Tarıhı tolǵam tebirentti

Aqıqatynda, hakimdik tuǵyrdan kóringen uly oı̆shylymyz qazaq rýhanııatynyń temirqazyǵyna aı̆naldy. Bizdiń rýhymyz, kemeldengen bas­taýymyz hakim shyǵarmalary dep aı̆týǵa tolyq negiz bar. Tarıhı jazbada Abaı̆ muralarynyń ózektiligi men ómirsheńdigi aı̆tylyp qana qoı̆maı̆, Elbasynyń syndarly saıasatynyń astarynda Abaı̆ ulaǵaty jatqandyǵy da júrek tebirentti. «El birligi – eń asyl qasıet» degen qaǵıdatty qaster tuta­tyn Elbasynyń árbir tarıhı sheshimine temirqazyq retinde hakimniń shyǵarmasyn alyp otyrǵany kimdi de bolsyn tolqytatyny anyq. «Qazaqstan Respýblıkasynyń Prezıdenti retinde ókilet­tigimdi óz erkimmen toqtatý týraly sheshim qabyldamas buryn, bola­shaq el basqarar azamatqa qajet qaı̆rat­kerlik tájirıbe men taǵylym jaı̆yn oı̆ tezine, kóńil bezbenine tartyp, asyqpaı̆, zer sala qaradym. Abaı̆dyń:

«Bas-basyna bı bolǵan óńsheń qıqym,

Minekeı̆, buzǵan joq pa eldiń sıqyn?

Birlik joq, bereke joq,

shyn peı̆il joq,

Sapyryldy baı̆lyǵyń,

baqqan jylqyń.

Basta mı, qolda malǵa talas qylǵan,

Kúsh synasqan kúndestik

buzdy-aý shyrqyn»,

degen ókinishin qaı̆talamaý qajettigi taǵy aldymnan shyqty», dep Elbasynyń aı̆ryqsha atap ótýi – adamzattyń alyby sanalǵan Abaı̆ danalyǵynyń barshaǵa ortaq temirqazyq ekenine dálel.

Tarıh qatparynan syr tartyp, rýh saltanatynan oı̆ sabaqtap, ótken men búgindi qamtyp, syndarly jolǵa nusqa bolǵan bul tolǵamnyń ózektiligi men ómirsheńdigi aı̆qyn. El basqarý isindegi ilkimdi dúnıeler týrasynda tebirenis pen tolǵanysta otyryp jazylǵan mańyzdy maqalanyń dana Abaı̆dy tanýdaǵy taǵy bir tolymdy eńbek ekeni anyq. Elbasynyń «Daǵdarystar ótedi, ketedi. Al memleket táýelsizdigi, ult muraty, urpaq bolashaǵy sııaqty qundylyqtar máńgi qalady» dep kórsetken sara joly Abaı danalyǵymen ushtasyp jatyr.

Súleımen MÁMET,

jazýshy, ardager jýrnalıst