SKA-nyń tize búgetin sáti jetti

Osydan eki apta buryn «Ba­rystyń» birqatar oıynshysy men bapkerler quramy koronavırýs indetine shaldyǵyp, eki ap­ta­lyq karantınge jabylǵan edi. Osylaısha, 14 kúndik «demalys» alǵan elorda komandasy «Barys Arena» muzsaraıynda ótken oıynǵa óte tyń jáne jaqsy daıyndyqpen kelgeni baıqaldy. Báseke bastalǵan bette oıyn tiz­ginin qolǵa alǵan «Barys» sa­ıyp­qyrandary birinshi kezeńniń ózinde SKA qaqpasyna qatarynan eki shaıba soqty. Gol avtorlary – Anton Sagadeev (14-mınýt) pen komanda kapıtany Darren Dıs (19-mınýt). Úziliske deıin Sankt-Peterbýrg ujymy esep aıyrmasyn qansha qysqartýǵa tyrysqanymen, oǵan «Barystyń» qyraǵy qaqpashysy Henrık Karls­son múmkindik bergen joq.

Eki shaıba aıyrmashylyǵymen alǵa shyqqan soń azdap erkinsip ketken «Barysty» SKA hokkeı­shileri ekinshi kezeńde sabalaryna túsirdi. Oıynnyń 29-mınýtynda Ivan Morozov mergendigimen kózge tússe, úshinshi 20 mınýttyqta da eki dúrkin Gagarın kýboginiń ıegerleri bir shaıba soǵyp, tab­lo­daǵy kórsetkishti 2:2-ge jet­kizdi. Shaıba avtory – Evgenıı Tımkın.

Negizgi ýaqyt pen overtaımda teń túsken soń, jeńimpaz koman­danyń esimi býllıt serııasynda anyqtaldy. Bes shaıbanyń úsheýin qaqpaǵa dál baǵyttaǵan «Barys» hokkeıshileri jeńiske jetti. Taǵy bir aıta keterligi, «Barys» keıingi bes jylda birinshi ret SKA klýbynan basym túsip otyr. Buǵan deıin jerlesterimiz 2015 jyldyń 28 qazanynda elordada ótken básekede Sankt-Peterbýrg komandasynan 4:2 nátıjesimen basym túsken edi. Osy ýaqytqa deıin «Ba­ryspen» ótken barlyq matchta SKA-nyń mereıi ústem bolǵan.

Matchtan keıin oıyn týraly pikir bildirgen «Barystyń» bas bapkeri Iýrıı Mıhaılıs úzi­listen keıin oınaý qıyn bolsa da, hokkeıshiler muzaıdynǵa tek jeńis úshin shyqty deıdi.

– Oıyn biz úshin qıyn boldy. Birinshi kezeńde basym tús­ke­­nimizben, ekinshi jáne úshin­shi ke­zeńde qarsylasqa ese jiber­dik. Árıne, qashanda úzilisten keıin match ótkizý qıyn. Soǵan qara­mastan ta­bandylyq kórse­tip, jeńiske jetken komandama rızamyn. Jigitter kóp kúsh jum­sady. Muzaıdynǵa shyqqan bar­lyǵyna kóńilim toldy, ásirese Henrık Karlssondy erekshe atap ótkim keledi. Ol búgin óte jaqsy oınady. Dese de, oıyn­da teh­nıkalyq qatelik kóp bol­ǵanyn jasyrmaımyn. Aldaǵy ýa­qytta osy qa­telikpen jumys isteıtin bolamyz. Ár oıyn saıyn jaqsy qyrymyzdan kó­rinip, jankúıerlerdi jeńisimizben qýantamyz degen oıdamyn.

Bıylǵy turaqty birinshilikte «Barys» osymen úshinshi jeńisine qol jetkizdi. Jeti týrdan keıin elorda komandasy QHL-dyń «Shy­ǵys» konferensııasyndaǵy týrnır kestesinde 9 upaımen toǵy­zynshy orynda keledi. Al SKA bıylǵy maýsymda besinshi márte jeńilistiń kermek dámin tatýǵa májbúr boldy. Dese de, 8 oıynda jeńiske jetken Sankt-Pe­terbýrg ujymy «Batys» konfe­ren­sııasynda ekinshi orynda tur.

«Barys» kelesi oıynyn erteń syrt aıdynda Ekaterınbýrgtiń «Av­to­mobılıst» klýbymen ót­kizedi.