Búginde halyqaralyq reıstermen kelgen 150 jolaýshy "Ramada Plaza" qonaq úıindegi karantın stasıonaryna oqshaýlaýǵa alyndy, dep habarlaıdy Egemen.kz ákimdiktiń baspasóz qyzmetine silteme jasap.
5-nen 6 qazanǵa qaraǵan túni elordaǵa shetelden 4 reıs keldi. Eki ushaq Birikken arab ámirliginen, qalǵany Túrkııa Respýblıkasynan. Qalaǵa barlyǵy 483 adam shetelden ushyp keldi, onyń 333-i COVID-19 testinen ótkeni týraly kýálikpen keldi. Qalǵan 170 adam anyqtamasyz áýejaıdan aýrýhanaǵa jetkizildi. Onda adamdar PTR arqyly zerthanalyq zertteýlerden ótti. Olardyń densaýlyq jaǵdaıy qanaǵattanarlyq.
"Mundaı sharalar birinshi ret ótkizilip otyrǵan joq. Kóktemde biz shetelden keletin jolaýshylardy karantın stasıonarlaryna ornalastyryp, saraptama júrgizdik. Sondyqtan, bul baǵytta elordanyń densaýlyq saqtaý salasy tolyq daıyn. Jalpy, halyqaralyq reıster jolaýshylaryna 800 tósek-oryn uıymdastyrýǵa daıynbyz", deıdi densaýlyq saqtaý basqarmasy basshysynyń orynbasary Álııa Rústemova.
Qazaqstan Respýblıkasy Bas memlekettik sanıtarlyq dárigeriniń 2020 jylǵy 5 qazandaǵy Jarlyǵyna sáıkes, dene temperatýrasy joǵary adamdar, anyqtamanyń bolýyna qaramastan, ınfeksııalyq stasıonarda oqshaýlaýǵa jatady.
COVID-19 zerthanalyq zertteýleriniń nátıjelerin alǵannan keıin oń nátıjesi bar adamdar juqpaly aýrýlar aýrýhanasyna aýystyrylady, teris nátıjesi barlarǵa COVID-19 belgileri týraly túsindirme júrgizilip, úıge jiberiledi.