń qurban bolǵany jarııa etilgen.
Federaldy jerlerden quralǵan memlekette indet bastalǵaly aýrý tirkelýi jóninen Bavarııa (63 632), Soltústik Reın – Vestfalııa (63 565) jáne Baden-Vıýrtemberg syndy aımaqtar (46 041) aldyńǵy oryndarda keledi. Úkimet saqtyq sharalaryn kúsheıtip, halyq kóp jınalatyn dástúrli mereke, karnavaldarǵa tyıym salǵannyń ózinde Germanııa halqy vırýs salmaǵyn áli de sezinip otyr.