Bul kúnderi Fransııanyń bas shahary – Parıjde tennısten «Úlken dýlyǵa» sanatyndaǵy «Rolan Garros» jarysy ótip jatqany belgili. Jarysty bes tennısshi bolyp bastaǵan qazaqstandyq sportshylardyń sany ekinshi aınalym aldynda bireýge qysqardy.
Álemdik reıtıngte 76-orynǵa jaıǵasqan jerlesimiz Zarına Dıas Fransııa ashyq chempıonatyndaǵy tusaýkeser kezdesýin reıtıngte 35-orynda turǵan Týnıs sportshysy Ons Jabermen ótkizip, jeńilip qaldy. Úsh setke sozylǵan básekeniń alǵashqy partııasynda Dıas 6:4 esebimen senimdi jeńiske jetip, jarysty sátti bastaǵan edi. Alaıda keıingi eki sette 6:3, 6:1 nátıjesimen qarsylasyna ese jiberip, «Rolan Garros» týrnıriniń jekeleı jarystaǵy ónerin aıaqtady. Dese de otandasymyz juptyq básekelerin jalǵastyrady.
Aıta keteıik, halyqaralyq dodaǵa qatysyp jatqan ózge jerlesterimiz alǵashqy aınalymdy sátti bastap, ekinshi kezeńge joldama aldy. Bul kezeńde Iýlııa Pýtınseva argentınalyq Nadeı Podoroskamen, Aleksandr Býblık ıtalııalyq Lorenso Sonegomen jáne Mıhaıl Kýkýshkın ıspanııalyq tennısshi Pedro Martınes Porteromen baq synaıdy.