Basqa sport túrlerinde qalaı ekenin qaıdam, áıteýir áýesqoı boksta qazaq-ózbek tartysy erekshe. Sharshy alańǵa shyqqan eki eldiń boksshylary rıngte jeńiske jetý úshin bar kúsh-jigerin jumsap, sońǵy demi qalǵansha aıqasýǵa bar. Keıingi jyldary jankúıerler Azııa, álem chempıonattary, tipti tórt jylda bir keletin Olımpııa oıyndary bolsyn qazaq-ózbek boksshylarynyń tartysyn taǵatsyzdana kútetin boldy. Endi bul qatarǵa kásipqoı boksta óner kórsetetinderdiń de jekpe-jekteri qosyldy.
Keıingi 3-4 jylda Qazaqstannyń da, О́zbekstannyń da boksshylary kásipqoı boksqa bet buryp jatqany barshaǵa belgili. Tipti ońtústiktegi kórshilerimizdiń 2016 jyly Rıo Olımpıadasyna qatysqan quramy Olımpııa oıyndarynan keıin kásipqoı bokstyń otany sanalǵan AQSh-qa údere kóshti. Endi bir sanaýly jyldardan keıin eki eldiń áýesqoı bokstaǵy teketiresi kásipqoı boksta da jalǵasatyny anyq. Sonyń bastamasy retinde jýyrda otandyq BAQ-ta qarsylastaryn kásibı sharshy alańda qoǵadaı japyryp júrgen qazaqstandyq boksshy Batyr Júkembaev (18-0,14 KO) pen О́zbekstannyń maqtanyshyna aınalǵan nokaýtshy Shohjahon Ergashev (18-0, 16 KO) qarasha aıynda AQSh-ta judyryqtasatyny týraly málimet paıda boldy. Osy aqparatty estigen boks jankúıerleri jekpe-jek kúnin taǵatsyzdana kútip, otandasymyzdyń jeńiske jetetinine senim bildirgen bolatyn.
Alaıda arada birneshe kún ótkende Júkembaevtyń bul jekpe-jekten bas tartqany, ony promoýteri de, bapkeri de eki jaqtap ózbekstandyq boksshymen jekpe-jek ótkizýge kóndire almaǵany týraly aqparat kóńilimizdi kúpti etip qoıdy. Osydan keıin jankúıerlerdiń de pikiri ekige bólindi. Biri Batyrdyń ózbek boksshysynan júreksingenin alǵa tartsa, ekinshileri otandasymyzdy aqtap álek. Osy áńgimeniń izi sýymaı jatyp Júkembaevtyń bapkeri qazaqstandyq vesti.kz ınternet basylymyna keń kólemde suhbat berdi.
Belarýs jattyqtyrýshysy Andreı Ivıchýktiń pikirinshe, Batyr bul jekpe-jekten bas tartpaǵan. Tek Reseıden AQSh-qa (Júkembaev búginde Reseıde jattyǵýda – red) vıza bermeı jatqany úshin jekpe-jek ýaqytyn keıinge shegerýin suraǵanyn aıtady. «Bizge Ergashevpen jekpe-jek ótkizýge usynys kelgen kezde qatty qýandyq. Sebebi bul Batyrǵa reıtıngte kóterilýge jáne chempıondyq ataqqa jaqyndaýǵa jaqsy múmkindik beredi. Biraq bizde vızaǵa qatysty másele týyndap qaldy. Men elshiliktegi dostaryma qońyraý shalyp kómek surasam da, olar qazir Reseıden Amerıkanyń eshbir qalasyna vıza bermeı jatqanyn aıtty. Bizge jekpe-jekti 19 qarashada AQSh-ta ótkizý usynyldy. Ergashev ońaı qarsylas emes, sondyqtan bul jekpe-jek jaqsy daıyndyqty qajet etedi», deıdi ol.
Batyr Júkembaevty jattyqtyrǵanǵa deıin Shohjahon Ergashevpen birge jumys istegen Andreı Ivıchýk eger vıza berilip, jekpe-jekti óz ýaqytynda ótkizgende bul aıqasta Júkembaev sózsiz jeńiske jetetin edi deıdi.
«Batyrdyń Shohjahondy jeńetinine 100 paıyz senimdimin. Batyr – jan-jaqty, aılaker jáne aqyldy boksshy. Ol óte tártipti, bárin muqııat tyńdaıdy jáne urys josparyn jaqsy oryndaıdy. Men bul jekpe-jektiń jaqyn arada bolǵanyn qalaımyn. О́ıtkeni men Ergashevpen qalaı judyryqtasý kerek ekenin jáne ony jeńý úshin qandaı jospar qurý kerek ekenin de jaqsy bilemin».
Dese de kásipqoı bokstaǵy birinshi qazaq-ózbek teketiresiniń osylaısha bastalmaı jatyp erte aıaqtalǵany óte ókinishti. Sonda da bul jekpe-jek aldaǵy ýaqytta uıymdastyrylady dep úmitteneıik. Biraq aıqastan birinshi bolyp qazaqstandyq boksshynyń túrli sebep aıtyp, judyryqtasýdan bas tartqanyn kim qalaı dese de aqtap alýǵa kelmeıdi. Ázirshe bul jekpe-jek týraly Batyrdyń bapkeri ǵana pikir bildirdi. Al eki boksshy da únsiz.
28 jastaǵy Shohjahon Ergashev búginge deıin kásipqoı boksta 18 jekpe-jek ótkizip, barlyǵynda jeńiske jetken. Tipti 16 qarsylasyn merziminen buryn uryp jyqqan. Qazirgi tańda Ergashev álemdik reıtıngte 21-orynda tur. Al Júkembaev 29-orynǵa jaıǵasqan.