Grýzııanyń premer-mınıstri Bıdzına Ivanıshvılı arnaýly brıfıngte úkimettiń jańa basshysy qyzmetine kandıdat retinde ishki ister mınıstri Iraklıı Garıbashvılıdiń atyn atady.
Grýzııanyń premer-mınıstri Bıdzına Ivanıshvılı arnaýly brıfıngte úkimettiń jańa basshysy qyzmetine kandıdat retinde ishki ister mınıstri Iraklıı Garıbashvılıdiń atyn atady.
Áli ol parlamentte bekýge tıis jáne ol 17 qarashadaǵy prezıdent Georgıı Margvelashvılıdiń qyzmetke kirisý saltanatynan keıin, sondaı-aq qazirgi premer-mınıstr Bıdzına Ivanıshvılıdiń resmı túrde qyzmetinen ketýinen keıin júzege asýǵa tıis. Biraq jurt Garıbashvılıdi úkimet basshysy retinde qabyldap ta, quttyqtap ta otyr.
Qazir bul elde Ivanıshvılıdiń degeni bolyp tur. Basqalar onyń aıtqanyn qoldaıdy, zańdaı qabyldaıdy. Sol Ivanıshvılı bylaı dedi: «Grýzııa laıyqty úkimetke, laıyqty premer-mınıstrge jáne laıyqty prezıdentke ıe boldy jáne men grýzın qoǵamynyń tapsyrysyn oryndap, osyndaı tamasha úkimet pen prezıdent qaldyryp bara jatqanymdy maqtan etemin».
Bul málimdemeden kóp jaıdy uǵýǵa bolar edi. Eń aldymen, úkimetti prezıdentten joǵary qoıyp otyr jáne osynyń barlyǵy óziniń qalaýymen júzege asyp otyrǵanyn ańǵartady. Áli parlamentte bekimegen adamdy premer-mınıstr retinde atap otyrǵany da óziniń sheshimi eki bolmaıtynyna kúmánsizdigin bildiredi.
Áli bekimeı moıyndalǵan premer-mınıstr Iraklıı Garıbashvılıdi otyzynda orda buzǵan dep sıpattaýǵa laıyq. Onyń jasy 31-de ǵana, 1982 jyly týǵan. El bıliginiń bas tizginin ustaý (prezıdent ókilettiginiń myqtap shektelgenin eskerip) tym erte emes pe deýge de bolar. Úkimettiń, bıliktegi «Grýzın armany» koalısııasy saıası keńesiniń jáne parlamenttegi kópshilik fraksııasy ókilderimen kezdeskennen keıin bul kandıdatýra maquldanyp, ony Ivanıshvılı jarııa etti.
Garıbashvılıdiń jolyn dańǵyl boldy dese jón. 2005 jyly Tbılısı memlekettik ýnıversıtetin «halyqaralyq qarym-qatynas» mamandyǵy boıynsha bitirgen, dál osy ýaqytta osy mamandyq boıynsha Sorbonna ýnıversıtetinde qatar oqyǵan. 2004 jyldan 2012 jylǵa deıin Ivanıshvılıdiń ıeligindegi Cartu Group kompanııasynyń túrli uıymdarynda basshy qyzmet atqarǵan. О́tken jyly «Grýzın armany – Demokratııalyq Grýzııa» saıası partııasyn qurýshylardyń biri bolǵan. 2012 jyldyń qazanynan eldiń ishki ister mınıstri. Ivanıshvılıdiń sıpattaýynsha, bir jyl ishinde eýropalyq turpattaǵy polısııany qurǵan kórinedi.
Endi ony parlamentte bekitý jaı resmı shara ǵana ekeni anyq. Ondaǵy kópshilik fraksııa jetekshisi Davıd Saganelıdze bul shara jyldam ótetinin málimdedi. Osylaısha, Grýzııada bılik tolyqtaı jańardy.
Sengeniń qylmysker bolsa, sol jaman
Qazan aıynyń sońǵy kúni Máskeýdi shýlatqan bir oqıǵa boldy – AQSh qarjy mınıstrligi halyqaralyq uıymdasqan qylmyskerler qataryna Reseıdiń, eń aldymen, prezıdent Vladımır Pýtınniń súıikti ánshisi, Reseıdiń eńbek sińirgen ártisi, kompozıtor, prodıýser Grıgorıı Lepsti qosqan eken, sol kúni-aq eldiń resmı oryndary oǵan qarsylyq bildirip, málimdemeler jasap úlgerdi.
Árıne, bul shý áńgime el prezıdentine jaqyn adam jaıynda bolǵan soń shyqty. RF prezıdentiniń baspasóz hatshysy Dmıtrıı Peskov Máskeýdiń Vashıngtonnan Lepstiń «kara tizimge» qalaı qosylǵanyna túsinik berýdi talap etkenin habarlaýmen qatar, óziniń biraz ashý-yzasyn bildirdi. Leps – Reseı prezıdentiniń jáne kóptegen reseılikterdiń súıikti ánshisi, 2012 jylǵy prezıdenttik saılaýda Vladımır Pýtınniń senimdi ókili bolǵanyn aıtty. Ras, Ortalyq saılaý komıssııasynyń tiziminde Pýtınniń senimdi ókilderi qatarynda Lepstiń aty joq kórinedi. Sóıtse de, Peskov ta jaıdan-jaı aıtpasa kerek, onda bolmaǵanmen, beıresmı tizimge qosylǵan shyǵar.
Áıteýir, Lepske ara túskender bul habar estilisimen belsendi iske kirisken. Aldymen syrtqy ister mınıstrligi Vashıngtonnan túsinik talap etse, sol SIM-niń adam quqy jónindegi ókiletti ókili Konstantın Dolgov olardy biraz synap ta alady. «Reseı SIM-i reseılik azamattardyń bir nársege aıypty eken-emestigin óz elimizde reseılik sot-quqyqtyq júıesi sheńberinde qaralýy kerek degen tujyrymǵa súıenedi, – dedi Dolgov. – Sondyqtan bul róldi AQSh-tyń ıemdenýi jón emes». Reseıdiń azamatyna kiná taǵar bolsa, olar reseılik zań oryndaryna júginsin, ózderiniń ulttyq zańyn qoldanbasyn, deıdi quqyq qorǵaýshy.
Qısyqtaý qısyn. Reseılik zań oryndary aıyptamasa, halyqaralyq uıymdasqan qylmysker tobyna qatysqan reseılikter qylmysker sanalmaýǵa tıis kórinedi. Bul endi aqylǵa syıa qoımaıdy. Sonda halyqaralyq qylmystyq topqa qatysyp qana qoımaı, oǵan basshylyq ta jasap júrgenderdiń áreketterine basqalar qarap otyrýǵa tıis pe? Árıne, buǵan basqalar, sonymen birge, AQSh ta kónbeıdi.
AQSh prezıdenti Barak Obama óziniń №13581 nusqaýymen el qaýipsizdigine qaýipti degen álemdik tórt qylmystyq topqa qarsy sanksııa engizdi. Olar – ıtalııalyq kamorra, japondyq ıakýdza, meksıkalyq «Los-Setas» jáne MS – 13, sondaı-aq, eýrazııalyq «Týystyq sheńber» toby. Sońǵysy keshegi KSRO-dan shyqqan elderdiń qylmyskerlerin biriktiretin kórinedi. Grıgorıı Leps (shyn aty Lepsverıdze) solarǵa qosylady eken. Sol toptyń bir basshysy Vladıslav Leontevke aqsha tasıtyn kýreri sanatynda kórinedi.
«Týystyq sheńberdiń» búldirgeni kóp. Onyń bir basshysy «reseılik qylmystyq álemniń generaly», «zańdaǵy ury» Zaharıı Kalashov 22,5 mıllıon eýro aıyp tólep, 9 jyl arqalap, Ispanııanyń túrmesine qamalǵan. Onyń jaqyn serigi Lasha Shýshanashvılı bıyl Grekııada 14 jylǵa sottaldy. Bul elder olardy sottaǵanda Reseıden ruqsat suraǵan joq, olardyń zańyna júgingen de joq.
AQSh qarjy mınıstrligi bul toptyń Reseıde, Qyrǵyzstanda, О́zbekstanda jáne BAÁ-de áreket etip júrgen jeti basshysyn ataǵan. Olar – Vasılıı Hrıstoforov (laqap aty – Voskres), Qamshybek Kólbaev (Kamchı Bıshkekskıı, Kolıa-kırgız), Vladıslav Leontev (Belyı), Aleksandr Manýılov (Sasha Samarskıı), Gafýr Rafımov, Lazar Shaıbazıan jáne Alekseı Zaısev. Bulardyń árqaısysynyń atqaratyn «sharýalary» bar. Leontev pen Hrıstoforov esirtki bıznesin qadaǵalaıdy, Rahımov О́zbekstanda sol esirtki óndirisine mamandanǵan.
Endi Lepske kelsek, Máskeý onyń Leontevtiń qarjy kýreri ekenin dáleldeńder deıdi. Oǵan AQSh jaýap bere jatar, al onyń Reseıde eń baı ánshi ekeni (byltyrǵy jylǵy tabysy 15 mıllıon dollar bolǵan), Taılandta úıi barlyǵy, biraq onda turmaıtyny, mıllıarderler Iskander Mahmudov, Andreı Bokarevtermen ish-qaryndary aralasqan dos ekeni anyq. Leps bylaı deıdi: «Meniń óz memleketim – Reseı, óz úkimetim bar. Olar maǵan kiná taqpaıdy, al basqa el úkimetiniń aıtqanyna pysqyrmaımyn da».
Reseıdiń resmı oryndary da sondaı pikirde.
Mamadııar JAQYP,
«Egemen Qazaqstan».