«Ustazdyq etken jalyqpas, úıretýden balaǵa» degen Abaı sózi búginde óz kásibine berilgen, urpaq tárbıesine uqyptylyqpen qaraı biletin ustazdar qaýymyna qarata aıtylsa kerek-ti. Otyz jyldan asa eńbek jolynda jańashyl pedagog mártebesin ıelengen tarıh jáne quqyq pánderiniń muǵalimi Gúlmıra Asanbekova týraly sóz qozǵaǵanda, onyń tájirıbesi respýblıka kóleminde úzdikter qatarynda ekenine kóz jetkizesiz.
Qazaqstan Respýblıkasy oqý isiniń úzdigi, «Y.Altynsarın» tósbelgisiniń, Almaty qalasy ákiminiń bıylǵy jarııalaǵan grant ıegeri, ustaz-tálimger jaıynda áriptesteri «Tarıh jáne quqyqtaný pániniń muǵalimi retinde tereń teorııalyq bilimin ǵylymı negizde ushtastyra biletin bilikti maman Gúlmıra Saǵatqyzy – árbir sabaǵyn izdenimpazdyqpen júrgizetin, ári ártúrli ádis-tásilderdi tıimdi paıdalana otyryp, oqýshylardyń oılaý qabileti men tanymdyq deńgeıin arttyrýdan jalyqpaıtyn ustaz» dep pikirin bildirdi.
Izdenis pen bilimin jetildirýdi óz kásibiniń bir bólshegine aınaldyrǵan ustazdyń jetistikteri jaıynda uzaq áńgimeleýge bolady. Degenmen bala oqyta júrip, elimizdiń bilim júıesiniń damýy, oqýlyqtardy jetildirý, mamandar tájirıbesin shyńdaýdaǵy eńbegi óz aldyna desek, Gúlmıra Asanbekova búginde Reseı, Polsha, Chehııa, taǵy basqa shetelderde ótken semınar-konferensııalarǵa qatysyp, úzdik maman ekenin kórsetip júr.
Abaı atyndaǵy Qazaq Ulttyq ýnıversıtetin Tarıh jáne quqyqtaný pánderiniń oqytýshysy mamandyǵy boıynsha bitirgen Gúlmıra Asanbekova eńbek jolyn 1989 jyly Taldyqorǵan qalasyndaǵy №18 mektepten bastady. Al 20 jyldan asa ýaqyttan bergi aralyqta Almaty qalasyndaǵy №159 mektepte tarıh jáne quqyqtaný pánderin oqytyp júr.
«Meniń ustazdyq qyzmetimde jolym boldy dep nyq senimmen aıta alamyn. О́ıtkeni qandaı qıyn-qystaý kezeńderde de ózim tańdaǵan kásipti tastamaýǵa, ári qaraı táýelsiz elimizdiń jas urpaǵyna memleketimizdiń tarıhy, quqyqtyq qurylymy turǵysynda meńgergen bilimdi jetkizýdi maqsat ettim. Eńbek jolymda kásibı tálimgerlerdiń kezdesýi de meniń óz isime berilip jumys isteýime barynsha yqpal etti», deıdi Gúlmıra Saǵatqyzy.
Tarıh sabaǵyn oqytýdaǵy basty erekshelik balalardyń pánge degen qyzyǵýshylyǵyn oıatyp, tanym-túsinigin jetildirý, durys baǵyt-baǵdar berý – oqytýshynyń basty mindeti. Osy talaptardy qaperde ustaıtyn bilikti ustaz qashyqtan bilim berýde sabaq beretin muǵalimge de, balanyń jaǵdaıyn jasap otyrǵan ata-ana men bilimdi ıgerip otyrǵan balaǵa da salmaq túsetinin aıtady. Qazirgi kezde oqýshylar qashyqtan bilim alýǵa tóselip, tapsyrmalardy erkin meńgerýge mashyqtanyp keledi. Eń bastysy – oqýshymen tikeleı jumys isteý, qandaı jaǵdaıda da járdem berý. Keıipkerimiz oqýshylardyń oqýǵa degen yntasy, qyzyǵýshylyǵy balaǵa durys tapsyrma bergende ǵana artatynyn aıtady. Sondyqtan da oqýshyǵa tapsyrmalardy oryndaýda tańdaý múmkindigin berý mańyzdy.
Pandemııa kezinde televızııalyq sabaqtardy túsirýge úles qosqan ustaz qashyqtan bilim alý úlken jaýapkershilik pen izdenisti talap etetin platforma ekenin atap ótti. Alǵashynda kemshilikterdiń bolǵany ras desek te, qazirgi kezde balalardyń qyzyǵýshylyǵy artyp keledi. Bıylǵy oqý jylynda bilim platformalaryn tańdaý múmkindigi týdy. Osy oraıda Microsoft Teams platformasynyń erekshelikterine toqtalǵan G.Saǵatqyzy munda tapsyrmalar, test jumystary balalardyń zeıinin arttyryp, qabiletin shyńdaýǵa múmkindik beretinin alǵa tartty. Degenmen qandaı da bir qıyndyqtarǵa qaramastan, pandemııa kezinde qala ákimshiligi men bilim basqarmasy tarapynan ustazdardyń biliktiligin arttyrýǵa baılanysty uıymdastyryp otyrǵan sharalardyń mańyzy joǵary. Al jańashyl pedagog bolý úshin bilikti ustazdardyń eńbekteri men is-tájirıbesinen ónege alý mańyzdy.
ALMATY