Qazirgi kúnderi Aqtóbe qalasyndaǵy saýda núktelerine et pen et ónimderi negizinen Reseıdiń Orynbor oblysynan jetkiziledi. Sıyr etiniń taǵy bir bóligi munda Qostanaı men oblystyń óz aýdandarynan keledi. Bul týraly «Aktobe-taıms» gazeti habarlady.
Qazirgi kúnderi Aqtóbe qalasyndaǵy saýda núktelerine et pen et ónimderi negizinen Reseıdiń Orynbor oblysynan jetkiziledi. Sıyr etiniń taǵy bir bóligi munda Qostanaı men oblystyń óz aýdandarynan keledi. Bul týraly «Aktobe-taıms» gazeti habarlady.
«Ortalyq bazarǵa ár tań saıyn et ákelinedi. Sonyń ishinde shoshqa etiniń 99 paıyzy Bestamaq kentinde ornalasqan «Parıj kommýnasy» JShS-nen túsedi. Onyń kóterme satyp alý baǵasy 650 teńge bolsa, satylý quny 750 teńge bolady. Bazarǵa sıyr etin «Eńbek» JShS tapsyrady. Al oǵan et negizinen Qostanaı oblysynyń sharýashylyqtary men Orynbordan jetkiziledi. Bul jerde sıyr etin Reseıden satyp alýdyń tıimdi ekeni baıqalady. Onyń satyp alý baǵasy kılosyna 400 teńgeden aspaıdy. Syrttan ákelingen sıyr eti áldeqaıda arzan jáne satýǵa óte tıimdi», – delingen onda.
Jasyratyny joq, qazirgi tańda Aqtóbe oblysynda jergilikti iri qara mal sharýashylyǵy qatty turalap tur. Oblys áli kúnge deıin keńes zamanynyń qaıta qurý kezeńindegi mólsherine jete almaı keledi. Eger aımaqta 1991 jyly 586 myń bas iri qara esepte turǵan bolsa, qazir onyń qatary 404 myńnan aspaıdy. Aqtóbede buryn qoı men eshkiniń basy da barshylyq edi. Aıtalyq, budan 20 jyl buryn bul óńirde 2,7 mln. bas qoı men eshki órip júrse, búginde olardyń qatary 2 eseden de joǵary mólsherde az. Mamandar shoshqa basynyń da aıtarlyqtaı azaıyp ketkenin alǵa tartady. Ol táýelsizdikke qol jetkizer aldyndaǵy jyldardaǵy deńgeıdiń 40 paıyzyna da jetpeıdi.
Mal basynyń kúrt kemı túsýi bıylǵy jyly oblystyń Mártók aýdanynda aıryqsha baıqalǵan. Bul jónindegi málimet munyń aldyndaǵy jyldarǵa qaraǵanda, iri qara sanynyń 36 paıyzǵa túsip ketkenin kórsetedi. Al Shalqar aýdanynda qoı men eshkiniń teń jartysy joq.
«Munyń negizgi sebebi sońǵy jyldary oblys jerin qurǵaqshylyq jaýlap alǵanynan shyǵyp otyr, – deıdi osy oraıda oblystyq statıstıka departamentiniń basshysy Mánshúk Qojahmetova. – Mal basyna júrgizilgen sanaqtan keıin olardyń shyn máninde aýyldyq okrýgter ákimderiniń kórsetken mólsherinen edáýir az ekenine kóz jetkizildi».
«Aktobe-taıms» gazeti budan buryn aýyl ákimderiniń sharýashylyq júrgizý kitaptaryna maldyń basyn qalaı qosyp jazǵandary týraly baıandap bergen eken. Al kemistiktiń ornyn maldyń egilýine baılanysty tekserý júrgizý kezinde prokýratýra qyzmetkerleri anyqtapty. Nátıjesinde aýyl sharýashylyǵy salasynyń 5 qyzmetkeri ústinen qylmystyq is qozǵalyp, 11 aýyldyń ákimi sógis alǵan kórinedi.
Gazet tilshisi sondaı-aq ústimizdegi jylǵy 8 aıda Aqtóbeden 20,7 mln. dollar aqshanyń Reseı men Belarýske ketkenin jazady. Oǵan sol jaqtardan 9,2 myń tonna et jáne et ónimderi ákelinipti. «Aqtóbelikter et asyp jeýge kerekti maldarynyń ózin qazir shetelderde ósirip jatyr», – demeske amal joq.
Murat AITQOJA.