"Astana Operanyń" segizinshi maýsymy ózgeshe formatta – QR Bas memlekettik sanıtarlyq dárigeriniń qaýlysyna sáıkes 50 adam kelý múmkindigimen bastaldy, dep habarlaıdy Egemen.kz teatrdyń baspasóz qyzmetine silteme jasap.
Qazirgi tańdaǵy jaǵdaıǵa baılanysty basshylyq aýdıtorııa aýqymyn keńeıtý ári jasartý maqsatymen teatrdyń ımıdjdik saıasatyn jańǵyrtýdy júzege asyrý týraly sheshim qabyldady.
Osy baǵyttaǵy alǵashqy qadam – jańa saıtty, mobıldi qosymsha men teatr boıynsha vırtýaldy týrdy iske qosý.
"Zamanaýı tehnologııalar qarqyndy damý ústinde, biz kórermenderimizdiń qalaýyn eskerdik, onlaın-rejımde bıletterdi satyp alý ereksheligin pysyqtadyq, saıtymyzdyń dızaınyn jeńil ári paıdalanýǵa yńǵaıly etip jasaýǵa tyrystyq. Elimizde ǵana emes, shetelde de baǵyt-baǵdar beretin joǵary deńgeıdegi teatrdy kórsetý, sondaı-aq kórermendermen qatynasty jeńildetý mindetteri turdy. Sonymen qatar QR Prezıdenti Qasym-Jomart Kemeluly Toqaev elimizdiń aldyna mańyzdy mindet qoıǵanyn atap ótken jón – ol sıfrlandyrý salasyndaǵy jumysty jalǵastyrý. Memleket basshysynyń aıtýynsha, sıfrlandyrý – sánge aınalǵan úrdiske ilesý emes, ulttyń básekege qabilettiligin arttyrýdyń negizgi quraly. "Astana Opera" bul baǵytta belsendi jumys júrgizýde", dedi Qazaqstannyń eńbek sińirgen qaıratkeri, "Astana Opera" dırektory Ǵalym Ahmedıarov.
Jańa maýsymda teatrdyń mobıldi qosymshasy iske qosylǵanyn aıta ketken jón. Endi kórermenderdiń atalǵan qosymshany júktep alyp, spektaklderge bıletterdi jyldam tańdaýy men satyp alýyna, eksklıýzıvti kontentke qol jetkizýine jáne premeralar men súıikti ártisteriniń óner kórsetýleri týraly birinshi bolyp bilýlerine múmkindikteri bar.
Tehnologııanyń basty serpilisi – City360.kz jobasy arqyly Astana Business Campus baǵdarlamasy aıasynda Nazarbaev Ýnıversıtetiniń qoldaýymen júzege asyrylǵan VR-týr vırtýaldy ómirdiń jańa saıtyn engizý boldy. "Astana Operanyń" kórermenderi álem teatrlarynyń ishindegi alǵashqylardyń biri bolyp saıtqa kirýge, bılet satyp alǵanǵa deıin kórermen zalynan oryn tańdaýǵa jáne naqty sol orynnan sahnadaǵy qoıylymdy kórý qalaı bolatyndyǵyn bilýge múmkindik alady.