Mahambet О́temisuly atyndaǵy Batys Qazaqstan ýnıversıtetiniń ǵalymdary jaratylystaný ǵylymdary salasyndaǵy irgeli ǵylymı zertteýler jobasy baıqaýynda jeńimpaz atandy, dep habarlaıdy Egemen.kz
"Jaratylystaný ǵylymdary salasyndaǵy ǵylymı zertteýler basym baǵyty boıynsha 2020-2022 jyldarǵa arnalǵan ǵylymı jáne ǵylymı-tehnıkalyq jobalar" granttyq qarjylandyrý konkýrsyna Mahambet ýnıversıtetiniń jaratylystaný-geografııa fakýlteti ǵalymdary usynǵan joba jeńimpaz atandy.
"Batys Qazaqstan sý qoımalarynyń gıdrobıonttary men mıkrobıomdary jaǵdaıyn baǵalaý jáne olardyń ózgerisin boljaý» atty bul joba óńir úshin óte ózekti bolatyn. Ulttyq ǵylymı keńes maquldaǵan ǵylymı jobanyń jalpy somasy 56,5 mln. teńge. Endi ýnıversıtet rektory, bıologııa ǵylymdarynyń kandıdaty, qaýymdastyrylyǵan professor Nurlan Serǵalıevtiń ǵylymı jetekshiligimen oraldyq bıolog, geograf ǵalymdar 27 aı boıy Batys Qazaqstan sý qoımalarynyń gıdrobıonttary men mıkrobıomdarynyń qazirgi jaǵdaıyn zertteıdi. Bul jobaǵa Reseı Federasııasynda oqyp jatqan jas ǵalymdar A.Sarmanov pen E.Sultanov ta qatyspaq. Olar bıologııalyq baǵyt boıynsha ǵylymı mektepti damytý sheńberinde ýnıversıtet qarjysy esebinen Qazan federaldy ýnıversıtetiniń aspırantýrasynda bilim alyp jatqan bolatyn.
Sonymen qatar zertteý jumysyn júrgizýge ýnıversıtettiń magıstranttary men stýdentteri de tartylady.
"Biz osy ýaqytqa deıin ómirlik qajetti úsh tireýdiń basyn biriktire almaı júrdik. Mine, endi bilim – ǵylym – óndiris úshtiginiń basyn qosatyn naqty zań qabyldanyp, nátıjeli jumys isteı bastady. О́ndiristi damytýshy ǵylymdy ınvestısııalaýdyń halyqaralyq qalyptaǵy júıesi endi bizdiń el ómirine de ene bastady. Buǵan deıin ǵylym qarajatqa zárý bolyp, ǵalymdar ashqan jańalyqtar óndiriske joldama almaı kelse, endi ondaı toqyraý bolmaıdy", deıdi joba jetekshisi, ýnıversıtet rektory Nurlan Serǵalıev.
Rektordyń aıtýynsha, elimizde ǵylymdy ınvestısııalaýdyń birneshe arnasy jumys isteı bastaǵan. Máselen ǵylymı-zertteýler úshin arnaıy memlekettik maqsatty granttar bólý, memlekettik tapsyrystar boıynsha ǵylymı-zertteý jobalaryn júzege asyrý, ǵylymǵa bólinetin qarjyny ǵalymdardyń óz eksheýinen ótkize otyryp bólý, aqyr aıaǵynda jeke kapıtaldy ınvestısııa retinde tartý arnalary paıda boldy. Ashylǵan jańalyqtardy óndiriske engizý isi jeńildeı tústi. Qazir úkimet deńgeıinde joǵary ǵylymı-tehnologııalyq keńes jumys isteıdi. Bul keńes salalyq ǵylymı keńesterdiń usynystaryn eksheýden ótkizedi.
"Saıyp kelgende, báriniń de múddesi ǵylymdy ınvestısııalaý, jańalyqty óndiriske kidirissiz engizý jumystaryn júıege túsirgen, jemisti etetin bir jańa arna bolǵanyn aıta ketý kerek. О́tken jyly jas ǵalymdar úshin beriletin grantqa 3 mlrd teńge qarjy bólingen. Al bıyl "Jas ǵalym" jobasy qolǵa alynyp, jas ǵalymdar úshin 1000 zertteý granty bólingeli otyr. Bul jas ǵalymdardyń ınnovasııalyq ıdeıalary men start-ap jobalaryn júzege asyrýǵa zor múmkindik", deıdi Nurlan Habıbollauly.