Sońǵy tórt jylda Qazaqmys kompanııasy Shyǵys Qazaqstan oblysyndaǵy iri sport nysandarynyń qurylysy men jóndeý jumystaryna 1,65 mlrd. teńgege jýyq qarjy bóldi
Sońǵy tórt jylda Qazaqmys kompanııasy Shyǵys Qazaqstan oblysyndaǵy iri sport nysandarynyń qurylysy men jóndeý jumystaryna 1,65 mlrd. teńgege jýyq qarjy bóldi
Aıtalyq, 2012 jyly kompanııa tarapynan О́skemen qalasyndaǵy Jekpe-jek saraıynyń (Boks jáne kúres saraıy) qurylysyna 366 mln. teńge bólindi. Ǵımarattyń jalpy aýmaǵy 5700 sharshy metrdi quraıdy. Munda kórermender úshin oryndar, birneshe jattyǵý zaly jáne kıiný jaılary, tóreshiler men jattyqtyrýshylarǵa da bólmeler qarastyrylǵan. Sonymen qatar, medısınalyq pýnkt, baspasóz máslıhattary men brıfıngter ótkizetin zal jumys isteıdi. Jekpe-jek saraıynyń qurylysy 2012 jyldyń qyrkúıek aıynda bastalyp, aǵymdaǵy jyldyń sońyna deıin paıdalanýǵa beriledi dep josparlanyp otyr.
Jaqyn ýaqytta О́skemen qalasynda sporttaǵy daryndy balalarǵa arnalǵan 200 oryndyq mektep-ınternaty boı kóteredi. Qurylys jumystaryna baǵyttalǵan 300 mln. teńge kólemindegi qarajatty Qazaqmys toby birlesip qarjylandyrý negizinde bóldi. Qazaqmys kompanııasy bólgen jalpy somasy 500 mln. teńgeden astam qarajattyń arqasynda oblys ortalyǵynda eki hokkeı modýli jumys istep tur. 2010 jyly kompanııa jumsaǵan 600 mln. teńgege «Vostok» stadıonynda kúrdeli jóndeý jumystary atqaryldy. Ony júzege asyrý aıasynda minberlerge gıdrooqshalaý jasaldy, ınjenerlik júıeler, ońtústik, shyǵys jáne soltústik minberlerdiń eden jabyny aýystyryldy. Sondaı-aq, stadıonnyń ǵımaraty FIFA talaptaryna saı jańǵyrtyldy. Batys minberlerdiń ústine shatyr ornatylyp, stadıonnyń 8500 oryndyǵy tolyqtaı plastık oryndyqtarǵa aýystyryldy. «Vostok» stadıony 1963 jyly salynǵan, syıymdylyǵy 8 500 oryn.
Atalǵan qarajat 2010-2013 jyldar aralyǵynda «Qazaqmys korporasııasy» JShS men Shyǵys Qazaqstan oblysy basshylyǵynyń arasyndaǵy jasalǵan memorandýmdar jáne áleýmettik jobalardy iske asyrý jónindegi keshendi josparlar aıasynda bólingen. Jomarttyq joralǵysyn jasaǵan kásiporyn budan bylaı da izgilikti isin jalǵastyra bermek.
Marat AQQUL,
«Egemen Qazaqstan».