Májilistiń jumys toptarynda jańa zań jobalary boıynsha jumys jalǵasýda. Karantın jaǵdaıynda jumys toptarynyń otyrystary beınekonferensııa baılanys rejıminde ótkiziledi. Zańnamalyq jańalyqtardy talqylaýǵa Májilis depýtattarymen qatar qoǵamdyq jáne úkimettik emes uıymdar men memlekettik organdardyń ókilderi qatysýda. Bul týraly Májilistiń baspasóz qyzmeti habarlady.
Mysaly, Májilistiń Qarjy jáne bıýdjet komıteti «2021 – 2023 jyldarǵa arnalǵan respýblıkalyq bıýdjet týraly» jáne Ulttyq qordan kepildendirilgen transfert týraly zań jobalarymen jumys júrgizýde. Sondaı-aq, Ekologııa máseleleri jáne tabıǵatty paıdalaný komıtetiniń jumys tobynda qoǵam ókilderi «Ekologııalyq kodeks» jobasyn belsendi talqylaýda. Áleýmettik salaǵa qatysty zań jobalaryn Májilistiń Áleýmettik-mádenı damý komıteti qarastyrýda. Atap aıtqanda, bala quqyqtaryn qorǵaýǵa, otbasylyq-turmystyq zorlyq-zombylyqqa qarsy is-qımylǵa, otbasylyq-genderlik saıasatqa, dene shynyqtyrý men sportqa, bilim berýge, aqparatqa jáne qaryzdyq eńbekti retteýge qatysty zań jobalary bar.
Sonymen qatar, Zańnama jáne sot-quqyqtyq reforma komıtetiniń músheleri «Notarıat týraly» zań jobasyna depýtattyq túzetýlerdi, Advokattyq qyzmet jáne zań kómegi máseleleri jónindegi jáne norma shyǵarýdy jetildirý máselelerine qatysty zań jobalaryn, al, Ekonomıkalyq reforma jáne óńirlik damý komıteti memlekettik satyp alý, tehnıkalyq retteý jáne t.b. saladaǵy zań jobalaryn qaraıtyn bolady. «Erekshe taýarlardy baqylaý týraly» zań jobalary men Kaspıı teńizinde qyzmetti júzege asyrýǵa baılanysty túzetýlerdi Májilistiń Halyqaralyq ister, qorǵanys jáne qaýipsizdik komıtetiniń músheleri talqylaıdy. Agrarlyq máseleler komıtetiniń sheńberinde jumys toptary veterınarııa jáne asyl tuqymdy mal sharýashylyǵy máselelerine qatysty zań jobalary boıynsha qorytyndylar daıyndaıdy.