Búgingi tańda Qazaqstanda 74 bala koronavırýs ınfeksııasyn juqtyrdy, onyń 10-y aýrýhanaǵa jatqyzyldy. Bul týraly Ortalyq kommýnıkasııalar qyzmetinde ótken brıfıngte Densaýlyq saqtaý mınıstrliginiń resmı ókili Baǵdat Qojahmetov málimdedi.
«2020 jylǵy 2 sáýir men 7 qazan aralyǵynda elimizde koronavırýstyq ınfeksııa dıagnozy rastalǵan 2 551 bala tirkelgen. Búgingi tańda COVID-19-ben bir aıdan 18 jasqa deıingi 74 bala aýyrady. Olardyń basym bóligi Shyǵys Qazaqstan, Soltústik Qazaqstan jáne Pavlodar oblystarynda anyqtaldy», - dep habarlady Qojahmetov.
Onyń málimetinshe, qazirgi ýaqytta 10 adam aýrýhanaǵa jatqyzyldy, qalǵandary úı karantıninde. 32 balada aýrý sımptomsyz, 31–nde – jeńil, 7-nde - ortasha aýyr kúıde ótýde. Onyń ishinde bireýine bakterııalyq sıpattaǵy pnevmonııa, al ekinshisine tán belgileri bar COVID-19 asqynýy retinde vırýstyq pnevmonııa dıagnozy qoıylǵan. 46 oqýshy men úsh balabaqsha tárbıelenýshisi baqylaýǵa alyndy.
«Densaýlyq saqtaý mınıstrligi qalyptasqan jaǵdaıǵa alańdaýly jáne azamattardan ózine jáne aınalasyndaǵylarǵa muqııat bolýdy – betperde taǵýyn, sanıtaızerlerdi paıdalanýdy jáne áleýmettik qashyqtyqty saqtaýdy suraımyz. Ásirese, JRVI men tumaýdyń órshýi kezeńinde», - dep atap ótti resmı ókil.