Dúnıejúzilik densaýlyq saqtaý uıymy indettiń taralý qaýpi áli báseńdemegenin, koronavırýstyń ekinshi tolqyny bolýy múmkin ekenin eskertip, saqtyq sharalaryn barynsha qatań ustanýǵa shaqyryp otyr. Osy rette «Samuryq-Qazyna» ulttyq ál-aýqat qory COVID-19 indeti qaıta kúsheıgen jaǵdaıda ózine qarasty óndiristerdi toqtatýǵa, óndiristik personaldy qysqartýǵa jol bermeý boıynsha daıyndyq jumystaryna kirisip ketti.
«Samuryq-Qazyna» AQ kompanııalar tobynyń COVID-19 indetiniń yqtımal ekinshi tolqynyna daıyndyǵy týraly arnaıy brıfıngi ótip, qordyń aktıvterdi basqarý jáne jekeshelendirý jónindegi basqarýshy dırektory Almasadam Satqalıev jan-jaqty málimet berdi.
– Pandemııanyń alǵashqy kezeńinde jınalǵan tájirıbe kórsetkendeı, qor táýekelder men qıyndyqtardy eńsere bildi. Biz negizgi kórsetkishterdiń aıtarlyqtaı tómendeýine, óndiristiń toqtap qalmaýyna jáne óndiristik personaldyń qysqarýyna jol bermedik, jalaqy ýaqytynda tólendi, – dedi A.Satqalıev.
Onyń aıtýynsha, qazirgi ýaqytta pandemııa qaıtalanǵan jaǵdaıda is-sharalar josparyn túzetý boıynsha jumys júrgizilip, qarjyny rezervteý qamtamasyz etilgen. Sondaı-aq tıisti taýarlardy, jumystar men qyzmetterdi úzdiksiz jetkizý barysy pysyqtalǵan. Portfeldik kompanııalarǵa qarasty kásiporyndar men merdigerlik medısınalyq uıymdardyń medısınalyq kómek kórsetý jónindegi is-qımyldarǵa daıyndyǵy naqtylandy.
Qordyń qazirgi qabyldanyp jatqan sharalary óndiristik qyzmetti qoldaý, qarjylyq turaqtylyqty qamtamasyz etý jáne basqarýdyń eń tıimdi qurylymyn saqtaý úshin qolaısyz saldarǵa ákelýi múmkin mańyzdy bıznes-prosesterdiń tizimin aıqyndaýǵa baǵyttalǵan. Máselen, pandemııanyń birinshi tolqyny kezinde óndiriske mınımaldy keri áser etip, tıimdilikti kórsetken A, V, S josparlarynyń algorıtmderi jasalǵan. A jospary aldyn alý sharalaryn júzege asyrýdy kózdeıdi. Al V jospary epıdemııalyq jaǵdaıdyń nasharlaýy kezinde jáne S jospary kompanııada nemese óndiris ornynda ınfeksııa jaǵdaılary anyqtalǵan kezdegi is-sharalardy bekitýge baǵyttalǵan. Sondaı-aq portfeldik kompanııalardyń indettiń aldyn alý is-sharalary boıynsha júrgizgen belsendi jumystary jalǵasýda.
– Árıne, qor qazirgi jaǵdaıdy muqııat taldaıdy. Qyzmetkerlerimizdiń densaýlyǵyn oılaý – basty mindetimiz. Biz bul baǵytta kóptegen jumys júrgizip jatyrmyz. Pandemııa tájirıbesi bolashaq bıznesti sıfrlandyrý isiniń, óndiristik ekonomıkany modernızasııalaýdyń mańyzdy ekenin kórsetti, – deıdi A.Satqalıev.
Basqarýshy dırektor yqtımal ekinshi tolqynǵa daıyndyq aıasynda qor qyzmetkerleriniń arasynda Densaýlyq saqtaý mınıstrliginiń nusqamalaryna sáıkes COVID-19-dan qorǵanýdyń sharalaryn saqtaý máseleleri boıynsha aqparattyq jumystary jalǵasatynyn habarlady. Sondaı-aq jýrnalıster suraǵyna jaýap bergen ol koronavırýs ınfeksııasynan zardap shekken salalarǵa qoldaý kórsetý jáne qalpyna keltirý jumystaryna toqtaldy.
– Jolaýshylar tasymaldaý salasyna keletin bolsaq, bul koronavırýs ınfeksııasynyń taralýynan eń kóp zardap shekken sala ekeni sózsiz. Pandemııanyń birinshi tolqyny kezinde jolaýshylar trafıgi toqtatylǵany belgili. Jolaýshylar tasymaly 2019 jylmen salystyrǵanda 50 paıyzǵa qysqardy. Bul kompanııanyń qarjylyq nátıjelerine áser etti. Memleket tarapynan temir jol salasyna bólinetin josparly sýbsıdııanyń kólemi saqtalyp, jaǵdaı qalpyna keldi.QTJ jolaýshylardy tasymaldaý josparyn jyl sońyna deıin 60 paıyzdan asyra almaýy múmkin. Bul sáıkesinshe kompanııanyń qarjylyq kórsetkishterine áser etedi. Jumys tıimdiligin arttyrý úshin biz jańa damý josparyn qabyldadyq. Onda kompanııalar óndiristik jáne kúrdeli salymdardy edáýir qysqartty. Bul tutastaı alǵanda kompanııaǵa óndiristik tapsyrmalardy oryndaýǵa múmkindik beredi, – dedi A.Satqalıev.
«Samuryq-Qazyna» AQ enshiles kompanııalarynyń turaqty óndiristik kórsetkishi asa mańyzdy. Kez kelgen jaǵdaıǵa baılanysty qor jańa sheshimderdi izdeý mehanızmin iske qosyp, basqarýshylyq jáne óndiristik prosesterdi qaıta qurý men jetildirýge baǵyttalǵan jobalarǵa basa nazar aýdaryp keledi.