Mádenıet jáne sport mınıstrligi qazaqy tazy men tóbettiń tuqymyn saqtap, olardyń sany men sapasyn arttyra otyryp, bolashaqta bulardy ulttyq sport baǵytyna qaraı ıkemdeý maqsatynda, osy salaǵa qatysty qoǵamdyq uıymdarmen birlesip, jyl sońyna deıin keshendi jumys júrgizýdi qolǵa aldy, dep habarlaıdy Egemen.kz.
Elimizde qazirgi tańda «Tazy-tóbet-bóribasar» qoǵamdyq uıymynyń resmı emes derekterine súıensek, 40 myńnan astam tazy men tóbet bar eken. Negizgi jumys osy qurylymdy akkredıtasııalaý máselesi. Bul shara tolyq iske asqan jaǵdaıda Federasııa zańdy túrde atqarýshy organdarmen birlese jumysty jasap, sport mektepterinde seksııalar ashýǵa, jattyqtyrýshylar men tóreshilerdiń biliktiligin arttyrýǵa, ishki chempıonat nemese basqa da halyqaralyq týrnırlerdi ótkizýge múmkindik alady eken.
Joǵarydaǵy másele boıynsha ótken aptada memlekettik qurylymdar jáne qoǵamdyq uıymdardyń qatysýymen onlaın jınalys uıymdastyrylyp, bas qosýǵa qatysqan taraptar aldaǵy jumystar týraly oı bólisti. Sport jáne dene shynyqtyrý isteri komıteti tóraǵasy mindetin atqarýshy Serik Jarasbaevtyń aıtýynsha, búgingi tańda qazaqtyń tazysy men tóbetin saqtap, olardyń sanyn arttyrý óte mańyzdy kórinedi.
«Ulttyq sport janashyrlary óńirlerde tazy men tóbet ustaıdy. Alaıda, basty problema búgingi jaǵdaıǵa saı keletin resmı derekterdiń joqtyǵy. Bizdiń vedomstvo atalǵan másele boıynsha jumysty bastap ketti. Arnaıy uıym Federasııany akkredıtteý boıynsha qujattardy jınap, ıtbegilik ónerdi sport túri retinde moıyndatý jolynda jumys júrip jatyr» dedi Serik Maratuly.
Sondaı-aq janýarlarǵa qatysty jaýapkershilikti kúsheıtetin zań jobasy da jasalyp jatqan kórinedi. Osy qujat negizinde memleket janýarlarǵa qatysty zańdyq sharany jetildirip, sonymen qatar dala janýarlaryn da qorǵaýdyń tyń tetikterin kúsheıtpek kórinedi.