Búginde elimizde jergilikti polısııa qyzmetin «Jurtqa jaqyn polısııa» qaǵıdaty boıynsha reformalaý men Qazaqstan polısııasy jumysynyń «servıstik modelge» kóshýi týraly kóp aıtylady. Sebebi elimizdegi quqyq qorǵaý organdarynyń aldynda turǵan búgingi mindet servıstik jedel polısııa qalyptastyrý ǵana emes, sonymen qatar onyń ashyqtyǵyn da qamtamasyz etý bolyp otyr. Zaman talaby tártip saqshylarynan qoǵamda týyndaǵan máselelerdi azamattarmen birlese sheship, turǵyndarmen barynsha tyǵyz qarym-qatynas ornatýdy aldyńǵy orynǵa qoıady.
Osy baǵytta jasalyp jatqan alǵashqy qadamdar da bar. Máselen, elimizde azamattardy qabyldaý oryndary ashyldy. Bul oryndarda búginde azamattardyń aryz-shaǵymdaryn qaraýǵa aıryqsha kóńil bólinip keledi. Osylaısha elimizdiń quqyq qorǵaý organdary tıisti keńester berýge basa nazar aýdaryp, turǵyndarǵa memlekettik qyzmet kórsetýdiń tártibi aıtarlyqtaı ońtaılandyryldy. Alaıda polısııa ıdeologııasyna ózgerister engizbeı bul máselelerdi sheshý múmkin bolmaıdy. Sondyqtan Ishki ister mınıstrligi osy kúni halyqaralyq tájirıbeni zerttep, zerdeleı otyryp birneshe baǵyt boıynsha jumys atqarýdy qolǵa alǵan kórinedi. Sol baǵyttardyń qatarynda «servıstik polısııany» jetildirý máselesi de bar. Osy maqsatta halyqaralyq sarapshylarmen ózara is-qımyl jasaý barysy da jolǵa qoıylyp otyr.
Nege? Sebebi polısııa jumysyn jandandyrý máselesi buǵan deıin de az aıtylǵan joq edi. Osy sala mamandarynyń jumysyna degen syn da, min de arta tústi. Tipti quqyq qorǵaý organdarynyń jumysyn jańǵyrtý máselesine Memleket basshysy Qasym-Jomart Toqaev «Jańa jaǵdaıdaǵy Qazaqstan: is-qımyl kezeńi» atty bıylǵy Qazaqstan halqyna Joldaýynda da aıryqsha mán bergen edi. Prezıdent óz sózinde «Barlyq ozyq elderde polısııa ınstıtýty servıstik model negizinde damyp keledi. Biz de mundaı úlgige kóshetinimizdi məlimdedik. Biraq jumys barysynda az ǵana nətıjege qol jetkizildi. «Jurtqa jaqyn polısııa» qaǵıdaty boıynsha jergilikti polısııa qyzmetiniń meılinshe tutas reformasyn jasaý qajettigi pisip-jetildi. Osyǵan oraı ýchaskelik ınspektordyń róline basa mən beriletin bolady. Ýchaskelik ınspektordyń mərtebesin zańnama arqyly arttyryp, onyń ónimdi jumys isteýine mol múmkindik bergen jón. Ol azamattar aldynda tanymal, qoljetimdi əri bedeldi bolýǵa, solardyń quqyqtaryn qorǵaýǵa tıis. Quqyq qorǵaý organdary qyzmetkerlerin jurtpen ashyq əńgime júrgizýge úıretýdiń mańyzy zor. Bul baǵyt kadrlardy daıarlaý jəne irikteý júıesinde basymdyqqa aınalýy qajet» degen edi. Iаǵnı, Qazaq eliniń qazirgi polısııasy jurtqa barynsha ashyq ári jaqyn bolýy tıis. Bul rette «servıstik polısııanyń» jumysy mańyzdy. Eń aldymen «servıstik polısııa» degenimiz ne?» degen suraqqa jaýap izdep kóreıik.
«Servıstik polısııa» – qoǵammen seriktestik ornatý arqyly máselelerdi sheshýge baǵyttalǵan strategııa. Al polısııany azamattardyń máselelerin sheshetin jáne kómektesetin qyzmet dep baǵalaýǵa bolady. Sondyqtan jergilikti polısııa qyzmetinde aýqymdy reformalar júrgizilýde. Sonyń ishinde ýchaskelik polısııa qyzmetkerleriniń jumysy qaıta qaralýda. Atalǵan vedomstvo Eýropadaǵy qaýipsizdik jáne yntymaqtastyq uıymyndaǵy baǵdarlamalar ofısiniń qoldaýymen ýchaskelik polısııa ınspektorlaryna arnalǵan árbir qyzmettik jaǵdaıǵa qajetti is-qımyldardyń qadamdyq algorıtmin ázirlep otyr. Sondyqtan «Jurtqa jaqyn polısııa» qaǵıdaty eń aldymen ýchaskelik polısııa qyzmetkerleri úshin mańyzdy.
Bul qaǵıdanyń nelikten ýchaskelik polısııa úshin jaqyn ekeni aıtpasa da belgili. Nur-Sultan qalalyq polısııa departamentiniń bastyǵy polısııa general-maıory Erjan Sádenov bir sózinde aıtqanyndaı, «ýchaskelik ınspektorlar halyqpen tikeleı jumys isteıdi jáne birinshi bolyp sheshim qabyldaıdy». Sondyqtan bul sheshimderdi qabyldaý kezindegi kásibılik pen tájirıbe óz aldyna, polısııa ınspektorlary eń aldymen jurtpen ashyq əńgime júrgizýge beıimdele bilý mańyzdy bolyp otyr.
Osy jergilikti polısııa qyzmetin «Jurtqa jaqyn polısııa» qaǵıdaty boıynsha reformalaý men Qazaqstan polısııasy jumysynyń «servıstik modelge» kóshýi máselesine qatysty uıymdastyrylǵan Ishki ister mınıstrliginiń aptalyq baspasóz máslıhatynda IIM Kadr saıasaty departamentiniń bastyǵy Aıdar Saıtbekov «Azamattardyń sanasynda polısııanyń qyzmeti jazalaýshy emes, qıyn-qystaý kezde kómekke kelýshi retinde ornyǵýy qajet. Quqyq qorǵaý organdarynyń jumysy otandastarymyzdyń máselelerin sheship, qajet bolǵan jaǵdaıda qolushyn sozýǵa negizdelgen. Qoǵammen seriktestik etýge, tyǵyz baılanys ornatýǵa qashanda daıynbyz. Bul týraly elimizdiń «Ishki ister organdary týraly» zańda da jazylǵan», dedi. Iаǵnı, el polısııasynyń eń negizgi mindeti – jazalaý emes, turǵyndardyń qorǵany bolý. Quqyq qorǵaý organdary salasynda júrgizip jatqan búgingi reformalar da osyny kózdeıdi.