Batys Qazaqstan oblysynda qazaq poezııasynyń kórnekti ókilderi Juban Moldaǵalıevtyń 100 jyldyǵy men Qadyr Myrza Áliniń 85 jyldyǵyna oraı mereıtoılyq sharalar sherýi ótip jatyr, dep habarlaıdy Egemen.kz.
Belgili aqyn, Qazaqstan Jazýshylar Odaǵynyń múshesi, KSRO jáne Qazaq SSR memlekettik syılyqtarynyń ıegeri Juban Moldaǵalıevtyń ǵasyrlyq toıy onyń týǵan jeri – Aqjaıyq aýdany Saıqudyq aýylynda, Juban Moldaǵalıev atyndaǵy orta mekteptiń tarıhı- ólketaný murajaıynda bastaldy. Sharaǵa Qazaqstannyń eńbek sińirgen mádenıet qaıratkeri, áıgili kompozıtor, óner zertteýshisi, Aqjaıyq aýdanynyń «Qurmetti azamaty» Ilııa Jaqanov arnaıy qatysty. Osydan bes jyl buryn, aqynnyń 95 jyldyǵy qarsańynda munda Juban synyby ashylǵan bolatyn. Búginde mektepte tarıhı-ólketaný murajaıy jasaqtalǵan. Mártebeli meımandardy qarsy alǵan aqyn óleńderimen qarsy alǵan 11 synyp oqýshysy Muhıtov Janaıdar mýzeıdiń «Týǵan aýylym – tunǵan shejirem» bólimin tanystyryp shyqty.
Bul kúni Qýraılysaı aýylyndaǵy Talap mektep-bóbekjaı kesheninde de Juban synybyn ashyldy. Osy aýylda halyqtyń óz qarjysyna turǵyzylǵan aqyn eskertkishine arnaıy baryp, gúl shoǵyn qoıǵan meımandar aýdan ortalyǵyna bettedi. Sharanyń basty qonaǵy, aqynnyń jary, toqsannyń tórindegi Sofıa Málikqyzy ul-qyzdarymen, Qazaqstan Jazýshylar Odaǵynyń tóraǵasy Ulyqbek Esdáýlet osy sharaǵa arnaıy Almatydan kelgen edi. Qazaqstan Respýblıkasy Memlekettik syılyǵynyń ıegeri, Qazaqstan Jazýshylar Odaǵy Batys Qazaqstan oblysy bólimshesiniń tóraǵasy Aqushtap Baqtygereeva, Batys Qazaqstan oblysy ákiminiń birinshi orynbasary Muhtar Mankeev jáne basqalary bastaǵan qonaqtar aýdan ortalyǵyndaǵy aqynnyń záýlim eskertkishine táý etti. Osy jerde «Rýhanı jańǵyrý» baǵdarlamasy aıasynda mesenattar men el azamattarynyń qarjylandyrýymen salynǵan «Juban» ortalyǵynyń ashylý saltanaty boldy.
Bul ortalyqta aqynǵa arnalǵan murajaı, aqynnyń kitaphanasy jáne aýdan ortalyǵyndaǵy barlyq mádenı-rýhanı sharalar ótetin arnaıy zal ornalasqan. Munda Juban aqynǵa qatysty jádigerler, tutynǵan zattar, aqynnyń jeke kitaphanasynan alynǵan kitaptar jáne aqynnyń týyndy kitaptary da osy jerge jınaqtalǵan. Osy jerde qonaqtardyń qatysýymen «Juban Moldaǵalıev» atty estelik kitabynyń tanystyrylymy ótti.
Dál osyndaı mereıtoılyq sharalar shoǵyry Qadyr myrza Áliniń týǵan jeri Syrym aýdanynda da ótti. Aqynnyń jary Saltanat Myrzalıeva bastaǵan qonaqtar aýdan ortalyǵyndaǵy aqyn eskertkishine taǵzym etip, Qadyr Myrza Áli atyndaǵy mektepke soǵyp, aqyn murajaıyn aralady. Osy kúni Jympıty selosynda aqynnyń anasy Maǵrash turǵan úıge eskertkish taqta ornatyldy. Taqtada «Bul úıde 1978-1980 jyldary aralyǵynda aqyn, Qazaqstannyń Halyq jazýshysy, Memlekettik syılyqtyń laýreaty, Táýelsiz «Tarlan» syılyǵynyń ıegeri Qadyr Myrza Áli toqtaǵan» dep jazylǵan.
Keshe Oral qalasynda qos aqynnyń mereıtoıyna oraı respýblıkalyq aqyndar aıtysy bastalǵan bolatyn. Elimizdiń ár aımaǵynan kelgen 16 aqyn 8 jup qurap, sóz maıdanyna shyqty. Oǵan aıtystyń baıyrǵy tóreshisi, aqyn Júrsin Erman bastaǵan qazylar alqasy tórelik etýde. Pandemııa shekteýine baılanysty kórermensiz ótip jatqan aıtystyń nátıjesi búgin keshke belgili bolady.
Sonymen birge búgin Oral qalasynda Juban Moldaǵalıevke arnalǵan eskertkish ashylmaq. «Juban jyrlary – ǵasyr úni» atty respýblıkalyq ǵylymı konferensııa onlaın formatta ótedi. Sondaı-aq, Hadısha Bókeeva atyndaǵy Batys Qazaqstan oblystyq drama teatrynda ótetin «Juban» qoıylymynyń premerasy «Aqjaiyq» telearnasynda tikeleı efırden kórsetiletin bolady.
Batys Qazaqstan oblysy