Mańǵystaý medısınasyndaǵy olqylyqtardyń biri – jedel járdem kóliginiń jetispeýi. Qolda bar arnaýly kólikter jyldan-jylǵa sany arta túsken turǵyndarǵa tolyqqandy qyzmet kórsetýge úlgermeıdi. Onyń ishinde júriske jaramaı, isten shyǵyp qalatyn kólikter de barshylyq.
Elimizdiń densaýlyq saqtaý júıesi indettiń qaıta órshýine barynsha daıyndalyp jatyr. Mańǵystaýda medısınalyq mekemelerge sý jańa jedel járdem kóliginiń berilýi – osynyń bir dáleli.
«Samuryq-Qazyna» AQ men Densaýlyq saqtaý mınıstrligi arasyndaǵy yntymaqtastyq týraly memorandým aıasynda Mańǵystaýǵa jańa kólikter men qural-jabdyqtar jetkizildi. О́ńir medısınasy 10 ottegi konsentratory jáne 40 pýlsoksımetrmen, sondaı-aq 4 «Shevrolet Damas» markaly jedel járdem kóligimen tolyqty.
– Biz aımaqtaǵy medısınalyq mekemelerge qoldaý kórsetken barlyq uıymdar men el qamyn oılaǵan jandarǵa alǵys aıtamyz. Karantınniń alǵashqy kezinde biz qıyndyqtarǵa tap boldyq. Qazir ekinshi tolqynǵa daıyndalyp jatyrmyz. Bizdiń yntymaqtastyǵymyz óz jalǵasyn tabatynyna senimdimin, – dedi Mańǵystaý oblysynyń Densaýlyq saqtaý basqarmasy basshysynyń orynbasary Sáken Myrzaqulov.
О́ńirge jedel járdem kóligi berilýiniń bul basy emes, buǵan deıin de «Samuryq-Qazyna» AQ qoldaýymen jáne ekinshi deńgeıli banktiń kómegimen on kólik Mańǵystaý oblystyq densaýlyq basqarmasyna tabystalǵan bolatyn. Jedel járdem kólikteri qajettiligine qaraı aýdandarǵa bólinbek.
Mańǵystaý oblysy