Muǵalimder kúni qarsańynda Almaty oblysynda jyl saıynǵy oblystyq "Jyl muǵalimi" baıqaýynyń jeńimpazy anyqtaldy, dep habarlaıdy Egemen.kz
Ol Aqsý aýdany Ǵ.Muratbaev atyndaǵy orta mekteptiń matematıka pániniń muǵalimi Asyl Qaımuhanov. Saltanatty sharada avtokóliktiń kiltin oblys ákimi Amandyq Batalov tabystady.
Muǵalimder kúnine arnalǵan saltanatty jıynda quttyqtaý sóz sóılegen Amandyq Batalov bilim berý salasyn damytý jáne muǵalimderge qolaıly jumys jaǵdaıyn jasaý maqsatynda oblysta júrgizilip jatqan jumystarǵa keńinen toqtaldy.
Oblys ákiminiń aıtýynsha, sońǵy 3 jylda memlekettik qoldaýdyń arqasynda oblysta 19 jańa mektep salynyp, oqýshylarǵa arnalǵan 2 jataqhana paıdalanýǵa berildi. Taǵy eki jataqhana salynýda. Jalpy, oblysta 2020 jylǵa bilim berýdi damytýǵa 320,9 mıllıard teńge bólindi. Bul ótken jylmen salystyrǵanda 114 mıllıard teńgege artyq.
Qashyqtan oqytýdy uıymdastyrý máselelerine erekshe nazar aýdarylady. Oqýshylardy kompıýtermen, noýtbýkpen, roýtermen, planshetpen qamtamasyz etýge 13 mıllıard teńge bólindi. Mektep ishine dárethana ornalastyrý máselesi de sheshilýde. Onyń 347-si zaman talabyna saı jóndeýden ótti. Sonymen qatar, stýdentterdi tasymaldaý úshin 71 jańa avtobýs satyp alyndy.
Baıandamasyn qorytyndylaǵan oblys ákimi Jetisý muǵalimderiniń jas urpaq tárbıesine qosqan úlesin atap ótti. Sondaı-aq olarǵa kez-kelgen jaǵdaıda kúndelikti jaýapty jumysy úshin shyn júrekten rızashylyǵyn bildirdi.
– Qurmetti, ustazdar! Shákirtterińizdiń taǵdyry jáne jas urpaqtyń bolashaǵy sizderdiń kásibı jáne adamı qasıetterińizge baılanysty. Ustaz – bilim berý júıesiniń basty baılyǵy, onyń altyn ıntellektýaldyq qory. Sizderdiń jumystaryńyzǵa, balalarǵa degen súıispenshilikterińizge, tańdaǵan uly qyzmetke degen adaldyqtaryńyzǵa, jas urpaqty tárbıeleýge sińirgen qajyrly eńbekterińizge shyn júrekten alǵysymdy bildiremin. Indetpen kúres júrip jatqan kezde aldyńǵy qatarda jáne qıyn kezeńde ózderińizdiń kásibı mindetterińizdi, barlyq bilim men biliktililikterińizdi mol tájirıbelerińizben baılanystyra otyryp, jas urpaqqa bilim berý isin tolyq jaýapkershilikpen atqaryp shyqtyńyzdar. Jas mamandarǵa mamandyqqa shynaıy qyzmet etýdiń aıqyn úlgisi bolǵan bilim berý salasynyń ardagerlerine erekshe alǵys aıtamyz. Ataqty oıshyl Sıseron aıtqandaı "Jas urpaqty oqytýdan asqan asyl da, baǵaly kásip joq". Bilim bergen oqýshylaryńyzdyń eńbegi men jetistigi sizdiń kúndelikti jumysyńyz úshin laıyqty baǵa jetpes syı dep bilemiz. Barshańyzǵa myqty densaýlyq, baqyt, qýanysh tileımin! Merekelerińizben ulaǵatty ustazdar, – dep qorytyndylaǵan A. Batalov merekelik marapattaý rásimin bastady.
"Jyl muǵalimi – 2020" baıqaýynyń respýblıkalyq kezeńiniń jeńimpazdary atanǵan oblys muǵalimderi marapattaldy. Olar Kóksý aýdanynyń M. Qurmanov atyndaǵy №2 orta mektebiniń bastaýysh synyp muǵalimi Lıýdmıla German, №28 IT mektep-lıseıiniń qazaq tili men ádebıeti pániniń muǵalimi Indıra Baıǵojına, daryndy balalarǵa arnalǵan úsh tilde oqytatyn M. Aryn atyndaǵy №24 ekonomıka jáne bıznes arnaýly lıseıiniń matematıka páni muǵalimi Murat Býlanov jáne Almaty oblysynyń qyzmet kórsetý salasyndaǵy ınnovasııalyq tehnologııalar kolledjiniń arnaıy pán oqytýshysy Aınur Qabdýllına. Ár jeńimpazǵa 2 mıllıon 778 myń teńgeniń sertıfıkaty tabystaldy.
"Jyl muǵalimi" oblystyq baıqaýynyń jeńimpazdaryna 850 myń teńgeniń sertıfıkaty tabystaldy. Olardyń qatarynda Tekeli kásiptik kolledjiniń oqytýshysy Anna Padalkına, Taldyqorǵan qalasyndaǵy №20 daryndy balalarǵa arnalǵan lıseıdiń muǵalimi Álııa Ámirova jáne Almaty ekonomıkalyq kolledjiniń oqytýshysy Gúlsaıa Jetkizgenqyzy bar.
"Oblystyń úzdik synyp jetekshisi" Alakól aýdanynyń Úsharal qalasyndaǵy №1 orta mektebiniń muǵalimi Aıgúl Ahmetova atandy. "Úzdik kásiptik bilim berý uıymy" nomınasııasy boıynsha Jambyl atyndaǵy Uzynaǵash kásiptik kolledjiniń komandasy jeńiske jetse, Qarasaı aýdany Almalybaq aýylynyń orta mektep-gımnazııasy "Úzdik aýyl mektebi" dep tanyldy.
Saltanatty sharada Jetisýdaǵy birqatar muǵalim Qurmet gramotalarymen, oblys ákiminiń Alǵys hatymen, "Y.Altynsarın" medaldarymen jáne "Bilim berý isiniń qurmetti qyzmetkeri" tósbelgilerimen marapattaldy. Oblystyń pedagogıkalyq qoǵamdastyǵy atynan bilim berý salasynyń ardageri Kúlaı Túsipova quttyqtaý sóz sóıledi. Ol memleket muǵalimderge barlyq qajetti jaǵdaıdy jasap otyrǵanyn, sondyqtan qazirgi keń múmkindikterdi tıimdi paıdalana otyryp, bilim men jas urpaqtyń tárbıesiniń sapasyn kóterýde tolyq jaýapkershilikpen jumys isteý óte mańyzdy ekenin atap ótti.